PĀNGMONSHI 11 - Kathara Bible (BSI)

Shaikapai Sāyurbing

¹ Prohona Moses eina Aaronli hānga,

² Israelnaobingli hānglu, ngaleili khaleiya sāyurbingwui ngachaili nathumna shaiki kajibing chi hina.

³ Sāyurbingwui ngachaili asho ngapākta khaluikazā sāyurbing chi shaipaira.

⁴ Kha sheilaga khaluizālala, asho ngapāklala mashaiki kaji sāyurbing chiya: ut, kaja khaluizālala asho makhangapāk sā chi nathumwui vang matharmana.

⁵ Kala lungkaihok hi khaluizālala asho mangapakmada nathumwui vang matharmana.

⁶ Kala theba, thebana khaluizālala asho mangapakmada nathumwui vang matharmana.

⁷ Kala hok hi asho ngapāklala sheilaga makhaluizāmada nathumwui vang matharmana.

⁸ Chibingwui asā nathumna mashaipaimana, kala athumwui kathi angunlila masāza̱paimana, athum hi nathumwui vang matharmana.

⁹ Tara̱lungli khalei saikora nathumna shaipai. Tara̱lungli khalei kachiva̱; ngayilungli, lah konglungli khalei khai angachāng eina ahor kakābing chi shaipai.

¹⁰ Kha angachāng eina ahor makakā ngayilungli lah konglungli khalei saikora, kala tara̱lungli kharinga yur chi nathumwui vang ningkakachai otna.

¹¹ Chibing chi nathumwui vang kala athumwui kathingun chi ningkakachai ngasāra.

¹² Tara̱lungli khaleiya angachāngla, ahorla makakā chi nathumwui vang ningkakachai ngasāra.

¹³ Vānaowui ngachaili nathumwui ningkachaikapai, nathumna mashaiphalungki kajibing chiya: khalāng, khalāng sāsha, osprey,

¹⁴ khalāng sāsha, langpop yur, kala

¹⁵ ngahong hangkhāyur kachiva̱,

¹⁶ ostrich, pawung ngayāza, shamadruva, langtikyur

¹⁷ pawung, khaishumva, ibis,

¹⁸ rahar, utvana, sāsha,

¹⁹ varok, varokyur, kazeithora kala vāchap hibingna.

²⁰ “Angachāng kālaga aphei mati eina kazata, sāyur saikora nathumwui vang matharmana.

²¹ Kha angachāng kakā aphei mati eina ngaleili ngawokta yongkazatawui ngachaili nathumna shaikapai lei.

²² Chibingwui eina nathumna shaikapaibing chiya: Khaohyur, haoriphilāvayur, chikrinyur kala khaohsomyur hi shaipaira.

²³ Kha khangatei saikora aphei mati kakā angachāng eina khayonga saikora chi nathumwui vang matharmana.

²⁴ “Kala hibingna nathumli mathar ngasakmana; kachikathā akhana kathingunli saza̱akha ngazin eina tangda ngarangra.

²⁵ Kala kachikathāna kathingun khuiphungsākha awui kashankachon ngasa̱haiki kajina, kala ngazin eina tangda ngarangra.

²⁶ Sāyur kachiva̱ asho kālala makapāka kala sheilaga makhaluikazā sā chi nathumwui vang makatharana; chili sākaza̱ kachiva̱ chi matharmara.

²⁷ Kala aphei mati kakā sāyurbing saikorawui ngachaili pheipāng amayā eina kazata chi nathumwui vang matharmana, athumwui kathingun sakaza̱pa chi ngazin eina tangda ngarangra.

²⁸ Kala kathingun kaphungapa chi awui kashankachon chi ngasa̱phalungra kala ngazin eina tangda ngarangra; chibing nathumwui vang matharmana.

²⁹ “Ngaleili ngawokazata sāyurbingwui ngachaili nathumwui vang, khalei, shiwok, kahaka lengvāyur,

³⁰ shimkanla, tarkhong, lengvāyur, situi lengvā kala chira̱ng chi makatharana.

³¹ Ngaleili ngawokazat saikorawui ngachaili nathumwui vang hibing hi matharmana, thihaisāda sakaza̱pa chi matharmana, kala ngazin eina tangda ngarangra.

³² Kala ot akhawuitungli hibingwui thikahaiya asā akhana tātungrorakha ot chi matharmana; thingwui otranu, kashankachonranu, ahuiranu, chonsakhaoranu, kala khongphei khongphāngranu apong ngatateida shikachin ot chi tara̱ eina pheophalungra kala ngazin eina tangda ngarangra, chiwui thili tharhaora.

³³ Kala ngaleihamli tārorakha, hamlungli zangkasā saikora matharmara, ham chi shaokhaiphalungra.

³⁴ Hikatha tara̱na sakaza̱, zākhavai kashakazā saikora chi matharmara kala hikathā ham eina mangki kaji tara̱ saikora chi matharmara.

³⁵ Kala kathingunwui akai tākharor ot kachiva̱ chi matharki kajina, chiya meiphungranu, meikhongranu saikora chi sakhaiserphalungra; kaja athum chi makatharna, kala nathumwui vang matharmana,

³⁶ chithālala, ura̱wok eina pukhari chiya thara, kha kathingun sakaza̱bing chi matharki kajina.

³⁷ Kala amachi atha akhawuitungli kathingunwui akainao akha tārorlala chiya thara.

³⁸ Kha atha chili tara̱ sanghailaga kathingunwui akai tazangakha hi nathumwui vang makatharna.

³⁹ “Kala nathumna shaikapai sāyur akha thihaida kathingunli sakaza̱pa chi ngazin eina tangda ngarangki kajina,

⁴⁰ kala kathisā kashaipa chi awui kashankachon ngasa̱ki kajina, kala ngazin eina tangda ngarangra, kala kathingun kaphunga a chila kashankachon ngasa̱ra, kala ngazin eina tangda ngarangra.

⁴¹ “Ngaleili ngamenkazat kachiva̱ chi ningkakachai otna, chi mashaipaimana.

⁴² Awuk eina ngamenkazata, aphei mati eina kazata, lah ngaleili ngawokazatbing lah aphei tarakha kakābing saikora chi nathumna mashaipaimana, kaja athum hi ningkakachai otna.

⁴³ Asum eina kazatbing eina nathum khalatta masāmakhao ngasaklu; nathum khalatta chieina masākhamāng ngasakmara, nathum makhaopaishina,

⁴⁴ kaja I Proho nathumwui Varena; chiwui vang nathum khalatta tharchigatlu kala tharlu, kaja I katharana; ngaleili ngawokazata ot eina nathum khalatta masākhamāngalu.

⁴⁵ Kaja nathumwui Vare ngasa khavai Egypt ngalei eina khuishokkhame Proho chi ina, chiwui vang eina nathum tharmathengphalungra, kaja I katharana.”

⁴⁶ Hi, sāyur, vāyur, tara̱lungli ngarikazata kala manglākapai kachiva̱, kala ngaleili ngawokazata manglā kachiva̱li ngashik khavaiwui ainna.

⁴⁷ Kathar eina makathar kala shaikapai eina mashaikapai manglākapaibingwui ngachaili khangatei theikhavaina.