PĀNGMONSHI 7 - Kathara Bible (BSI)

Khayonchigat

¹ Khayonchigat kasāwui ain hina. Hi tharmathengmeikap kajena;

² rikkatā kachigat taithat khavaipam chili khayonchigat sākhavai chila taithatra, kala ashee hanphut kuimareida chaira.

³ Kala chiwui athao katonga chigatra, akhamei thaola, akharili kharom thaola,

⁴ amakei khanili kharoma ahānthao kala amathinli khangathānbing ana amakei eina ngarumda khuithuihaora,

⁵ Proho wui vang mei eina rikkatā chithāda pāngmonna hanphuttungli riktāra; hi khayonchigat kasāna.

⁶ Pāngmon shimkhur mayarnao kachiva̱ shaipai; chi katharapam akhali shaira; hi tharmathengmeikap kajena.

⁷ Khayonchigat hila suihamchigat eina ngaraichai; khani hiwui ain akhamaya; pheomi khavai sakhame pāngmon china sā chi khuira.

⁸ Kala mi akhawui vang kachikathā rikkatā kachigat sakhame pāngmon china rikkatā kachigat sā chiwui ahui khuira.

⁹ Khongpheili nailaga khāng eina khangui tharāzāt kachigat chi chigatkhame pāngmonwuina.

¹⁰ Kala tharāzāt kachigat kachiva̱, thao sanglala, masanglala Aaronwui naomayarabingwuisera, kala chi athum ngaraichāda ngayarra.

¹¹ Kala hi mi akhana Proholi ningyatchigat pha̱kaphayāwui ainna.

¹² Kalikha ana ningkashiwui vang chigatakha thao khamanat khawok makazang khamui chigatra, thao heiror kahai khawok makazang khangava khamuiyur kala manaktak kahai mathir manātkazaklaga chigatranu.

¹³ Ningkashiwui kachigat awui ningyatchigat kasāli pha̱kahai otli ngasoda khawok kazanga khamui khuirāra.

¹⁴ Hikatha Proholi kachigatwui khamui yur ava̱va̱ pāngmonwui vang sāra, kaja ana ningyatchigatwui pha̱kaphayāwui ashee heirorkhamiwui vangna.

¹⁵ Kala awui ningkashi khamiwui ningyatchigat pha̱kaphayā chiwui asā chi pha̱thang shaira; ngathorshongwui vang mataipaimana.

¹⁶ Kha awui kachigat chi khangashit kasāwui kachigat, lah lemmet kachigatwui pha̱kaphayaakha, pha̱phayāthang shaira kala katai chi akhama kathāla shaipai.

¹⁷ Kha kapha̱ sā chi kakathumathang taisaakha meili riktāra.

¹⁸ Kala ningyatchigat kapha̱ asā chi kakathumathang shaiakha, chi makhuisangmimara, awui vang khikha kānkhanāla maleimana, makathar ot ngasāhaora, kala chi kashai mi akhalatta khayon phungra.

¹⁹ Makathara otli saza̱ kahai asā chi mashaipaimana, chi mei eina riktāra. Kha katai asābing chiya katharbingmāngna shaipai.

²⁰ Kha makathar mi akhana Proholi kachigat ningyatchigatwui sā shaiakha chikathā mi chili miyurwui eina katathaora.

²¹ Kala kachikathā akhana makathara ot miwui makathar nilala, makathar sāyur nilala, kala ningkakachaiya makathara ot nilala akhali saza̱laga Proho wui vang ningyatshar kachigat asā chi shaiakha, mipa chili awui mibingwui eina katathaora.

²² Prohona Mosesli hānga,

²³ Israelnaobingli hānglu, nathumna seiwui nilala, yaowui nilala kala mewui nilala athao mashaipaimara.

²⁴ Khalatta kathi sāwui kala khazur sāwui athao chi ot khangateili sāvaipai; kha nathumna chi mashaipaimana.

²⁵ Mei eina riktāda Proholi kachigatwui sā chiwui athao kashai mibing kachiva̱li mibingwui eina katathaora.

²⁶ Chili lāngda, nathumwui kapampamli sāyur-vāyurwui ashee mazāpaimana.

²⁷ Ashee kazāpa chili mibingwui eina katathaora.

²⁸ Kala Prohona Mosesli hānga,

²⁹ “Israelnaobingli hānglu, Proholi ningyatshar kachigata a china awui pha̱kaphayā akai akha chi Proholi khuirāra.

³⁰ Mei eina riktāda kachigat, Prohowui pha̱kaphayā chi awui pāng eina khuirāki kajina, athao chi asuk eina ngasoda khuirāra, asuk chi Prohowui mangāli khayitta kayitchigat sāra.

³¹ Athao chi pāngmonna hanphuttungli riktāra, kha asuk chi Aaron kala awui naomayarabingwui sāra.

³² Kala nana nawui ningyatchigat kapha̱wui yashongwui akhaishāng pāngmonli mira.

³³ Aaronwui naomayarabingwui ngachaili ningyatshar kachigatwui ashee kala athao pha̱kaphayāpa china awui yar yāshongwui khaishāng samphangra.

³⁴ Ningyat chigatwui asuk khayit kahai chi kala khaishāng chigat kahai chi Israelnaowui eina ina khuikahaina, kala pāngmon Aaron kala awui naomayarabingli mikahaina, hi Israelnaobingna michingphalungki kaji mikhangayi yarna.

³⁵ Rikkatā Proholi kachigatwui eina hi Aaron kala anaomayarabingli, Prohowui otram ngatha̱ khavai pāngmon sāda hākhuithang eina thuida tharchigatta yarkahaina.

³⁶ Hi israelnaobingna mikhangayina, athumli tharchisinmithang Prohona kaso kahaina, athumwui naothot kachida mivāshumki kajina.”

³⁷ Hi rikkatā kachigat, tharāzāt kachigat, suihamchigat, khayonchigat, tharkachigatwui kala ningyatchigatwui ningkhamina.

³⁸ Israelnaobingna Sinai lamhāngli pha̱phayā khavai, Sinai Kaphungli Prohona Mosesli hāngthang kaso kahaina.