OTSAK 21 - Kathara Bible (BSI)

Paulna Jerusalemli Khavā

¹ Ithumna athumli kapāng tui hānghailaga zathuihaowa. Ngatartei eina huivālaga ithumna Cosli vāzanga; akhama kathā Rhodesli vāzanga, kala chiwui eina Patarali vāhaowa.

² Chili Phoeniciali vāki kaji jahas akha samphangda chieina tongvai.

³ Ithumna Cyprus ngashānda kathei apam vākashung eina azingshong huitāda Syriali vai. Ithumna Tyrewui shamadrupheili ashoka, kaja chili jahaswui ot khuitā khavai leihaowa.

⁴ Chili shitkasanga kaikha ithumna samphangda zimiksho shinithang pamsanga. Manglāwui pangshapna chitheimida athumna Paulli Jerusalemli mavaalu da hānga.

⁵ Kha apam chili ngasāmsangki kaji zimiksho peihaoda apam chi nothāhailaga ithumna vāki kajishong zatthuihaowa. Athum saikora preinaobing eina naoshinaobing ngasoda ithumli keinung kānshokta shamadruphei vāshungda ngasovai kala chili ithum saikora khuktizangda seihā sāruma.

⁶ Chiwui thili ithum akha eina akha kapāngtui hāngaroklaga ithumna marikhong kātonghao kala athumna shimli hanunghaowa.

⁷ Ithumna ithumwui shongzā zatmamānda Tyrewui eina Ptolemaisli vāshunga, chili shitkasangbingli vāsamphangda thangkha athumli ngasoda pamsanga.

⁸ Akhama kathā ithumna chiwui thot eina Caesareali vāshunga. Chili paokazata shiniwui ngachaili kazanga Philipwui shimli vāzunna.

⁹ Awui nao mafathuirang kaje ngalānao mati leisai, athumna phongkhami ot sai.

¹⁰ Ithumna chili pamsangda leilakha Agabus kaho marān akha Judeawui eina rai.

¹¹ Ana ithumwuili rāda Paulwui shānneira̱ khuilaga khalattawui aphei apāng khalaphailaga hānga, “Hi Manglā Katharana kahāngna; Shanneira̱ hiwui akhavāli Jerusalemwui Jihudibingna hithada khalaphailaga Gentilebingwui pāngli horsangmihaora.”

¹² Tui hi shālaga ithumnala kala apam chiwui mibingnala Paulli Jerusalemli mavākhavai poi.

¹³ Chieina Paulna ngahānkai, “Nathumna kachapla chapta iwui ning kaikhavai kasā hi khiot khala? Iva ili phātop kasangmāng maningla, Proho Jishuwui vang Jerusalemli thihaoga da khaleina.”

¹⁴ Ithumna ali mahāngkhuirarthuda “Prohowui kaphaning eina vaihaoranu” jihaowa.

¹⁵ Chiwui thili ithumna khangarān sākhuilaga Jerusalemli vākhavai zathaowa.

¹⁶ Kala Caesareawui eina kharā sākhangatha̱ kaikhala ithumli ngasovāda ithumna azunki kaje Cypruswui eina kharā Mnason, kharewui eina shitkasanga mi ngasāhairakasā chiwui shimli thānvai.

Paulna Jameswuili Khavā

¹⁷ Ithumna Jerusalemli vākashung tharan shitkasangabingna mathānthathup samngaroka.

¹⁸ Akhama kathā Paulna ithumli ngasoda Jamesli asamphang khavai vai kala chili churchwui ararbingla leisersai.

¹⁹ Paulna athum saikorali shālam sākhuilaga, Gentilebingwui alungli awui otram khangatha̱wui mangā eina Varena sāmi kahai saikora chi athumli hāngchithei.

²⁰ Athumna chi shālaga Vareli masochikata. Chieina athumna hānga, “Ivānao Paul, Jihudi thing kayākhana shitsanghaira kala athum ainli kayākha ningtongkhala kaji nana theipaira.

²¹ Gentilewui ngaleili okthuida khalei Jihudi saikorali Moseswui ain horhailaga nao ngarālila ahui marimshok khavai kala Jihudiwui shiyan-chikan mamayon khavai nana tamchitheia da athumli hānghaira ji.

