PĀNGMONSHI 27 - Kathara Bible (BSI)

Proho li Lemmet khamiwui Ain

¹ Prohona Mosesli hānga,

² “Israelnaobingli hānglu, mi akhana Proholi mibingwui khamataiya khangashit kasā chitharan, mibingna chi nawui lupāchāk athishurda,

³ mayarnao kum maga̱ eina thuilaga hangtharuk eina tangda, kathara shimwui shekel athishurda lupāsā hangphangāra.

⁴ Kha mipa chi sha̱naoakha nawui lupāchākli shekel thumra jira.

⁵ Kha mipa chi kum phangāwui eina maga̱ ngachaiwui mayarnaoakha shekel maga̱, kala sha̱naoli shekel tharā jira.

⁶ Kha mipa chi kachāngkha eina thuilaga kum phangāwui alungli khaleiakha, mayarnaoli shekel lupāsā phangā, kala sha̱naoli shekel lupāsā kathum jira.

⁷ Kala mipa chi kum hangtharuk kākahaiya kala lāngkahaiya mayarnaoakha, shekel lupāsā tharāda phangā, kala sha̱naoli shekel lupāsā tharāra.

⁸ “Kala mi akhana chāmnāhaida lupāchāk chi mashokthukakha, ana khangashit khuikhame pāngmonwuili khuivāda awui mikashap chi ali retmira.

⁹ “Mi kachikathāna Proholi sāyur chigatakha Proholi khami saikora chi tharsera.

¹⁰ Khangatei mahut mashinpaimara, lah kaphāwui vang makaphā, lah makaphāwui vang kaphā mangatha̱paimana; sā akhawui eina sā akha ngatha̱akha, khanini chi tharra.

¹¹ Kala Proholi machigatkapai makathar saakha, mipa china sā chi pāngmonwui ngalemli khuivāra;

¹² kala shilala phālala chiwui athishurda pāngmon china lupāchāk sāmira, ana lupāchāk sākhami chieina vaira.

¹³ Kha akhavāna ngatangkhuingaisaakha aman chiwui akhum phangāwui akha lāngsangmira.

¹⁴ “Mi akhana awui shim Prohowui mangāli tharngasakngaida dharkatmiakha kashi-kaphā athishurda pāngmon china aman ngachākmira, kala chiwui athishurra.

¹⁵ Kala shim dharkat kasā a china ngatangkhuingaiakha, aman chiwuitungli sharuk phangāwui akha lupā eina sangmilaga awui sāpaira.

¹⁶ “Mi akhana awui shimluikhotwui eina kachikathā ngalei Proholi dharchikatngaiakha, nawui khangachāk chi heiunwui athishurda chākra; mā, chumranao, khuiakha shekel hangphangā khuira.

¹⁷ Kha ana lui chi jubilee kum chigatakha, luiman chi peichaoda chākkhuira;

¹⁸ kha jubileewui thili ana chigatakha, pāngmon china khanao jubilee kum kayākha vatkhala kaji pākhuilaga pāngmonna chiwui aman eina katathaora.

¹⁹ Kala lui dharkat kasāpana ngatangkhuingaiakha ana aman chiwui sharuk phangāwui akha lāngsangmida lui chi awui sāpapamra.

²⁰ Kha ana lui chi mangatangkhuingaiakha, lah ana mi katei akhali yorsanghaiakha, mangatangkhuiluipaimara.

²¹ Kha jubilee kumli thāda hankhami chitharan Prohowui mangāli thara, kaja chi chigatchao kahai sathuihaoda, chi pāngmonwui ngasathuihaora.

²² “Kha ana awui shimluikat makhaninga, ana lokakhui lui Proholi dharkachigat leiakha,

²³ jubilee kum pālaga pāngmon china luiman ngachākmira, kala Prohowui mingli kathara otna da mipa china chithang aman shānkāngalangra.

²⁴ Jubilee kum lui chi khayorapali, kaja shimluikat eina thuilaga yorkashokapa chili hanmira.

²⁵ “Aman khangachāk saikora kathara shimwui shekelchākwui athishurda zatra.

²⁶ “Kha sha̱kei anao pharākhare chi Prohowui sāthuihaoda khipānakha matharchigatpaimana, seiranu, yaoranu, chi Prohowuina.

²⁷ Kha makathar saakha, leihchāk athishurda khalatta lolaga chiwui sharuk phangāwui akha sangnarra; lah chi mangatangkhuingaiakha nawui sākahai aman chieina yorhaora.

²⁸ “Kha Proholi tharchigatchao kahai chi miranu, sāranu, shimluikatranu, khipānakha mayorpaimana; chigatchao kahai chi Prohowui mangāli tharmathengmeikap kajina.

²⁹ Shiman ngasak khavai horsang kahai mi chi khipānakha mangatangkhuipaimana; ali shaothatphalungra,

³⁰ “Ngalei chiwui tithe saikora, heiun kashokranu, atheirongli kashokranu, Prohowui serra; Prohowui mangāli chi thara.

³¹ Kachikathāna awui tithe chi ngatangkhuingaiakha sharuk phangāwui akha sangminarra.

³² Kala seiwui titheranu, yaowui titheranu, kahomana shānlaga katharā saikora Prohowui mangāli tharsera.

³³ Kashiranu, kaphāranu ana mangathingpaimana, khangatha̱la mangatha̱khuipaimana; ngatha̱saakha khanini chi tharthathuiya; kala chi mangatangkuipaimara.”

³⁴ Sinai Kaphungli Israel mibingwui vang Prohona Mosesli kaso kahai ningkhamibing chi hina.