PĀNGMONSHI 6 - Kathara Bible (BSI)

Kachigatwui Ain

¹ Prohona Mosesli hānga,

² “Proholi manganāsangmada kachikathāna awui khongnainaona ali chisinhaikasā ot minamkhuihaiakha, lah ngapaikhuihaiakha maningakha awui khongnaili satkharatta morei saakha,

³ lah shimān kahai ot samphanglaga kapikta mikhanam shākhi saakha—hāngda khaleibing hili ana morei saakha,

⁴ kachikathā morei sāda yonkahai tharan, ngapaikakhui nilala, satkharatta kakhui nilala, ali chisin kahai minamkakhui nilala, shimān kahai samkaphang nilala ana hanmira;

⁵ maningakha ana minamda shākhi sākakhui nilala, tongtingda hanmiphalungra; chiwuitungli sharuk phangāwui akha lāngsangmiphalungra, hi suihamchigat chigatthang akhavāpali mira.

⁶ Kala ana pāngmonli suihamchigatwui vang Proholi achuk kapei yaoshangwui eina yaovā akha khuirāra, suihamchigatwui aman khangachā chi nana ngachākkhuira.

⁷ Hāngkahai chiwui ngachaili ana yonkahai chiwui vang Prohowui mangāli pāngmon china pheomi khavai sāra, kala ali pheomihaora.”

Tongda Rikkatā Kapha̱

⁸ Prohona Mosesli hānga,

⁹ “Aaron eina awui naomayarabingli hithāda kasolu, hi rikkatā kachigatwui ainna. Rikkatā kachigat chi hanphut alungthungli ngayā pongda rikthaira, kala hanphutwui meila kazing kathang eina tangda sāthaira.

¹⁰ Kala pāngmonna awui khamanaka sāri eina kongkarao ngavailaga hanphuttungli meina chuitā kahai hotla chi khuilaga rikkatā kachigatwui hanphut ngalemli haira.

¹¹ Chiwui thili awui sāribing raihailaga khangatei sāri shinkhuida hotla chi rāmrahwui ayar katharpamli khuishokra.

¹² Hanphut chiwui mei chi chuishon chuithai ngasakra, ngathor kachida pāngmonna thing khuisangda rikkatā kachigat chiwui athishurda ningyatchigatwui athao chi hanphuttungli riktāra.

¹³ Hanphutungli mei chi chuishon ngasakra, mei chi mamit ngasakpaimara.

Theishirai Kachigatbing

¹⁴ “Kala tharāzāt kachigatwui ain hithai. Aaronwui naomayarabingna Prohowui maiyanli, hanphutwui mangāli chigatra.

¹⁵ Kala akhana tharāzāt kachigatwui manaktak kahai mathir homkha kala chili ngasoda chiwui thao eina frankincense chi khuilaga phaningung khavai yar chi hanphuttungli riktāra, hi Proholi ningyangkhaungwui nganamkaphā otna.

¹⁶ Kala katai chi Aaron kala awui naomayarabingna shaira, hi khawok mazangla kazip khavai kachonshimwui yāngkhupli shaira.

¹⁷ Khamui chili khawok masangpaimana. Iwui rikkatā kachigatwui eina, ina athumwui yar sāda phaishokmi kahaina; hi tharmathengmeikap kaji suihamchigat kala khayonchigat kathar akhana.

¹⁸ Hāngkahai thāda Aaronwui shimkhurli mayarnao kachiva̱na thot kachida, Prohowui mei eina rikkatāwui eina shaipai; chi kashaibingna kathara ngasāra.”

¹⁹ Prohona Mosesli hānga,

²⁰ “Aaronli tharchisinmithang, ali ngasoda anao ngarāna hithāda Proholi pha̱phayāra: khangachā tharāzāt kachigat kasā thāda manaktak kahai mathir homkha, chiwui eina tangkhai ngathor, tangkhai ngazin pha̱ra.

²¹ Thao sanglaga naikazakzaklaga khuirālu, khāngli nguira kala tharāzat thāda sālaga ningyāngkhaung nganamkaphā Proholi chigatlu.

²² Aaronwui naomayarabingwui eina ali thuishin khavai thao neomi kahaiya china, katang makhavaiwui vang hāngkahai athishurda Proholi saikora chi riktāda chigatra.

²³ Pāngmonwui tharāzāt kachigat kasā thāda tongda riktāra, chi mashaipaimana.”

Suihamchigat

²⁴ Prohona Mosesli hānga,

²⁵ Aaron kala naomayarabingli hānglu, hi suihamchigatwui ningkhamina. Rikkatā kachigat taithat khavaipamli suihamchigat sākhavai chi Prohowui mangāli taithatra; hi tharmathengmeikap kaji otna.

²⁶ Moreiwui vang pha̱khame pāngmon china chi shaira, kazip khavai kachonshimwui yāngkhup katharapamli shaira.

²⁷ Asa chili sākaza̱ kachiva̱ kathara ngasāra; kala kashan-kachonli ashee kasirrorhaiakha kachon chi kathara apamli ngasa̱ra.

²⁸ Asa chi ngaleiham eina hangakha hangkahaiwui thili ham chi sakhaihaora; kha pithrai ham eina hangakha kashut kazaklaga tara̱ eina pheokhuira.

²⁹ Pāngmon shimkhurwui mayarnao kachiva̱ shaipai, hi tharmathengmeikap kajena.

³⁰ Kha kazip khavai kachonshimlungwui kathara apamli pheomi khavai suihamchigatwui ashee khuikazang chiwui asā chi mashaipaimana; chi meili riktāphalungra.