OTSAK 22 - Kathara Bible (BSI)

¹ “Ivānao ngarā kala ishāvā ngarā, ina nathumwui mangāli I khalattawui vang kaphayat hi khanganāmilu.”

² Ana Hebrew tui eina khamatui chi shālaga mataimeida va̱rihaowa, chieina ana matuiluishita:

³ “Iva Cilicia ngaleili khalei Tarsusli kapharā Jihudi akhana, kha Jerusalemli Gameli-elwui katamnao akha sāda rarkai, ithumwui avā ngarabingwui khangazip ainwui lungli tamkakhui samphanga kala aja hili khalei nathum thada ila Vareli chigatchao kahai mina.

⁴ Apong hili kazata mibingli ina rekharekta shaothat ngasaka. Ina sha̱nao, mayarnaobingli tukkhuida phātopli sanga.

⁵ Pāngmon kharei eina hangva̱nao saikorana ina khamashung tui khamatuina da shākhi mishapra. Damascusli khalei avānaobingli athumna kakapi chithi chi ila samphanga. Chieina ina mibing chili vātukkhuilaga marikhanghui eina hokkhuilaga Jerusalemli khuiungda tandi mikhavai vai.

Paulna awui Ningkhangatei Hāngkachithei

⁶ “Ina zazatta Damascus vāshungnanai ngashun kashuirak kazingramwui eina horchamri kahai kahor akhana ili kuimareida horra.

⁷ Chieina I ngaleili saosanghaowa kala akhon china kahāng ina shai, ‘Saul, Saul, khisāda nana ili rekharekkhala?’

⁸ ‘Na khipākhala, Proho’ da ina ngahāna. ‘Nana shimān khavai kasā Nazarethwui Jishu chi ina’ da ana hānga.

⁹ Ili ngasokazatbing china kahor chi thei, kha ili kahānga akhon chi athum mashāmana.

¹⁰ Chieina ina ngahāna, ‘Proho, ina khi sarakhala?’ Chieina Prohona ili hānga, ‘Ngakarthuida Damascusli vālu, chili Varena nali sāngasakhangai chi hāngmisera.’

¹¹ Kahor chiwui kahānna imik matheirarthuda ili khangasobingna ili Damascusli thara̱vai.

¹² “Keinung chili ain chetlak eina khamayona kala Jihudibingna chuilak eina kakhuiya shitkasanga Ananias kaho mi akha leisai.

¹³ Ana iwui ngalemli rānganingda hānga, ‘Ivānao Saul, namik theihaoranu.’ Atam chichangli ina kathei samphangluishitta ali thei.

¹⁴ Ana hānga, ‘Ithumwui avā ngarāwui Varena awui kaphaning theikhavai, Khamashungapā chi theikhavai kala akhalattawui akhon eina khamatui chi shākhui khavai nali kapangkakhuina;

¹⁵ kaja nana kathathei kashāshā hi mi kachiva̱li hāngmi khavai awui shākhi kasaa ngasāra.

¹⁶ Chiwui vang eina khi ngarainganaosāra? Ngakarthuida ra̱hikhaolu kala awuili zangda nawui morei pheohaolu.’

Gentilebingli Pao Hāshok khavai Hokakhui

¹⁷ “Ina Jerusalemli latungda khorumshimli seihā sāda leilakha ili mahākhami akha chithei,

¹⁸ chili ana ‘Thakta Jerusalemwui eina zatulu, khikhalajila iwui vang nana shākhi khami athumna makhuisangmara’” da Prohona ili hāngda khalei chi thei.

¹⁹ Chieina ina ngahānkai, “Proho, synagogueli vāda nali shitkasangbingli ina tukkhuida kashao chi athumna mathālak eina thei.

²⁰ Nawui vang shākhi kasaa Stephenli shaokathat tharan ila mayāda ali shaokathatbing chiwui kashankachon mayonmida chiwui ngalemli nganingsai.

²¹ Chieina ana ili hānga, ‘Zatulu, ina nali katāva̱li khalei Gentilewuili chihovāra.’”

Paulli Narkahai

²² Hi mahāngranglakha eina tangda Paulna kahāng chi yarui china nganai. Kha chiwui thili athumna panglāk eina vaoda hānga, “Hikatha mi hili okathui hiwui eina khuithuihaolu! A maokthuingayimana.”

²³ Athumna panglāk eina vaoda athumwui kachon khayitta kazingramli chifa horkamahunglakha

²⁴ Romewui shipai akhavā china awui shipaibingli Paulli shipaipamli khuizanghaolu da kasoi kala Jihudibingna awuitungli panglāk eina khavao hi khiwui vangkhala da phākhui khavai ali shaolu da hānga.

²⁵ Kha athumna ali hokhailaga lijei eina shaouki kaji eina chili nganingkasā shipai akhavā chili Paulna hānga, “Romewui ruichumnao akhali khayon khikhikhawui vang chān mangazekla kashao hi ainla?”

²⁶ Shipaiwui akhavā china hi kashā eina akhavā kahaka chili vāda ngahāna, “Nana khi phaningkhala? Mipa chi Romewui ruichumnaona.”

²⁷ Chieina akhavā china Paulli vāda ngahāna, “Hāngmilu, na Romewui ruichumnao akhala?” “Mha” da ana ngahānkai.

²⁸ Akhavā china hānga, “Pheisā tarākha shānlaga I ruichumnaopam hi lokakhuina” “Kha iva ruichumnao sāda kapharāna” da Paulna ngahānkai.

²⁹ Chieina ali ngahānkida leikasā mibing chi ngalāngda thuiserhaowa, kala shipai akhavā china Paul hi Romewui ruichumnaona kaji kathei eina ana ali marikhanghui eina kakhalap chi phaningungda ngacheelakhaowa.

Paulna Hanga̱wui Mangali Kakā

³⁰ Shipai akhavā china khiwui vang eina Jihudibingna Paulli kaphenkhala kaji theishingkhui khavai ningchānghaowa, chieina akhama kathā Paulli khalap kahai chi khalāmihaowa kala pāngmon kharei eina hangva̱naobing kazip khavai kasoi. Chiwui thili ana Paulli thānphungda athumwui mangāli ali kānganing ngasaka.