PĀNGMONSHI 17 - Kathara Bible (BSI)

Asheewui Kathar

¹ Kala Prohona Mosesli hānga,

² “Aaron eina anaomayarabing kala Israelnao saikorali, Hi Prohona kakasona da hānglu.

³ Kalikhada kachikathā Israelwui mi akhana kha̱lungli, lah ayarli sei nilala, yao nilala, me nilala taithatlaga,

⁴ kala kazip khavai kachonshim khāmongpheili Prohowui tabernacle mangāli Proholi lemmet khami chigat khavai makhuiraakha, mi chili asheewui khayon tāra; ana ashee tāngasakhaira; kala mipa chili awui miyurwui eina katathaora.

⁵ Chiwui vang eina Israelnaobingna ayarli sākathat chi Proholi pha̱khavai khuirāra; kaja kazip khavai kachonshim khāmongpheili pāngmonli khuirāmida Prohowui mangāli ningyatchigat pha̱paira;

⁶ kala kazip khavai kachonshimwui khāmongpheili Prohowui hanphutungli pāngmonna ashee yikrorra, kala Proholi nganamkaphā athao chi riktāra.

⁷ Chieina athumna khayorva̱wui otsak kasā khamathang-khamarangbingwui vang pha̱phayā khavai mataithatluimara. Hi athumwui thot katang mavaila mayonki kaji shiyanna.

⁸ “Kala nana athumli hāngra, Israel shimkhurwui kachikathā akhana, lah athumwui ngachaili kha̱mi ngasokharā akhana, rikkatāchigat, lah pha̱kaphayā chigatlaga,

⁹ chi Proholi chigat khavai kazip khavai kachonshim khāmongpheili makhuikharā mi chi awui miyurwui eina katathaora.

¹⁰ “Israel shimkhuranu, kha̱mi ngasokharāranu, athumwui ngachaili ashee kazāpa chili ina mamayāmara, kala ali awui miyurwui eina katathaora.

¹¹ Khikhalajila phasāwui ringkhavai chi asheeli lei, kala nathumwui manglā pheomi khavai ina chi hanphuttungli mikahaina, kaja kharing khaleiwui vang ashee eina morei pheomi kapaina.

¹² Chiwui vang Israelnaobingranu, nathum khipākha ashee mazāpaimara, nathumli kha̱mi ngasokharāranu, athum khipākhanala ashee mazāpaimara da ina hāngkahaina.

¹³ “Israelnaobingranu, kha̱mi ngasokharābingranu, kachikathāna shaikapai sā nilala, vānao nilala arengkhuiakha chiwui ashee shokngasakphalungra kala chi ngalei eina yatrorhaira.

¹⁴ Kharinga yur kachiva̱wui manglā awuili kazang ashee china; chiwui vang eina Israelnaobingli ina hānghaira, nathum kharinga yurwui ashee mazāpaimana, kaja kharingyurwui manglā asheeli lei; chi kazā mili katathaora.

¹⁵ “Kala Israelnaoranu, kha̱mi ngasokharāranu, thāda kathisā, kala khazursā kashai mi china awui kashankachonbing ngasa̱ra, kala tara̱ eina ra̱vaira, kala a ngazin eina tangda ngarangra, chiwui thili tharnaora.

¹⁶ Kha kashankachonbing mangasa̱, ra̱khavaila mara̱vaiakha khayon chi ana phungra.”