²² Athumna na hili rāzanghaira kaji shāhairara, kathausikhala?

²³ Chieina ithumna kahāng chi sali. Hili tuingashit khuikahai mi mati leili;

²⁴ athumli ngasovaulu kala athumli ngarumda samatharkhuilu kala chiwui aman mihaolu, chithākha athum kui sitāpaira. Hithada kasā hi eina athumna nawuitungli hāngkakasot chi khamashung khikha maleimana kha nava ainwui athishurda okthuida lei kaji mi kachiva̱na theipaira.

²⁵ Kha shitsang kahaia Gentilebingwui vanga, ithumwui chānngazek athishurda meoma̱li pha̱kahai sā, ashee kazā, ngakhakkathi sā kashai kala khamathang-khamarang, hikathāthā hi masāphalungmara da ithumna chithi chihovāhaira.”

²⁶ Chieina Paulna athumli thānphungda akhama kathā athumli ngasoda sāmatharkhuilaga khorumshimli vāda athumwui tharkhangasakwui zimiksho katharān kupra kala athum ava̱va̱wui kachigat katharān mirakhala kaji athumli achishātmi.

Paulli Khorumshimli Tukkakhui

²⁷ Zimiksho shinithang peinanai khorumshimwui alungli Asia ngaleiwui eina kharā Jihudibingna Paulli thei. Athumna yaruili kasatsanglaga Paulli tukkhuida hānga,

²⁸ “Israelnaobing, ngachonmilu, apam kachiva̱li yaoung yaovālaga, Israelwui mibing, Moseswui ain kala khorumshimli makhamayā tamkachitheipa chi hina. Chili lāngda ana khorumshimlungli Gentilewui mi khuizanglaga tharkhamathengpam makhao ngasakhaira.”

²⁹ Kaja Ephesuswui eina kharā Trophimusli ana keinungli ngasokazat chi athumna theihaowa kala Paulna ali khorumshimli thānzanghaira da phaninghaowa.

³⁰ Khonkazar chi keinung ngayaonaphaowa kala mibingna ngasamrā ngaroklaga Paulli tukkhuida khorumshimwui eina shimenshokhailaga ngalāngda khorumshimwui ngaveibing chi shungserhaowa.

³¹ Yaruina Paulli sāthat khavai sāda leilakha, Jerusalem keinung khonzarhaira kaji pao Romewui shipai akhavāli shivātvai.

³² Shipai akhavā china ngalāngda shipai kathāna kala shipai kaikha khuiphungda yarui chili yongvai. Athumna shipaibing chi kathei eina Paulli shaokasā chi ngasāmhaowa.

³³ Akhavā china vālaga Paulli tukkhui kala marikhānghui khani eina khalaplu da kasoi. Laga ana athumli ngahānna, “Hi khipa, kala ana khi sāhao?”

³⁴ Ashangva̱ chiwui ngachaili kaikhana tui akha, khangatei kaikhana khangatei tui akha da kachichā matui eina matuingaroka. Chili pa̱khangapā leihaida akhavā chi khi shoklākhaokhala kaji maphākhuirarthuwa, chieina Paulli shipaiwui pamli khuiunghaoluda kasoi.

³⁵ Paulna chonchak shokkashung eina yaruina ngawunda nurkachup ngarokrāhaida ali shipaibingna ngazonkai.

³⁶ Shurkazata yarui china “Ali shaothathaolu” da vaozata.

Paulna Khalatta Kaphayet

³⁷ Paulli shipaibingna athumwui apamli khuizangki kaji eina ana shipai akhavā chili hānga, “Tui kateokha mahāngpairakhala?” “Na Greek tui matuilama?” da akhavā china hānga.

³⁸ “Chithākha achākachāng Sākathata mi thingmatili ngasoda lamhāngli rai sākhavai thānkashoka Egyptnaopa chi na maningmala?”

³⁹ Paulna ngahānkai, “I Ciliciawui Tarsusli kapharā Jihudinao akhana kala kahaka keinungwui ruichumnaona. Ili yarui hili khamatui ngasakmilu.”

⁴⁰ Shipai akhavā china mayāmida Paulna chonchakli nganingda mibing chili akhon mashok khavai pāng eina ingkit sai. Athum chingrihaira kaji eina Paulna athumli Hebrew tui eina matuiya.