OTSAK 5 - Kathara Bible (BSI)

Ananias eina Sapphira

¹ Kha Ananias kaho mayarnao akha eina apreiva̱ Sapphirana lam kateo akha yora,

² kala apreiva̱wui khamayā zangda aman chi ngakaida haihailaga khumkhamāng paokazatbingwui pāngli rāsangmi.

³ Chiwui thili Peterna hānga, “Ananias, kathada nana chipeewui tui khuilaga Manglā Katharali kapikta lam khayorwui aman ngayarda thumhaokhala?

⁴ Lam chi mayorranglakha nawui maningmala? Yorkahaiwui thili chiwui aman chila nawui maningmala? Chithākha, khiwui vang eina nana chikathā ot sahaokhala? Hiya mikumoli kakapik maningla Vareli kakapikna!”

⁵ Ananiasna tui hi kashā eina kongluisangda thihaowa, kala kashā saikorana ngacheelakhaowa.

⁶ Chiwui thili yaronnaobingna ngakarthuida kachon eina romlaga ayarli achizanhaowa.

⁷ Pung kathum sha̱kha shānglaga khi shokhairakhala kaji matheila apreiva̱ rārāsai.

⁸ Peterna ali ngahāna “Nani preigaharna lam yorlaga samkaphang pheisā chi himalā?” Ana ngahānkai, “Mha, himana.”

⁹ Chieina Peterna ali hānga, “Khisāda nani khani mayāngarokta Prohowui Manglāli chāng yanghaokhala? Yanglu, nagaharali vākachizanbing khamongpheili ungshunghaira kala nalila athumna ngazonshokhaora.”

¹⁰ Chili ngalāngda ala Peterwui pheizingli saosangda thihaowa. Yaronnaobing china shimlung kazang eina ala thihairasāda agaharawui ngalemli achizanhaowa.

¹¹ Church katongana kala hi kashā mi saikorana ngacheelakhaowa.

Matakkhak kahai Otbing

¹² Chitharan paokazatbingwui pāng eina mibingwui alungli matakhak kahaila kala machutkakhuila tarākha sai kala athum saikorana Solomonwui khāmreili kazipruma.

¹³ Athum phāya da mibingna ngazeklala mi khipānakha athumwui alungli mavāzanglengmana.

¹⁴ Chitha-ilala, mayarnaola, sha̱naola Proholi shitkasang mi ashang eina chungmeikharda ngarumsanghaowa.

¹⁵ Chiwui vang eina Peterna khaung khavā atamli aka̱lāmāngla saza̱khui khavai, athumna shongfapheili petla khomphāla hamlaga kakazānaobingli khuirāda chipethai.

¹⁶ Jerusalemwui kuikhamareili khalei keinungbingwui einala kakazābing kala makathar manglā kazangbing khuirāda raimisera.

Paokazatbingli Rekkakharek

¹⁷ Kha pāngmon kharei eina ali khangaso Sadduceebingna athumli yuishihaowa.

¹⁸ Chieina athumna paokazatbingli tukkhuida khangachā phātop shimli narhai.

¹⁹ Kha ngayāshong Prohowui kazingrao akhana phātop shimwui khamongbing chi shomihailaga athumli khuishokta hānga,

²⁰ “Nathumna khorumshimli vanganingda mibingli kharingawui tui saikora hi ahāngchitheilu.”

²¹ Athumna tui chi shāda kazing kathang eina khorumshimli atamchitheiphoka. Chitharan pāngmon kharei eina ali khangasobing china hanga̱ kazipngarum khavai Jihudiwui ararbingli hokhui, kala paokazatbing chili akhui khavai phātop shimli mi chihovai,

²² kha akhavābingna phātop shimli vākashung tharan paokazatbing chi maleisāthuda, athumna hanunglaga hithada unghānga,

²³ “Phātop shim lonkazaklaga haikasā ithumna thei, kala khamayonabing china khamong saikorali nganingsai, kha ithumna khamong chi kasho eina shimlungli khipākha maleisāmana.”

²⁴ Khorumshim kashinabing eina pāngmon akhokabingna tui saikora chi shālaga paokazatbing chi kathada shokhaokhala da matakhakhai.

²⁵ Khaleilaga mi akhana rāhānga, “Nathumna phātop shimli sanghaikasābing chi khorumshimli nganinglaga mibingli tamchitheida lei.”

²⁶ Chieina akhavā china kashinabingli ngasovālaga athumli akhuiluishita, kha mibingna lunggui eina horpaishina da khangacheewui vang zakshilāk eina masāmana.

²⁷ Athumna paokazatbing chili khuiungda hangva̱wui mangāli nganing ngasaka, kala pāngmon kharei china athumli hānga,

²⁸ “Nathumli mipa hiwui ming eina matamchitheilakalu da kaso kahaina, kha nathumna nathumwui tamkachithei hi Jerusalem peida ngayao ngasakhaira kala mayara hiwui ashee katā chi ithumwuitungli tāngasakida sai.”

²⁹ Kha Peter eina paokazatbingna ngahānkai, “Mibingwui tui nganāki kajipale Varewui tui nganātha̱ra.

³⁰ Ishawo ngarāwui Vare china, nathumna thingtungli shaoshanda sāthat kahaia Jishu chili ringngasakhaira,

³¹ Varena ali Isrealnaobingli ningngateida, morei pheomi khavai kathāna Huikhame akha sāngasakta awui yāshong chipama.

³² Kala ithumna ot saikora hiwui shākhina. Chithada sāda awui kahāng khanganā athumli Varena khami Manglā Kathara chinala shākhina.”

³³ Hangva̱naobing china hi kashā eina malungkangnāhaida paokazatbing chili shaothatngai.

³⁴ Kha chān khangazek chiwui alungli, ain kachishuta kala saikorana khayākashi Gamaliel kaho Pharisee akhana nganingda mibing chili kasha̱khawui vang kayāngli khuishokhaisalu da kasoi.

³⁵ Ana athumli hānga, “Isrealnaobing, nathumna mibing hili khi sarakhala da phaningkazaklu.

³⁶ Khare kachāng Theudasna a khalatta mi akhana da phaninga kala mayar shāmati sha̱khana thi shura kha ali shaothat kahai eina athi kashurabing chila ngapha̱haoda khikha mashokthuwa.

³⁷ Awui thili mishān kakhui atamli Galileewui Judasna mi kaikhali athi shurkhavai khomkhui, kha ala shimānhaowa, kala athi kashurabingla ngapha̱haowa.

³⁸ Chieina ajawui tuishot hili ina nathumli kachangkhat eina kahāngna, mibing hili khikha masālaklu. Athum ningsasakranu. Athumna khangarān kala otsak hi mikumowui eina kashokna jiakha shimānhaora.

³⁹ Kha hi Varewui eina kharāna jiakha, nathumna athumli mashimān ngasakrarmara. Kala nathumna Vareli ngakaikashi ngasāsāpai!” Athumna Gamalielna hāngkachithei chi khuisanga.

⁴⁰ Chieina paokazatbing chili hosanglaga athumli shaowa kala Jishuwui ming singda mamatui khavai kasolaga thuingasakhaowa.

⁴¹ Jishu mingwui vang athumna kakhayak samkaphang chi khangayi otna da theikhamiwui vang mathānthup eina athumna hanga̱shim eina thuihaowa.

⁴² Kala thangkachida athumna khorumshimlila, shimlila Jishu hi Khristana kaji hākashok, tamkachithei mathāhailakmana.