OTSAK 28 - Kathara Bible (BSI)

Maltali Kashok

¹ Ithumna yāmshok kahaiwui thili yikuiram chiwui aming Malta hoya da shai.

² Yikuiram chiwui mibingna ithumli teokha ngahānkhangai maningmana. Athumna mei sāmida ithumli ringphālak eina samngarokhui, kaja atam chitharan kazing rophokhairasāda siklak eina leisai.

³ Paulna thingtan akha khuilaga meili horkasang eina mei chiwui kasāna kathiri kaphunga phara̱ akha shokta Paulwui pāngli ngareishānhaowa.

⁴ Aramnaobingna apāngli phara̱ kāngkhayui chi theilaga athum akha eina akha ngazek ngaroka, “Mashoilakla mayara hi mi shaokathatara. Ana shamadruwui eina yāmshokhailala, mashun china ali maring ngasakmara.”

⁵ Kha ana phara̱ chi meili khayitsanghaida khikha mathālakthuwa.

⁶ Athumna awui phasā chi worshokrāsāra lah kashuirak eina saosangda thihaora da ngaraipama. Kha atam kasāngkha ngarailaga ali kalākashi khikha makashok eina athumwui kaphaning chi ngacheihailaga “A hi kameo akhara.” da hānga.

⁷ Apam chiwui eina matānāla yikuiram chiwui awunga Publiuswui lam kateokha leisai. Ana ithumli ngahānngailak eina samngarokkhuida zimiksho kathumthangwui vang awui shimli ngasāmkhui ngasaka.

⁸ Chitharan Publiuswui avāva̱ chi kakharur eina ashee kapai ngasoda kazāhaoda petli pipamda leisai. Paulna ali zangyangda seihā samida awuitungli pāng parrorda ali raimi.

⁹ Hi kashok eina yikuiramli khalei kakazānao saikora rāda raimisera.

¹⁰ Athumna ithumli apong kachungkhali khayāshilak eina sai kala ithum zatuki kaji eina ithumna darkar kasā kashakazā katonga ngarānsangmi.

Maltawui eina Romeli Khavā

¹¹ Kachāng kathumwui thili yikuiram chili si peida rāngasāmkakhui Alexanderiawui eina kharā, mangāli Ngashirkata Kameo chinaoniwui ama̱ yeksang kahai jahasli tongda zatphoka.

¹² Ithumna Syracuseli huishangda chili zimiksho kathumthang apamsanga.

¹³ Chiwui eina kuilaga Rhegiumli vāshunga kala akhama kathā azingshongwui eina masi phanphokuwa laga kakhanethang Puteoli vāshunga.

¹⁴ Apam chili shitkasanga mi kaikha samphangda ithumli zimiksho shinithang pamsang khavai poi. Hithada sāda ithumna Rome vāshunga.

¹⁵ Romeli khalei shitkasangbingna ithum rāda lei kaji kashā eina keinung chiwui Appius leihngapha̱ kala Three Inns kahowui keinung eina tangda rālaga ithumli rāsamphanga. Paulna athumli kathei eina Vareli ningshi kala ningkhanganung samphanga.

Romeli Vākazang

¹⁶ Ithumna Romeli vākazang tharan, shipai akhana mayonlaga Paulli amāng pam khavai mayāmihaowa.

¹⁷ Zimiksho kathumthangwui thili ana apam chiwui Jihudi kathānabingli hokhuisera. Athum saikora rākazip khangarum tharan ana hānga, “Ivānao ngarā, ina iyurwui mibingli lah ithumwui avā ngarāna mitā khamaron khangachā zatkhanā chili khikha kakai masāhaisālaklala, Jerusalemli ili phātop sanghailaga Romewui pāngli horsangmi.

¹⁸ Ili ngahānkup kahaiwui thili chiho khavai sai, khikhalajila thikapai khayon masamphangthuwa.

¹⁹ Kha iyurli phenkhavai khikha maleisālala Jihudibingna makhamayāwui vang ina Caesarli pokahaina.

²⁰ Hiwui vang nathumli samphangda machukrum khavai kahona. Israelwui kachihān chiwui vang ili marikhānghui sangkahaina.”

²¹ Kala athumna ali hānga, “Ithumna nawui pongli Judeawui eina chithi akhala masamphangmana, lah chiwui eina hili kharā avānao khipānakha nawuitungli hāngkhamashāt tui marāhāngmana.

²² Kha nawui kaphaning khi leimameikhala kaji nawui eina shāngai; kaja apam kachiva̱li ashangva̱ hili mashātta khamatui ithumna thei.”

²³ Chieina athumna Paulli langkasa̱ akha sai kala chithang ana kapam apam chili mi kachungkha rākazipa. Ana ngathor eina thuida ngazin vāshungda Vare wungramwui pongli meikhaichithei kala Moseswui ain lairik kala marānbingna kapi kahaiwui eina khuishoklaga athumli Jishuwui pongli meisā eina tamchithei.

²⁴ Athum kaikhana awui tui khuisanga kala kaikhana mashitsangmana.

²⁵ Chieina athum mamayā ngarokthuda Paulna tui hi hāngkahaiwui thili athum ngathānhaowa; “Manglā Katharana marān Isaiahwui mangā eina navā ngarāli hithada hānghaikasā chi mashunga!

²⁶ Kaja ana hānga: ‘Mibing hili ahānglu: Nathumna shālakra kha bhap matālakmara, nathumna theilakra kha maphaningkhuilakmara.

²⁷ Kaja athumwui ning mangma̱ ngasakhaira, khanāla ngakhok ngasakhaira, kala athumwui mikla mikpihaira, chi maningsi kaja athumwui mikna theira, athumwui khanāna shāra, athumwui ningna bhap tāra, kala athumna ili latunghairara, kala athumli raimihairara, da Varena hānga.’”

²⁸ Chiwui vang eina ina nathumli theingasakkhangai chi hina, Varewui huikhami tui chi Gentilebingli shivāthaira; athumna khuisangra.

²⁹ Paulna hi hāngkahaiwui thili, Jihudibing athum khalatta nganangrei eina ngayāt ngaroklaga thuihaowa.

³⁰ Ana apam chili kum khani peichaoda akhalattawui lan khuishoklaga pama, chili ali samphang khavai kharā mi kachiva̱li mathānthup samphangkhuida

³¹ Vare wungramwui pao hāshoka kala Proho Jishu Khristawui pongli sheikakhaut maleila phongshar eina tamchithei.