PĀNGMONSHI 18 - Kathara Bible (BSI)

Phasā Mangasokapaibing

¹ Kala Prohona Mosesli hānga,

² Israelnaobingli hānglu, I Proho nathumwui Varena.

³ Nathumna pamkasā Egypt ngaleiwui mibingna kasā thāda masāpaimara, kala ina nathumli thānzangki kaji Canaan ngaleiwui mibingna kasā chithāda masāpaimara, nathum athumwui shiyan mashurpaimara.

⁴ Nathumna iwui kagaso eina shiyan-chikan mayonda chiwui athishurda zatra. I Proho nathumwui Varena.

⁵ Chiwui vang eina nathumna iwui shiyan-chikan kala kagaso mayonki kajina, chi khamayon mi china ringra: I Prohona.

⁶ Nganailak kahai athei-asāli mangasopipaimana, I Proho china.

⁷ Nashavāwui khayā malānpaimana, chi nava̱wui khayāna; a nava̱na, nana awui khayā malānpaimana.

⁸ Navā preiva̱wui khayā malānpaimana, chi navāwui khayāna.

⁹ Navāwui nilala kala nava̱wui naongalāva̱ nilala, shimli pharākasangala, ayar ngaleili kapharā nilala nazarva̱wui khayā malānpaimana.

¹⁰ Nanaomayarawui naongalāva̱ nilala, lah nanao ngalāva̱wui naongalāva̱ nilala nana athumwui khayā malānpaimana, kaja athumwui khayā chi nakhalattawui khayāna.

¹¹ Navā preiva̱wui naongalāva̱wui khayā malānpaimana, navāna samphangkakhuia naongalāva̱ ngasāhaoda chi nazarva̱na.

¹² Navāwui azarva̱wui khayā malānpaimana, kaja navāli nganailak kahai theisāna.

¹³ Nava̱wui agatuiva̱wui khayā malānpaimana, chi nava̱li nganailak kahai theisāna.

¹⁴ Nana navāwui achināwui khayā malānpaimana, nana apreiva̱li masuipaimana; a nava̱gatuina.

¹⁵ Nana narihāva̱wui khayā malānpaimana; a nanaomayarawui preiva̱na, awui khayā nana malānpaimara.

¹⁶ Nana nagato preiva̱wui khayā malānpaimana, a nagatowui khayāna.

¹⁷ Nana preinao akha eina anaongalāva̱wui khayā malānpaimana, kala nana awui naomayarawui naongalāva̱ nilala anaongalāva̱wui naongalāva̱li nilala khayā malānpaimana; chi makhayā otna.

¹⁸ Kala nana napreiva̱wui agatuiva̱li ngalengda makhuipaimana, kaja napreiva̱̱ ringlakha eina tangda awui khayā malānpaimana.

¹⁹ “Shanrāt zatta khalei sha̱naoli awui khayā lānkhavai nana masuipaimana.

²⁰ Kala nakhalatta masākhamāng khavai nakhongnai preiva̱li mangasopipaimana.

²¹ Molechli pha̱khavai nanaongarāli meilungli horsangda mamipaimana; chi nawui Varewui ming makhao ngasak khavaina, I Prohona.

²² Sha̱naoli ngasokapi thāda mayarnaoli mangasopipaimana; hi ningkakachai otna.

²³ Kala nathumna sāyurli ngasopida nathum khalatta masākhamāngpaimana, kala sha̱naona sāyurli mapimipaimana: hi mashokhangachei otna.

²⁴ Hikatha otsak eina nathum khalatta masākhamānglu, hikathā otwui vang nathum marāranglakha rida ina yur kachungkhali kasham kahaina.

²⁵ Kaja ngaleila sākhamānghaoda, khayon chiwui vang ina tandi mi, kala ngalei china chili khaleibingli maloshokhaowa.

²⁶ Kha nathumna iwui shiyan-chikan eina kagaso mayonda hikathā ningkakachai otbing hi masālaklu, nathum nilala, nathumli kha̱mi ngasokharābing nilala,

²⁷ (kaja nathumwui mangāli mibingna hikathā ningkakachai otbing hi kasāwui vang ngalei katonga sākhamānghaira);

²⁸ nathumna sākakhamāng tharan, nathumwui mangāli maloshok kahai thāda nathumlila maloshokhaipaishina.

²⁹ Kaja kachikathāna hikathā ningkakachai otbing hi saakha, kasā mibing chili athum miyur ngachaiwui eina katathaora.

³⁰ “Chieina ina hāngkahai hi haichingda nathumwui mangāli sākasā thāda hikathā ningkachaikapai ot eina nathum khalatta masākhamāng ngasakluilu: I Proho nathumwui Varena.”