OTSAK 25 - Kathara Bible (BSI)

Paulna Awungali Kākhavai Kapo

¹ Festusna awui ngaleili unglaga zimiksho kathumthangwui thili Caesareawui eina Jerusalemli vai.

² Chili pāngmon khareibing eina Jihudiwui kathānabingna Paulwuitungli kaphen chi khuirai.

³ Athumna Festusli, Paulli Jerusalemli kakhuirāmilu da poi, kaja athumna Paulli shongfali rimda sāthat khavai ngathumda ngarānhairasai.

⁴ Festusna ngahānkai, “Paullia Caesareali phātop sanghaida lei kala ila chili thaklāk eina vaura.

⁵ Nathumwui kathānabing chi ili Caesareali ngasovāranu, kala mayarapa china khayon sāhaiakha chili kaphen tui chi aminaoranu.”

⁶ Festusna athumli zimiksho chishat lah tharāthang sha̱kha ngasopamlaga Caesareali vai, akhama kathā ana karotwui bicharpamli pamlaga Paulli khuizang khavai kasoi.

⁷ Paulna rāzangkhaleoda Jerusalemwui eina kharā Jihudibing china ali kuimareiphinhailaga awuitungli athum khalattana praman mamikharar kasasaka tui kachungkha phena.

⁸ Kha Paulna khalatta phayatta; “Ina Jihudiwui ainlila, khorumshimlila, kala Romewui awungalila khikha khayon masāhailakmana.” da hānga.

⁹ Kha Festusna Jihudibingwui ningyāng ungkhavai Paulli ngahāna, “Jerusalemli shanglaga nali phenda khalei chi chili iwui mangāli bichar sākhavai ningchāngla?”

¹⁰ Paulna ngahānkai, “I arui ili bichar sākhangayi apam, Caesarwui kārotli nganingda lei; ina Jihudibingli khikha khayon masāhailakmana kaji nana thatheihaira.

¹¹ Ina ain sakhaihaida thikhangayi shongrān leiakha ina chiwui eina yāmkhavai mapolakmana; kha iwuitungli khuikharā kaphen chili khamashung mazangmana jiakha, khipānakha ili athumwui pāngli mamipaimara. Ina Caesarli khangakaona.”

¹² Chiwui thili Festusna awui hanga̱li ngasanlaga ngahānkai, “Nana Caesarli kapowui vang, Caesarli vāpaira.”

Paulna Agrippa eina Bernicewui Mangāli Kakā

¹³ Zimiksho khani kathumthangwui thili awunga Agrippa eina Bernicena ringkaphā shālamwui vang Festusli samphang khavai Caesareali rāzanga.

¹⁴ Ani khanina chili sha̱rākhathang pamsanghaoda Festusna Paulwui maramli awungali hāngchithei; “Hili Felixna phātop sanghaikasā mayarnao akha lei,

¹⁵ kala ina Jerusalemli khavā tharan Jihudiwui pāngmon khareibing eina ararnaobingna awuitungli kaphen khuirāda ali yomchiphun khavai rapoi.

¹⁶ Kha ina athumli ithum Romanwui khangachāli kaphena china phenkahaiapa chili mai yangngasungda khalatta maphayatkhuiranglakha eina tangda kateiwui pāngli mikakā hi khangachā maningmana da hāngkahaina.

¹⁷ Athum hili kharā tharan ngalāngda akhanama kathā bichar sākhavai ina ngahotkhui kala mipa chili khuirā khavai ina kasoi.

¹⁸ Kaphenabing china thuikahāng chili phenlapaida ina phaningkasā thada zakkashi phenkhangayi mazangmana.

¹⁹ Kha athumwuili mamayākhangarok khalei chiya athumwui dharmawui pongli kala thikahai Jishu chi ringdalei da Paulna kahāng chimaya.

²⁰ Ina hiwui pongli kathada phākhuisikhala da matheithuda tui hi Jerusalemli bichar asāngaila da ina ali ngahāna.

²¹ Kha Paulna Caesarwui tuitak eina vaikhavai kapowui vang, ina ali Caesarwui pāngli machihovāranglakha ali hili haisalu da kaso kahaina.”

²² Chieina Agrippana Festusli hānga, “Mayara hiwui tui inala nganāyangngai.” “Akhama nganāyanglu” da Festusna ngahānkai.

²³ Akhanama kathā Agrippa eina Bernice hakmahālak eina rāda, raimi akhavābing eina keinungwui kathānabingli ngasoda yarui kazipshimli zanga. Chiwui thili Festusna kasoda Paulli khuirai.

²⁴ Festusna hānga, “Awunga Agrippa kala hili ngasopamda khalei yarui; mipa hiwuitungli apam hilila, Jerusalemlila makhamayā kaphen tui ili khuirai. Athumna mipa hi maringpaimara da vāokazama.

²⁵ Kha ana thikhangayiwui ot sākahai khikha ina masamphangmana. A khalattana Caesarli kapowui vang, ina ali chili chihovā khavai mayāmi kahaina.

²⁶ Kha ina Caesarli mipā hiwui pongli hilāka da kapi khavai maram maleimana. Chiwui vang eina nathumwui mangāli, matailāk eina Awunga Agrippawui mangāli ali khuikharāna. Chieina ali mathālak eina ngahānshingkhui kahaiwui thili ina kapi khavai kachikathā samphanglapai.

²⁷ Kaja awuitungli kaphen chi tharlak eina machitheila, phātop kazanga mi akhali chiho khavā hiya mangayimana.”