PĀNGMONSHI 23 - Kathara Bible (BSI)

Phanit-phanao

¹ Prohona Mosesli hānga,

² “Israel mibingli hānglu, Prohowui zātkhān langchin kahai kathara kazip khangarum atamna da nana chishātki kaji zātkhān phanitbing chi hina.

³ Tharukthang ot sāra, kha kashinethang chingri vari eina ngasāmkakhui sabbathna, kathara kazip khangarum zimikshona; chithang ot masāpaimana; hi nathumwui kapampam kachida Prohowui mangāli sabbathna.

⁴ “Prohowui langchinbing, kathara kazip khangarum, atam atamli nathumna sāki kaji chi hina.

Makānkhami eina Khawok Makazang Khamui

⁵ “Kachāng kharewui tharāda khamatethang ngazin, Prohowui makānkhami phanitna.

⁶ Kala chikachāngwui tharāda kaphangāthang Prohowui mingli khawok makazang khamui phanitna; nathumna shinithang khawok makazang khamui shaira.

⁷ Kharethang nathum kathara kazip khuingarumra; nathum shairanra̱ kashok ot masāpaimara.

⁸ Kha nathumna Prohowui vang rikkatā kachigat shinithang sāra; kashinethang kathara kazip khangarum khuira; nathum shairanra̱ kashok ot masāpaimara.”

⁹ Kala Prohona Mosesli hānga,

¹⁰ “Israelnaobingli hānglu, ina nathumli khami ram chili vāda mā hātlaga heiun khuikhaung chitharan, matheikhare hātkakhui māmazān chi pāngmonli khuiungmilu;

¹¹ kala ana māmazān chi Prohowui mangāli khayitra, chithāda nathumna khuisangkhami samphangpaira; akhama kathā sabbathwui thili pāngmon china khayitchigatmira.

¹² Kala māmazān chi khayitchigatthang, nana kumkhawui yaovānao achuk kapei akha rikkatā kachigatwui vang Proholi pha̱ra.

¹³ Kala chili ngasoda tharāzāt kachigatwui vāng, thao khamanāt manaktak kahai mathir khuilui khum tharāwui khum khani zangda Proho mangāli meili riktāra, chi ningyāngkhaung nganamkaphā otna; kala hieina ngasoda ra̱shakchigat drakhāra̱, lengkhor akhawui akhum mati zangra.

¹⁴ Kala nathum Vareli kachigat zimiksho marāranglakha eina tangda athei-arairanu, khamuiranu, khanganao nilala, khangui katheng nilala mashaipaimana: hi nathumwui kapampam saikorali thot kachida mashimānla ngarangki kaji ningkhamina.

Dharreo Phanit

¹⁵ “Kala nathumwui māmazān khayitkachigat, sabbath zimikshowui akhama kathā eina shānphoklaga hāpta shini pongda leira;

¹⁶ akhama eina shānphokta zimiksho hangphangā, sabbath kashinewui thili nathumna māmazān kadharwui tharāzāt kachigat Proholi pha̱ra.

¹⁷ Nathumna shimwui eina khuilui khum tharāwui khum khani eina kasā khamui khani khayitchigat pha̱khavai khuirāra; khamui chi khamanak mathir eina khawok zanglaga khare athei-arai sāda Proholi chigatra.

¹⁸ Kala khamui chili ngasoda achuk kapei, kumkhawui yaonao shini, mukkānao akha, yaovā khani khuirāra; chibing chi Proholi rikkatā kachigat sāra, kala chiwui tharāzātchigat kala ra̱shak-shirei eina ngasoda mei eina riktāda Proholi ningyāngkhaung nganamkaphā chigatra.

¹⁹ Kala nathumna suihamchigatwui vang mevā akha, kala ningyatchigat hanphutwui vang kumkhawui yaovānao khani da chigatra.

²⁰ Kala khare athei-araiwui khamui eina ngasoda yao khani chi pāngmona khayitta Proholi khayitchigat sāra; Prohowui mangāli otbing chi kathara pāngmonwui vang kachigatna.

²¹ Kala chithang nathumna yaruili kachishāt sāra; kathara kazip khuirumra; nathum shairanra̱ kashok ot masāpaimara. Hi thothot vāshungda nathumna kasompam saikorali mayonki kaji shiyan-chikanna.

