PĀNGMONSHI 25 - Kathara Bible (BSI)

Kashine Kum

¹ Prohona Mosesli Sinai Kaphungli hānga,

² “Israelwui mibingli hānglu, ina nathumli khami ngalei chili vākashung tharan, Prohowui mangāli ngalei china sabbath mayonki kajina.

³ Kum tharuk nathumna lui vāsangra, kum tharuk yāmgui drakhārong aphāng katatmida athei kazipkhuira;

⁴ kha kashine kum ngalei chili chingri ngasāmkakhuiwui sabbath sāra, Prohowui sabbathna; nathum lui mavāsangalu, drakhā yāmguila masāmathaalu.

⁵ Nathumwui luili thāda kharkashoka mā chi mahātpaimana, kala makatatkhami drakhārongwui eina kashok atheila maphāpaimana, kaja ngalei chiwui vanga chingri eina ngasāmkakhui kumna.

⁶ Ngalei chiwui sabbathna nathumli kashakazā ngarānmira, nathumwui vangla, rao sha̱nao eina mayarnaowui vangla, ngalang kapheibingwui vangla, kala nathumli ngasokharā kha̱mibingwui vangla;

⁷ nawui sha̱keiwui vangla, ngalei chiwui sāyur saikorawui vangla, ngalei chili kashokshok saikora kashakazāsera.

Runkakā Atam

⁸ “Kala nathumwui langchin chi kum shinini eina shini shida shānkhuida langchin shini chiwui atam zingkum hangmatida chikora.

⁹ Chieina nathumna kachāng kashinewui katharāthang nathumna talla̱ kuimareida khongvālu; pheomithang nathumwui ngalei saikorali vāshungda talla̱khongvāra.

¹⁰ Kala hangkaphangā kum nathumna tharngasakta ngalei hupva̱li khaleibing chili thāda chihokhami chishātlu. Jubilee hi nathumwui vangna; nathum ava̱va̱na awui shimlui hanmira, kala nathum ava̱va̱na awui shimli latkhaung samphangra.

¹¹ Hangkaphangā kum jubileena, chi nathumwui vangna; chikum luili athei-arai mayaolu kala akhalatta kashok chila mahātkhuilu, lah makatatkhami drakhārongwui eina maphāshailu.

¹² Kaja hi jubileena; nathumwui mangāli hi katharana; luiwukli kashok chi nathumna zāra.

¹³ “Jubileewui kum hili mi kachiva̱na awui shimlui hanmingaroklu.

¹⁴ Kala nana khongnainaoli khayor nilala, khalo nilala, akha eina akha khalāng ot masāpaimana.

¹⁵ Jubileewui thili atam kasha̱-kasāng athishurda nana khongnaiwui eina lokhuira, kala atam kasha̱-kasāng athishurda māwui vang ana nali yorsangra.

¹⁶ Zingkum sāngakha aman chungmeida mira, kala zingkum sha̱meiakha teomeida mira, kaja yorkasang chi kumkumwui heiunli khayangna.

¹⁷ Nathum akha eina akha khalāng ot masāngarokalu, kha nawui Vareli ngacheelu; kaja I Proho nathumwui Varena.

¹⁸ “Chiwui vang eina iwui shiyan-chikan saikora sāra, kala iwui kagaso mayonlu kala chi nganālu; chieina apam chili nathum ning tāphup eina okthuira.

¹⁹ ngalei chiwui athei-arai matheira, nathumna zākashap chi zākhuira kala chili ningtāphup eina somra.”

²⁰ Kala ithumna athei-arai mayao, lah heiun makazipsangakha kashine kum ithum khi zaura? da nathumna hāngra.

²¹ Ina katharuka kum nathumli sokhami mira, chithāda zingkum kathumwui vāng heiun ungngasakra.

²² Nathumna kachishata kum athā khayao chitharan mācham zāsāra; kachiko kum eina tangda heiun khaung chitharanla mācham zāsāra.

²³ Ngalei chi yorchang masāpaimara, khikhalajila chi iwui ngaleina, kaja nathum kha̱mina, ili ngasokharāna.

²⁴ Kala nathumna kakhui lam saikorawui alungli nathumna ngatangkhui khavai ngalei miphalungra.

²⁵ Nachinā akhana chāmhaida awui ot ngakaida yorshokhaiakha yorkahai ot chi awui nganaimeikap kaje china ngatangkhuiphalungra.

²⁶ Kachikathāna ngatangmi khavai maleiakha, kala akhalatta ringpaihaida ngatangkhuishapakha,

²⁷ kum karankhahairakhala kaji shānlaga mikharān chi ot khalopa chili aman henda shānmiranu, chithada awui lui chi khalopa china hanmiluira.

²⁸ Kha ngatangkhui khavai aman maleiakha, yorsang kahaipa chiwui pāngli jubilee kum marāranglakha eina tangda haisāra, jubilee zingkum thāda hanmida awui lui chi samphangluira.

