OTSAK 23 - Kathara Bible (BSI)

¹ Chieina Paulna hangva̱naobing chili yangtitlaga hānga, “Varewui mangāli aja rāshungda ina kaphā mashun-makhui eina okthuirāhaira.”

² Pāngmon kharei Ananiasna Paulwui ngalemli khanganingbing chili Paulwui khamorli kaphelu da kasoi.

³ Paulna ali hānga, “Varena nali makahatlākla kaphera, teimachar kahaia phākho! Ainwui athishurda ili bichar sākhavai pamlaga ain sākhailaga ili kaphe khavai kasolama!”

⁴ Paulwui ngalemli khanganing mibing china ali hānga, “Nana Varewui pāngmon khareili chipatrala?”

⁵ Paulna ngahānkai, “Ichināngarā, a pāngmon khareina da I matheisāmana. Hithada kapihaida lei, ‘Nawui mibingli khamungawuitungli zakkashi tui mamatuiphalungmara.’”

⁶ Mibing chi ngakhumpakna Pharisee kala ngakhumkhana Sadduceena kaji Paulna kathei eina hanga̱shimli ana vaosanga, “Ichināngarā, I Pharisee akhana, Phariseebingwui naomayara akhana; kathebingna ringluishitra da ina kachihānwui vang ili chan ngazek khavai hili nganingli.”

⁷ Ana chi hāngkhaleoda Phariseebing eina Saduceebing chi ngaphatreihaowa kala mijang khani shokhaowa.

⁸ Kaja Saduceebingna thihaiakha maringshokluimana kala kazingraola, manglāla maleimana da hānga; kha Phariseebingna saikora hi shitsanga.

⁹ Akhon chuingarok kahai eina Phariseebingwui mijang kazanga ain kathema kaikhana ngakarthuida panglāk eina thuiphayatta hānga, “Ithumna mipā hili khikha khayon masamphangmana. Khipāna thei ali manglāna lah kazingraona matui khangasakla honthei!”

¹⁰ Ngayāt khangarok chi marnā kahai eina Paulli athumna pāngkāda akha̱-akhā sāmihaipaishinada shipai akhavā chi ngacheehaoda, athumwui chili vālaga Paulli khuiphungda shipaipamli khuivā khavai awui shipaibingli kasoi.

¹¹ Chithang ngayā Prohona Paulwui ngalemli ranganingda hānga, “Mangacheealu! nana iwui vang Jerusalemli shākhi kasā chithada Romelila shākhi sāphalungra.”

Paulli Sāthat khavai Khangarān Kasā

¹² Akhama kathā ngathor Jihudibing china Paulli mashaothatranglakha eina tangda maphazā maphāshakmara da ngathumda tuingashit akha sāngaroka.

¹³ Ngathum tuingashit kasā hili mi hangmati lānga.

¹⁴ Chiwui thili athumna pāngmon khareibing eina ararbingli vāda hānga, “Ithumna Paulli mashaothatranglakha eina tangda maphazāmara da kasaka tuingashit khuirumhaira.

¹⁵ Chiwui vang eina nathum awui pongli munmeida theikhui khavai lei chikhaninglaga Romewui shipai akhavāli Paulli khuirā khavai nathum eina hangva̱naobingna pao chihovāmilu. Ana apam hili marāranglakha ithumna ali sāthat khavai khangarān sāra.”

¹⁶ Kha Paulwui azarva̱wui naomayarana athumwui khangarān chi shāhaoda ana shipaipamli vāda Paulli hānghaowa.

¹⁷ Chieina Paulna shipai akhavā akhali hokhuida hānga, “Yaronpā hili akhavāwuili thānvālu, ana ali hāngki kaji tui leili.”

¹⁸ Chieina ana ali thānphungda akhavāwuili khuivāda hānga, “Phātop kazanga, Paulna ili hokhuilaga yaronpa hina nali hāngkhavai leihaida nawuili thānvāmilu da poi.”

¹⁹ Akhavā china apāng singkhuida a khalattana thānkhuilaga ali ngahāna, “Khi hāngkhangai leikhala?”

²⁰ Ana hānga, “Jihudibingna Paulwui pongli munmeida theikhui khavaina chikhaninglaga ali akhama hanga̱shimli khuirā khavai nali posa da athum mayāngarokhaira.

²¹ Kha athumwui kapo chi mamayāmialu, kaja mi hangmati langdana ali ngathumda rimpamsāra, athumna ali masāthatranglakha eina tangda maphazā maphāshakmara da tuingashit khuikahaina; ara athum ngarānpinghaira, nawui khamayāmāng ngaraida khaleina.”

²² Akhavā china hānga, “Nana tui hi ili hānghaira da khipālikha mahānglakalu.” Chiwui thili yaronnaopa chili shiunhaowa.

Paulli Felixwuili Chihokhavā

²³ Chiwui thili ana akhavā khanili hokhuida hānga. “Aja ngayā pung kakathuma katā eina sigui katonga mi hangshini kala kazei kasinga shipai shākhanili ngasoda shipai shākhani Caesareali vākhavai khangarān sālu.

²⁴ Paul tongkhavai sigui ngarānmilaga Governor Felixli mathālak eina khuivāmilu.”

²⁵ Chieina akhavā china hiwui pongli chithi akha kapisangmiya:

²⁶ Claudius Lysiasna Phākhamataiya governor Felixli shālam mili.

²⁷ Mipa hili Jihudibingna tukkhuida sāthat khavai sāda leilakha, a Romewui ruichumnaona da kashā eina ina iwui shipaibingli ngasoda akankakhuina.

²⁸ Athumna ali khiwui vang kaphenkhala da theikhui khavai ina ali athumwui hanga̱shimli khuivai.

²⁹ Awuitungli ana thikhangayi kala phātop zangkhangayi maram akhala masamphangmana; awuitungli kaphen chiya athumwui ainwui pongli ngasāsai.

³⁰ Awuitungli khangathuma khangarān akha sāda lei kaji pao samkaphang eina ngalāngda ali nawuili chihokharāna. Ali kaphenbinglila athumwui mamayākhangai chi nawui mangāli hāngkhavai ina hānghaira.

³¹ Athumli kaso kahai athishurda shipaibingna Paulli chithang ngayā thānphungda Antipatris vāshungda khuivai.

³² Akhama kathā pheiwui shipaibing china shipaipamli hanunghaowa kala siguiwui raimibingli ali ngasovā ngasaka.

³³ Athumna Caesareali vākashung eina governorli chithi chi miya kala Paullila awui pāngli horsangmi,

³⁴ governorna chithi chi pālaga kachi ngaleiwui einakhala da Paulli ngahāna. A Ciliciawui eina kharāna da kathei eina

³⁵ ana hānga, “Nali kaphenbing kharā eina nawui tui nganānaora.” Chieina Paulli governorwui chānngazekshimli hailaga mayonpamlu da ana kasoi.