Kumdhar Phanit

²² “Kala nathumna nathumwui luili mā kahāt tharan luipheili khalei chi mahātsangserlu, māhātwui thili māthamla maphālu, chi kachāmnaowui kala kha̱miwui vang taimilu. I Proho nathumwui Varena.”

²³ Kala Prohona Mosesli hānga,

²⁴ “Israelnaoli hānglu, kachāng kashinewui kharethang, chingri vari eina ngasamkhuida phanit chi mayonra, chi talla̱khon eina phaningkhaunga kachishāt kathara kazip khangarumna.

²⁵ Nathum shairanra̱ kashok ot masāpaimara; kala nathumna Prohowui mingli mei eina rikkatā kachigat sāra.”

Pheokhamiwui Zimiksho

²⁶ Kala Prohona Mosesli hānga,

²⁷ “Kachāng kashinewui katharāthang pheokhamiwui zimikshona; hi nathumwui kathara kazipkhangarum atamna, nathum khalatta ngarinda mei eina rikkatā Proholi chigatra.

²⁸ Kala chithang nathum ot masāpaimana; kaja chithang pheokhami zimikshona, Proho nathumwui Varewui mangāli pheomira,

²⁹ kachikathāna chithang mangarinakha mi chili awui miyurwui eina katathaora.

³⁰ Kala kachikathāna chithang ot saakha kasapāli awui miyurwui eina ina shimān ngasakra.

³¹ Nathum ot masāpaimana: nathum kasompam saikorali, thot-thot vāshungda katang makhavaiwui shiyan-chikanna.

³² Hi nathumwui vang chingri vari eina ngasāmkakhui sabbathna, nathum khalatta ngarinphalungra; kachāng chiwui kachikothang ngazin, ngazin eina thuilaga ngazin vāshungda nathumna sabbath mayonra.”

³³ Kala Prohona Mosesli hānga,

³⁴ “Israelnaobingli hānglu, kachāng kashinewui tharāda kaphangāthang, kala shinithangwui vang Proholi chumpha̱ phanit mayonra.

³⁵ Kharethang kathara kazip khangarum zimikshona; nathum shairanra̱ kashok ot masāpaimara.

³⁶ Shinithang mei eina riktāda Proholi chigatra; kachishatathang kathara kazip khangarum khuida mei eina riktālaga Proholi chigatra; hi chingri kahai kakazipna; nathum shairanra̱ kashok ot masāpaimana.

³⁷ “Zimiksho kachiva̱wui athishurda ra̱shakshirei, rikkatā kachigat, kala tharāzātchigat Proholi khuirāda mei eina rikkatā khuirami khavai hiwui kathara kazip khangarum atam Prohowui langchin phanitbing hi nana chishātmira;

³⁸ kachigat yurbing hi Prohowui sabbathbing, kala nathumna khangashitwui kachigat, lemmet kachigat, Proholi khami yur saikora, hili lāngda kachigat china.

³⁹ “Kachāng kashinewui tharāda kaphangāthang, ngalei chiwui kashokshok kazipkhuiserhailaga, Prohowui zātkhān hi shinithang mayonki kajina; kharethang chingri vari eina pamkhuira, kala kachishata thangla chingri vari eina pamkhuira.

⁴⁰ Kharethang atheirong khamathāwui athei, khaneirong kala pompa̱ta̱ kahai thingphāng, lah kongli khalei chihir singda Prohowui mangāli shinithang mathānra.

⁴¹ Kum kachida Prohowui zātkhān sāda shinithang mayonchingra; nathumwui thot-thot vāshungda katang mavaila shiyan-chikan hi mayonra, hi kashine kachāngli mayonra.

⁴² Nathum shinithang rāmrahli apamra; kala Israel luinganaibing saikora rāmrah sāpamra,

⁴³ kaja Egypt ngaleiwui eina ina Israelnaobingli thānkashok tharan athumna rāmrahli sompamsai kaji naothotbingna theikhui khavaina. I Proho nathumwui Varena.”

⁴⁴ Chithāda sāda Mosesna Prohowui langchin zātkhānwui pongli Israelnaobingli hāngchithei.