PĀNGMONSHI 15 - Kathara Bible (BSI)

phasāli Khangaphar Khalei

¹ Prohona Moses eina Aaronli hānga,

² “Israelnaobingli hānglu, kachikathā mi akhana phasāli zaizai khangaya̱ leiakha, awui khangaya̱ chi matharmana.

³ Kala hi awui zaizai khangaya̱wui makatharwui ainna: ngaya̱lala, thenghailala hi awuili makatharna.

⁴ Zaizai khangaya̱ mi china pikazanga pet kachiva̱ matharmana; kala ana pamkaza̱ kachiva̱ matharmana.

⁵ Kala awui petli sakaza̱ mi china kashankachon ngasa̱haida ra̱khavaila ra̱vaira, kala ngazin eina tangda ngarangra.

⁶ Kala zaizai khangaya̱ mina pamkahai kachiva̱ chili kapama mibing china awui kashankachon ngasa̱ra, kala tara̱ eina ra̱vaira, kala ngazin eina tangda ngarangra.

⁷ Kala khangaya̱pali sākaza̱ mi china kachon ngasa̱haida ra̱vaira kala ngazin eina tangda ngarangra.

⁸ Kala zaizai khangaya̱pa china kathara mili mashororhaiakha awui kashankachon ngasa̱ra kala tara̱ eina ra̱vaira, kala ngazin eina tangda ngarangra.

⁹ Kala zaizai khangaya̱pana katonga sāpān chi matharmara.

¹⁰ Kala awui azingli khalei ot kachiva̱li sakaza̱ mipa chi ngazin eina tangda ngarangra, kala chikathā ot phungkazat mi chi awui kashankachon ngasa̱ra, kala tara̱ eina ra̱vaira, kala ngazin eina tangda ngarangra.

¹¹ Zaizai khangaya̱ mina pāng mamazikla khangatei akhali saza̱akha chipana awui kashankachon ngasa̱ra, tara̱ eina ra̱vaira, kala ngazin eina tangda ngarangra.

¹² Kala zaizai khangaya̱ mina ngaleihamli saza̱haiakha chi sakhaihaora; kala thingkhongbingla tara̱li pheora.

¹³ “Kala kalikha zaizai khangaya̱ a chi phāhaiakha tharkhavai akhalatta shinithang tharkhavai ngaraira, kala awui kashankachon ngasa̱ra, kala ana aphasā longkazata tara̱li ra̱vaira, chieina tharhaora.

¹⁴ Kala kachishatathang ana kazip khavai kachonshimwui khāmongli Prohowui mangāli nāsha̱ maningakha kha̱na̱ khani pāngmonli khuirāmira.

¹⁵ Chieina pāngmon china suihamchigatwui vang kha̱na̱ akha, kala khangatei akhana rikkatā kachigatwui vang da chigatmira; kala Prohowui mangāli pāngmon china awui zaizai khangaya̱ chiwui vang pheomira.

¹⁶ “Kala mi akhana pha̱ra̱ unghaiakha phasā katonga ra̱vaira kala ngazin eina tangda ngarangra.

¹⁷ Kala sāri nilala, ahui nilala pha̱ra̱ tāror kahai saikora chi ngasa̱da ngazin eina tangda ngarangra.

¹⁸ Mayarnao akhana sha̱naoli ngasopilaga pha̱ra̱ unghaiakha ani ra̱vai thathuira kala ngazin eina tangda ngarangra.

¹⁹ “Sha̱naona shānrāt zatakha awui phasā shinithang matharmara, kala ali sākaza̱ mi chi ngazin eina tangda ngarangra.

²⁰ Kala phasā makathar atamli ana pikahai kachiva̱ matharmara; ana pamkahaibing chila matharmara.

²¹ Kala awui petli sākaza̱ mi chi awui kashankachon ngasa̱ra, kala tara̱li ra̱vaida ngazin eina tangda ngarangra.

²² kala sha̱nao china pamkahai kachiva̱li sākaza̱ mi chi awui kashankachon ngasa̱ra, kala tara̱ eina ra̱vaida ngazin eina tangda ngarangra;

²³ petliranu, khikhaliranu, sha̱nao china pamkahaibingli sakaza̱ saikora makhao kahaiwui vang ngazin eina tangda ngarangra.

²⁴ Kachikathā mi akhana sha̱nao chili ngasopida ngalāva̱wui khamakhao chi kāhaiakha, a shinithang matharmara, kala ana pikahai pet kachiva̱ matharmara.

²⁵ “Sha̱nao akhana awui shānrāt atam maningla sāngda ashee ngaya̱haiakha, lah khangachawuili lāngda ngaya̱haiakha, sha̱nrāt atamli makathar thāda matharchingmara, a matharmara.

²⁶ Ngaya̱da leilakha eina tangda ana pikhavai pet chi awui shānrāt atamwui makathar thāchingra; kala ana kapapam kachiva̱, awui shānrāt atam chithāda matharmara.

²⁷ Kala otbing chili sakaza̱ mi kachiva̱ matharmara, kala awui kashankachon ngasa̱ra, kala ra̱vaida ngazin eina tangda ngarangra.

²⁸ Kha awui khangaya̱ chi phāhaiakha, akhalattana shinithang chāklaga chiwui thili tharhaora.

²⁹ Kala kachishatathang kazip khavai kachonshimwui khāmongpheili kha̱na̱ khani maningakha nāsha̱nao khani, pāngmonli khuirāmira.

³⁰ Chieina pāngmon china akha suihamchigatwui vang, khangatei akhapāna rikkatā kachigatwui vang pha̱mida awui makathar khangaya̱ chi Prohowui mangāli pāngmon china pheomira.

³¹ “Chithāda sāda nathumna makatharwui eina Israelnaobing ngateida haira, chi maningakha athumwui makathar china athumwui ngachaili khalei iwui tabernacle chi makhao ngasakta athum thihaipaishina.”

³² Ain hi zaizai khangaya̱ kala pha̱ra̱ khaunga makhao kahai mibingwui vangna;

³³ kala shānrāt atamli makathar sha̱nao awui vangla, chiya, sha̱naoranu, mayarnaoranu khangaya̱ mila kala makathara sha̱naoli ngasokape chibingwui vangna.