OTSAK 26 - Kathara Bible (BSI)

Paulna Agrippawui Mangāli Kaphayat

¹ Agrippana Paulli hānga, “Na khalattawui maramli hāngkhangai chi hāngpaira.” Paulna apāng katingshokta hithada akhalattawui vang phayata:

² “Awunga Agrippa, ina aja nawui mangāli, Jihudibingna ili kaphen saikora chiwui vang phayat khavai khanganing samkaphang hi iwui vang ka̱lā khamahaina da phaninga.

³ Kaja matailak eina nana Jihudiwui khangachā zatkhanā kala mamayā khangarok saikora mathālak eina katheina. Chiwui vang eina iwui hi zingarāda khānglaga khanganāmilu da kapona;

⁴ “Haokaphokwui eina thuida ina iyurwui alunglila, Jerusalemli rarkakālila kala chili lāngda nganuilakhawui eina thuida iwui kharingkharakrin Jihudi saikorana theisera.

⁵ Ithumwui sakmeikap kaji dharmawui athishurda ina Pharsiee akha sāda okthuisai kaji athumna theida kasāngkhahaira, athumna shākhi mingaisi kaja mipailaka.

⁶ Ithumwui avā ngarābingli ngashitmi kahai chili chihānhaowa kajiwui vang aja ili bichar sākhavai hili khanganingna,

⁷ hi ithumwui shang tharāda khanina samphangra da chihānchaoda Vareli ngashun ngayā mateila khokharum china. Kachihān hiwui vang, he awunga, Jihudibingna ili kaphenna.

⁸ Varena kathili ringngasaka kaji hili khisāda nathumna mashitsangkapaina da phaninghaokhala?

⁹ “Inala Nazarethwui Jishuwui mingli mamayāmada kashap eina tangda ngasungra da phaningsai.

¹⁰ Jerusalemli chithada ina sai kala pāngmon khareibingwui eina pangshap samphangda Varewui mibing kachungkhali phātoplila sanga kala athumli shaothat khavai tuitak katā tharan inala iwui khamayā miya.

¹¹ Ina kachungkhashida Synagogueli vāda athumli tandi mi kala athumwui shitkasang chi ngachei khavai khangarān sai; malungvātnahaida ina miram khangateiwui keinungli vāda athumli rekhareka.

Paulna Awui Ningkhangatei Hāngkachithei

¹² “Hiwui kharinwui vang ina pāngmon khareibingwui eina panghap kala kakaso khuiphungda Damascusli vai.

¹³ He Awunga, ngashunlungwui atamli shongfa zatta leilakha kazingramwui eina zimikli horkhamei kahor akhana ili kala ili khangasobingli kuimareida kapkharor chi thei.

¹⁴ Ithum saikora ngaleili saosang kahai tharan Hebrew tui eina akhon akhana, ‘Saul, Saul, khisāda nana ili rekakharekhala? Lungguili kathakakha nakhalatta chotkhuira.’ da ili kahāng ina shai.

¹⁵ ‘Na khipākhala, Proho’? da ina ngahāna. Chieina Prohona ngahānkai, ‘Nana shimānranu da kasā Jishu chi ina.

¹⁶ Kha ngakarthuida nganinglu, kaja nali rao akha sāda kapangsang khavai ina rākachitheina, kala aja nana ili theikahai kala ina naoda nali chitheiluiki kaji chi nana kateibingli shākhi sāphalungra.

¹⁷ Ina nali Israel yurwui eina kala Gentilebingwui eina kanmira.

¹⁸ Nana athumwui mik rakngasakra, kala tangkhamangwui eina kahorli latung ngasakra kala Satanwui pangshapwui eina Vareli latung ngasakra. Chithada sāda athumna ili shitkasangwui vang athumwui morei pheokhami samphangra kala Varewui kapangkhui kahai mibingwui ngachaili zangpaira.’

Paulna Awui Ots Hāngkachithei

¹⁹ “Chiwui vang eina awunga Agrippa, kazingramwui eina kharā mahākhami chili ina kahāng makhanganā maleimana

²⁰ Rimeikapta Damascusli khalei, chiwui thili Jerusalemli khalei kala Judeali khalei saikora kala Gentilebingli, moreiwui eina ning ngateida Vareli latunglu kala ning ngateihaira kaji otsak eina chitheiphalungra da ina pao hāshoka.

²¹ Chiwui vang eina Jihudibingna ili khorumshimli tukkhuida sāthat khavai sai.

²² Kha aja rāshungda ina Varewui khangachon samphanga. Chieina ina hili nganingda kharei kateo makhaila shākhi hi khamina. Marānbing eina Mosesna shokrada hāngkahai chili henda ina khikha mahāngmana.

²³ Chiya Khristana kachotkachāng phungphalungra kala kathiwui eina ringshok khare sāda Jihudi eina Gentilebing khaninili huikhamiwui kahor chi vaomalānra.”

²⁴ Hithada akhalattawui vang kaphayat eina Festusna panglāk eina vaoda ali hānga. “Paul, na pāhaira! tarākha tamkakhui china nali pāngasakhaira!”

²⁵ Paulna ngahānkai, “Phākhamataiya Festus, I mapāmana! Ina tāzak kahai khamashung tui khamatuina.

²⁶ Awunga Agrippa, ina nali hi machihuilakla matuikashapna, khikhalajila nana hiwui pongli theisera kaja saikora hi awungana matheila achithek akhali ngathumda kashok maningmana da ina shitsanga.

²⁷ Awunga Agrippa, marānbingli na mashitsangmala? Nava shitsanga kaji ina thei.”

²⁸ Agrippana Paulli hānga, “Atam kasha̱kha hiwui alungli nana ili Christian onngasakshapra da phaningla?”

²⁹ Paulna ngahānkai, “Atam kasha̱ kasāngwui tui maningmana, namāng majila aja iwui tui nganāda khalei saikorala, marikhānghuikhana so kajimada khangateiva I kathā ngasāser khavai ina Vareli seihā sai.”

³⁰ Chiwui thili awungana ngakarthui kala ali ngasoda Governor eina Bernice kala athumli ngasopamkasā saikora ngakarthuisera,

³¹ ngathān kahaiwui thili athumna akha eina akha ngazek ngarokta, “Mipa hi thikhangayi lah phātopli sangkhangyi ot akhala masāhaimana.” da hāngngaroka.

³² Kala Agrippana Festusli “Mipa hina Caesarli mapohaisāsi kaja chihohaipaiki kajina.” ji.