PĀNGMONSHI 2 - Kathara Bible (BSI)

Mā Kachigat

¹ Proholi tharāzāt kachigat tharan, awui kachigat chi manaktak kahai mathirli thao heisanglaga frankincense manātra,

² kala Aaronwui naomayara pāngmonbingli khuirāmira. Kala ana khamanaka mathir homkha kala thao eina frankincense saikora khuilaga chi pāngmonna riktāra, kala phaningung khavai sāda meili rikkatā hanphutungli pha̱ra; hi Proholi ningyangkhaungwui nganamkaphā otna.

³ Kala tharāzat kachigatwui katai chi Aaron eina anaomayarabingwui yar sāra; hi mei eina rikkatā tharmathengmeikap kaji Proholi kachigatna.

⁴ Nathumna tharāzāt khamui ngānlaga chigat khavai khuikharā tharan, mathir nailaga thao makhamanāt, khawok makazang manaktak kahai mathir, lah khawok makazang katheng khamui thao eina pahangkakhui chi khuirāra.

⁵ Kalikhada nathumwui tharāzāt kachigat khamui chi khāngtungli ngānkhuiakha, khawok makazang manaktak kahai mathir chi thao eina manātra;

⁶ khamui chi akaikai eina sākhaira, kala chili thao heirorra, chi tharāzāt kachigatna.

⁷ Kala kalikhada nathumwui tharāzāt chi hamli kahanga khamuiakha, manaktak kahai mathir eina thao manātra.

⁸ Kala nana tharāzāt kachigat hikathā sākakhui otbing hi nathumna Proholi khuirāda pāngmonli khami tharan, ana chi hanphuttungli khuikāra.

⁹ Kala pāngmon china tharāzāt kachigat chiwui eina phaningung khavaiwui khamui sharuk chi khuihailaga chi Proholi ningyangkhaungwui nganamkaphā mei eina chigatra.

¹⁰ Kala tharāzāt kachigatwui katai saikora Aaron eina anaomayarabingwui yarna, hi Proholi mei eina rikkatā kachigatwui tharmathengmeikap kaji sharuk akhana.

¹¹ Proholi nana kachigat khuikharā tharāzāt chili khawok mazangpaimana, kaja Proholi kachigat mei eina rikkatāli khawok nilala, khuira̱ nilala mariktāpaimana.

¹² Kachigat sāda athei-arai khuishaikhare chi Proholi khuirāpai, kha ningyāngkhaunga nganamkaphā sāda hanphutli mariktāpaimana.

¹³ Nathumna kapha̱ ot saikora chi machi sanglaga mathāphaira; nathumna Vareli tuingashit kasāwui machi chi tharāzāt kachigatli mavātpaimana; kachigat saikorali machi sangserra.

¹⁴ Nathumna samphangkharewui tharāzāt Proholi chigatakha, samphangkhare tharāzātwui māmazan eina reokhuikhare kadhara chi meili sharlaga māngatai eina chigatlu.

¹⁵ Kala nathumna chiwuitungli thao sanglaga frankincense ikrorlu; hi tharāzāt kachigatna.

¹⁶ Chieina phaningung khavai māngatai ngayarda khuilaga chi pāngmonna thao kala frankincense saikora chi riktāra; hi mei eina rikkatā Proholi kachigatna.