OTSAK 8 - Kathara Bible (BSI)

Saulna Churchli Rekakharek

¹ Kala ali sākathat chi Saulnala mayai. Chithang Jerusalemli khalei churchli sākashi kachotkachāngwui rekakharek haophokhaowa. Chiwui vang paokazatbing maningla khangatei saikora Judea eina Samariawui apam saikorali ngapha̱yāng yāmvāhaowa.

² Shitkasanga mi kaikhana chapngachāda Stephenli chizana.

³ Kha Saulna church hi shimān khavai sāda shim shimli zanglaga shitkasanga mayarnaolila, sha̱naolila shimenshokta phātopli vāsanga.

Samariali Paokaphā Hākashok

⁴ Chitharan ngapha̱ kahaibing china apam kachida paokaphā tamchithei.

⁵ Philipna Samariawui keinung akhali vāda mibingli Khristawui pao hāshoka.

⁶ Philipwui tui kala ana kasā matakhak kahai machut chi theilaga mibing saikorana ana kahāng chili ningsanglak eina nganai.

⁷ Mi kachungkhawui eina makathar manglāna panglāk eina vaolaga shoka kala sheikasha̱ kala pheikatekbinglila raimi.

⁸ Chiwui vang eina keinung chili chithang khamathān tarākha samphanga.

⁹ Keinung chili meowor kathema Samarianaobingli matakhakhai khangasaka, khalatta akhana da langkasoa, Simon kaho mayarnao akha leisai,

¹⁰ kala kateo kharei mi saikorana, “Mipa hi Varewui Pangshap, Kahaka kaho china” da shitsanga.

¹¹ Athumna ali saklāk eina khuisai kaja awui meowor eina mibingli matakhakhai khangasak atam kasāngkhahairasai.

¹² Kha Philipna Vare wungram eina Jishu Khristawui mingwui paokaphā tamkachithei chi athumna shitsanghaoda mayarnaolila, sha̱naolila ra̱hikmi.

¹³ Simonnala shitsanghaoda alila ra̱hikmi. Kala ra̱hikmi kahaiwui thili Philipli ngasozatchinga kala matakhak kahai kala machut tarākha kasā chi theilaga matakhakhai.

¹⁴ Jerusalemli leikasā paokazatbing china, Samariawui mibingna Varewui tui khuisanghaira kaji kashā eina, athumna Peter eina Johnli athumwuili chihovai.

¹⁵ Athumnala Manglā Kathara samphangpai khavai anina vākashung eina athumwui vang seihā sāmi.

¹⁶ Kaja Proho Jishuwui ming singda ra̱hikkhami maningla athum khipākhawuitungli Manglā Kathara matāzangrangsai.

¹⁷ Chiwui thili athumwuitungli anina pāng khāngkāmida Manglā Kathara samphanghaowa.

¹⁸ Paokazatbingna pāng parkharor eina Manglā Kathara samphanga kaji hi Simonna kathei tharan lupā mida

¹⁹ hānga, “Kachikathā mili ina pāng parrorlaga Manglā Kathara samphangpai khavai ilila pangshap milu.”

²⁰ Kha Peterna hānga, “Nawui pheisā chi nali shimānrumra kaja Varewui lemmet hi lupā eina lokhuipai da nana phaninga!

²¹ Hiwui ot hili nawui yar mazangmana; kaja Varewui miktāli kaphaning mamashungmana.

²² Chiwui vang eina nawui makaphā hiwui vang ningngateilu, kala sāpaiakha nawui ningrin chi pheomi khavai Vareli seihā sālu.

²³ Kaja na mikpaikashi pemting kahai kala moreiwui phātopli leiyada ina thei.”

²⁴ Simonna hānga, “Zingarāda iwui vang seihā sāmilu, chithākha nanina hāngkahaibing chiwui eina akhala iwuitungli matārormara.”

²⁵ Athumna Prohowui tui shākhi sāda Varewui tui tamchithei kahaiwui thili, Peter eina Johnna Jerusalemli latunghaowa. Awunlam Samariawui kha̱ung kachungkhali paokaphā hāshoka.

Philip eina Ethiopiawui Akhavā

²⁶ Prohowui kazingrao akhana Philipli hānga, “Ngakarthuida Jerusalemwui eina Gazali tākhavai azingshongwui shongfa chili tāulu.” Hi siwuk shongfana.

²⁷ Chieina Philipna ngakarthuida zatuwa. Ana zatta leilakha Ethiopiawui awungva̱ Candacewui lan saikora singkhame kahaka akhava, Ethiopiawui ahonga akha Jerusalemli vākhorumlaga shimshong hanungukida,

²⁸ sigui-gari tonglaga Isaiah marān lairik chi pāzatsai.

²⁹ Kala Manglā Katharana Philipli hānga “Garipamshong nganaimeida vālu.”

³⁰ Philipna ngasamvai, kala ana Isaiah marānwui lairik pākasa tui chi shāda ngahāna, “Nana pāda khalei chi khikhala da bhap tāla?”

³¹ Chieina ana ngahānkai, “Kachikathā mi akhana mahāngchitheiakha ina kathada bhap tarakhala?” Ana Philipli garili kāpamlu da hokhui.

³² Ana pāda leikasā kathara tuipam chi hina: “Taithat khavaipamli khuivā khavai khuikaphunga yaonao, ahā kachichāpawui mangāli yaonaona akhon makashok thada, anala khamor mamakāmana,

³³ Ali maikashi mida mashun hatmihaowa. Awui okthot khipāna hāngmishapra? Khikhalajila okathui hili awui mirin ngachanghaira.”

³⁴ Chieina ahonga china Philipli hānga, “Marānna kahāng hi khipālikhala? Ili kahāngmilu, a khalattali kahāngkā khangatei akhali kahāngkhala?”

³⁵ Chiwui thili Philipna kathara tuipam hi eina haophoklaga Jishuwui khamathā chānpao hāngchithei.

³⁶ Anina zatmamānda leilakha tara̱ khaleipam akhali vāshunga. Chieina akhavā china hānga, “Yanglu, hili tara̱ leili, ili ra̱hikmikida khi pankhavai leikhala?”

³⁷ Philipna ali hānga, “Nana ningtongda shitsangakha ra̱hikmipaira.” Chieina ana ngahānkai, “Ina Khrista hi Varewui naona da shitsanga.”

³⁸ Kala ana siguigari chi ngasām ngasaka, kala ani khanini tara̱lungli zangda Philipna ahonga chili ra̱hikmi.

³⁹ Anina tara̱wui eina kashok tharan kashuirak eina Prohowui Manglāna Philipli khuithuihaowa, kala ahonga china Philipli matheiluithuwa, kha awui vāki kajipamli ringphālak eina thuihaowa.

⁴⁰ Philip Azotusli leisai. Ana Caesareali vākhavai zatmamānlakha shongfali khalei keinung saikorali paokhamathā hāshokzata.