PĀNGMONSHI 4 - Kathara Bible (BSI)

Suihamchigat

¹ Kala Prohona Mosesli hānga,

² Israelnaobingli hānglu, Prohona masāpaimara da kaso kahaiwui ngachaili kachikathāna matheimada akha sahaiakha,

³ kasāpa chi thao neomi kahaia pāngmon sāsāda, ana mibingli yonngasakakha, ana morei sākahai chiwui vang suihamchigat sākhavai achuk kapei mukkā akha Proholi chigatra.

⁴ Ana Prohowui mangāli kazip khavai kachonshimwui khāmongli mukkā chi khuirāranu, kala ana mukkāwui kuili apāng parda taithatra.

⁵ Kala thao neomi kahaiya pāngmon china ashee ngayarda kazip khavai kachonshimli khuirāra;

⁶ kala ashee chili pāngmareng eina chumkhuilaga katharapam chiwui mairār mangāli Proholi shini shida kasirrorra.

⁷ Kala kazip khavai kachonshimli khalei Prohowui mangāli nganamkaphā thaowui hanphutwui angachibing chili pāngmon china ashee ngayarda neora; kala mukkāwui ashee katai saikora chi kazip khavai kachonshimli khalei rikkatā kachigat pha̱khavai hanphutpheili heirorra.

⁸ Kala suihamchigat sākhavai mukkā chiwui athao saikora ana chiwui eina khuira, akharili kharom athao kala akharili kakā athao saikora,

⁹ kala amakei khanili kharoma ahanthao kala amathinli khangathānbing ana amakei eina ngarumda khuithuihaora.

¹⁰ (hi ningyatchigatwui mukkā eina khuikashok thāda) kala pāngmon china rikkatā kachigat hanphuttungli chibing chi riktāra.

¹¹ Kha mukkāwui ahui kala chiwui asā, chiwui akui eina ngasoda, chiwui akhomareng, akharibing, kala chiwui pai,

¹² mukkā angun katonga rāmrah ayar katharpam akhali khuishokta hotla horkhavaipamli thingwui mei eina riktāra.

¹³ Israelnaobing katongana makatheiwui vang morei sāhailaga, chi ashangva̱wui eina thumhaiakha kala Prohona masālu kajiwui ngachaili akha sahaiakha yarui ashangva̱na matheilala;

¹⁴ athumna sākahai morei chi theikahai tharan, yarui ashangva̱na morei chiwui vang mukkānao akha suihamchigat sākhavai kachigat chi kazip khavai kachonshimli khuirāra;

¹⁵ kala Prohowui mangāli ashangva̱wui ararbingna sei chiwui kuitungli pāng parra, kala mukkā chi Prohowui mangāli taithatra.

¹⁶ Chieina thao neomi kahai pāngmon china mukkā chiwui ashee teomeikha kazip khavai kachonshimli khuikāda,

¹⁷ kala pāngmon china Prohowui mangāli apāng mareng eina chumkhuilaga mairārwui mangāli shini shida kasirrorra.

¹⁸ Kala ana kazip khavai kachonshimli Prohowui mangāli khalei hanphutwui angachibing chili ashee neora; ashee katai chi kazip khavai kachonshim khāmongpheili khalei rikkatā kachigatwui hanphutpheili heirorra.

¹⁹ Kala chiwui athao saikora ana chiwui eina khuilaga, hanphuttungli riktāra.

²⁰ Hithāda ana suihamchigatli kasā thāda pāngmon china mukkā chila chigatra, hithāda pāngmon china athumwui vang pheomi khavai pha̱phayāmida athumli pheomira.

²¹ Kala ana seingun chi rāmrahwui ayarli khuishokra, kala ana mukkā khare rikkatā tākam eina riktāra, hi yarui ashangva̱wui vang suihamchigat kasāna.

²² Ngalei khamunga akhana matheila morei sahaida, awui Proho Varena masālu kaji ot akha sāhaida yonhaiakha,

²³ ana khayon sākahai chi ali theingasak kahai tharan, ana awui suihamchigatwui vang achuk kapei mevā akha khuirāra,

²⁴ kala mekuitungli awui pāng parda rikkatā kachigatwui hanphutpam chili Prohowui mangāli taithatra, hi suihamchigatna.

²⁵ Chieina suihamchigat kasā chiwui ashee pāngmonna ngakaida khuida pāngmareng eina chumkhuilaga rikkatā kachigatwui hanphutwui angachibing chili neomira, kala ashee katai saikora chi rikkatā kachigatwui hanphutpheili heirorra.

²⁶ Kala chiwui athao saikora ningyatchigat kapha̱ thāda hanphutli riktāserra; chithāda sāda awui moreiwui vāng pāngmon china pheomi khavai sāra, kala ali pheomihaora.

²⁷ Kachikathā icha-chama mi akhana Prohona masālu da hāngkahai chi matheimada sayonhaiakha,

²⁸ ana khayon sākahai chi ali theingasak kahai tharan, ana awui suihamchigatwui vang achuk kapei melā akha khuirāra.

²⁹ Kala ana suihamchigat sākhavai chiwui kuitungli awui pāng parda rikkatā kachigatwui hanphutpamli taithatra.

³⁰ Kala pāngmonna ashee ngayarda khuida pāngmareng eina chumkhuilaga rikkatā kachigatwui hanphutwui, angachibing chili neomira, kala ashee katai saikora chi hanphutpheili heirorra.

³¹ Kala chi ningyatchigatwui thāda athao saikora khuilaga, Proholi ningyangkhaungwui nganamkaphā otwui vang pāngmonna riktāra; kala pāngmon china moreiwui vang pheomi khavai sāra, kala ali pheomihaora.

³² Suiham chigatwui vang achuk kapei yaonao akha khuiraakha, ana achuk kapei avā akhala khuirāra,

³³ kala ana suihamchigat sākhavai chiwui akuitungli awui pāng parda rikkatā kachigatwui hanphutpamli taithatra.

³⁴ Kala pāngmonna ashee ngayarda khuida pāngmareng eina chumkhuilaga rikkatā kachigatwui hanphutwui, angachibing chili neomira, kala ashee katai saikora chi hanphutpheili heirorra.

³⁵ Kala chiwui ningyatchigatwui thāda athao saikora khuilaga, kala pāngmonna Proholi rikkatā kachigatwui hanphutli riktāra; kala pāngmon china moreiwui vang pheomi khavai sāra, kala ali pheomihaora.