²⁹ Mi akhana keinungwui ngaveilungli sākahai shim yorhaiakha yorkum chiwui alungli ngatangkhuipai; kaja ngatangkhui khavai kumkha awui mashun lei.

³⁰ Kumkhawui alungli mangatangkhuirarakha keinungwui ngaveilungli sākahai shim chi khalopawui sāchanghaora; thot peida awui sāra, jubilee kumlila mahanmipaimara.

³¹ Kha ngavei makhalei kha̱wui shimbing chiya lui khayor eina ngaraichada sāra; chibing chiya ngatangkhuipai, kala jubileelili hanmira.

³² Chithālala Levibingwui keinungli athumwui shimlui khalei chi atam kachida ngatangkhuipai.

³³ Kala kachikathā Levinaobingwui mi akhana keinunglungli khalei awui shim yorkahai chi mangatangkhuisalala, jubileeliwui thāda hanmira, kaja Israelwui ngachaili Leviwui keinungli shim khalei saikora athumwuina.

³⁴ Kha Levi keinungwui yaruiwui luiva mayorpaimana, kaja chiya athumwui ngasāchingra.

³⁵ Nachinā akha chāmnāhaida maokthuitheiakha, kha̱mi ngasokazat thāda nana ali nganaokhuira.

³⁶ Awui eina atar nilala, henkakhui nilala makhuipaimara; kha nawui Vareli ngacheelu, kaja nachināna nali okthuirumpai khavaina.

³⁷ Atarwui vang ali lupā machishutpaimana kala ali kashakazā khami chi nawui tongza khavaiwui vang eina mamipaimana.

³⁸ Canaan ngalei mikida kala nathumwui Vare sākhavai Egypt ngaleiwui eina thānkashoka nathumwui Proho Vare chi ina.

Raonao Kachiho

³⁹ Kala okthuirumda khalei nachināna chāmhaida akhalatta yorsanglala, raonao thāda mashichinpaimara;

⁴⁰ langkaphei mi thāda kala nali ngasokazat kha̱mi thāda nali ngasopamra. Jubilee kum marāranglakha eina tangda nali otram ngatha̱ra;

⁴¹ chiwui thili nawui eina thuihaora, ala, anaongarāla shimli latungda awui avāva̱ ngarāwui shimlui chi ungkhuira.

⁴² khikhalajila athum iwui raosera, Egypt ngaleiwui eina ina thānkashokna, athumli raonao sākhavai mayorpaimara.

⁴³ Nathumna athumli zakshilāk eina mamungpaimara, kha nawui Vareli ngacheelu.

⁴⁴ Nathumwui rao sha̱nao kala mayarnao rao sākhavai haipai; nathumwui ngalemli khalei yur khangateiwui eina rao sha̱nao kala mayarnao lokhuipai.

⁴⁵ Nathumli ngasokharā kha̱mibing kala athum shimkhurwui eina nathum ngaleili pharākasangbing chila nathumna lopai; kala athum chi nathumwui sāchao ngasakpai.

⁴⁶ Nathumwui thili athumli nanao mayarabingli haimi maronpai. Athumli raonao sāngasakpai, kha Israelnao nachinā ngarāwuitungli akhana akhali sāshilak eina mamungpaimana.

⁴⁷ Nachinā akha chāmhaoda kha̱mi nilala, ngasokharā mi nilala, ngasokapama kashānga akhali nilala a khalatta yorsanghaiakha,

⁴⁸ yorkahaiwui thili agato akhana ali ngatangkhuipai;

⁴⁹ avāgatona nilala, achināna nilala ngatangkhuipai, lah shimkhurwui khanganai akhana ngatangkhuipai; lah a shāngluishitta ngatangshapakha akhalatta ngatangkhuipai.

⁵⁰ Yorkasang atam eina thuilaga jubilee eina tangda shānkhuilaga khangatangman chākkhuira; akhavāwui shimli kapam atam chi langkapheiwui ngalangman eina pāra.

⁵¹ Zingkum kasāngkha vātsaakha chiwui athishurda ali ngatangkakhuiman mira.

⁵² Kha jubilee sākida zingkum kateokhamāng vātsaakha awui otram ngathami kahai chi hāngsanghailaga runkapai runda ngatangkhuira.

⁵³ Kum kum ngalang phākasang thāda ali ngasopamra; nathumwui miktāli zakshilāk eina mamungpaimana.

⁵⁴ Kala ali hithāda mangatangkhuirarakha ala, anaongarāla, jubileewui kumli thāda chihohaora.

⁵⁵ Kaja Israelnaobing iwui rao sakhavaina, iwui rao sākhavai athumli Egypt ngaleiwui eina ina thānkashokna: I Proho nathumwui Varena.