PĀNGMONSHI 3 - Kathara Bible (BSI)

Ningyatchigat

¹ “Proholi kachigat chi ningyatchigatakha, kachigat chi seishangwui eina sā chi avā nilala lah alāni nilala, achuk kapei chigatra.

² Kala apāng seikuili parda kazip khavai kachonshimwui khāmongli taithatra, kala Aaronwui naomayara pāngmonbingna ashee chi hanphutpam kuimareida ikrorra.

³ Kala Proholi mei eina rikkatā ningyatshar kachigat pha̱kaphayā chi eina, ana akharili romkashān athao kala akhariwui athao saikora chi chigatra,

⁴ kala amakei khanili kharoma ahanthao kala amathinli khangathānbing ana amakei eina ngarumda khuithuihaora.

⁵ Chiwui thili Aaronwui naomayarabingna rikkatā kachigat hanphutwui meili, semkahai thingtung chili riktāra; hi mei eina rikkatā kachigat, kala hi Proholi ningyangkhaungwui nganamkaphā otna.

⁶ “Kalikhada awui kachigat chi ningyatshar kachigatwui pha̱kaphayākha, ana yaoshangwui eina kachigat sāyur chi, avā nilala lah alā nilala, ana achuk kapei Prohowui mangāli chigatra.

⁷ Kalikha ana awui kachigatwui vang yaonao chigatakha, chi ana Prohowui mangāli chigatra,

⁸ ana pha̱ki kajiwui kuitungli apāng parda kazip khavai kachonshimwui mangāli taithatra; kala Aaronwui naomayarabingna hanphut kuimareida ashee ikrorra.

⁹ Chieina ningyatchigat mei eina rikkatā Proholi pha̱phayākha, ana chiwui athao, ameikong katatkhuilaga, akharili kharom athao, kala akharili kakā athao saikora,

¹⁰ kala amakei khani kala chili khangathān athao, amathinli khangathān athao, amakei eina laishokrumlaga chigatra.

¹¹ Kala chi kashakazā sāda, pāngmonna Proholi mei eina hanphuttungli chigatra.

¹² “Awui kachigat chi meakha, Prohowui mangāli chigatra,

¹³ kala awui pāng me kuili parda kazip khavai kachonshimwui mangāli taithatra; kala Aaronwui naomayarabingna ashee chi hanphut kuimareida ikrorra.

¹⁴ Chiwui eina ana Proholi mei eina riktāda akharili kharom kala akharili kakā athao saikora chigatra,

¹⁵ kala amakei khanili kharoma ahanthao kala amathinli khangathānbing ana amakei eina ngarumda khuithuihaora.

¹⁶ Kala chi ningyangkhaungwui nganamkaphā mei eina rikkatā kashakazā kachigat sāda pāngmonbingna hanphutungli riktāra. Athao saikora Prohowuina.

¹⁷ Nathumwui somkapam apam saikorali, nathum athao nilala ashee nilala mashaipaimana, hi nathumwui naothot kachida katang makhavai shiyan-chikan sāra.”