PĀNGMONSHI 12 - Kathara Bible (BSI)

Naopharātwui Thili Tharkhangasak

¹ Prohona Mosesli hānga,

² “Israelnaobingli hānglu, sha̱naona nao vaida, mayarnao pharaakha a shinithang matharmara; kashankharā atamwui thada ava̱ chi makatharna.

³ Kala kachishatathang naowui ahui rimshokmira.

⁴ Chiwui thili ana ashee tharkhangasak thumrāda kathumthang zangra, kala kathara ot akhala masāza̱paimana, katharapamli khavāla mavāpaimana, awui tharkhangasakwui zimiksho chi maungshung ranglakha eina tangda ngarangra.

⁵ “Kha ana sha̱nao pharaakha, kashankharā atamwui thāda a hapta khani matharmara; kala ashee tharkhangasakwui zimiksho hangtharuk da tharukthang zangra.

⁶ “Mayarnao nilala, sha̱nao nilala awui tharkhangasak zimiksho chi peikahai tharan rikkatā kachigatwui vang kumkhawui yaonao akha, kala suihamchigatwui vang khana̱naolala, nasha̱naolala kazip khavai kachonshimwui khāmongli pāngmonwuili khuirāra.

⁷ Pāngmon china Prohowui mangāli chigatmira, preiva̱wui vang pheomi khavai chigatra, chieina awui ashee khalongwui eina ali tharngasakhaora. Hi mayarnao nilala, sha̱nao nilala kapharā preiva̱̱ chiwui vang ainna.

⁸ “Kha ana yaonao makhuirārarakha, kha̱na̱, lah nasha̱ khani khuirāranu, akhana rikkatā kachigatwui vang, kala akhana suihamchigatwui vangna; chieina pāngmon china preiva̱̱ chiwui vang pheomi khavai sāmida a tharhaora.”