OTSAK 18 - Kathara Bible (BSI)

Corinthli Khavā

¹ Hiwui thili Paulna Athenswui eina Corinthli vai.

² Apam chili, Pontusli pharākakhui Jihudinao akha Aquila hoda Italywui eina apreiva̱ Priscillali ngasorādhadharda leikasāpāli ana samngaroka, kaja awunga Claudiusna Jihudinao saikorali Romewui eina zathaolu da hukhum sāhairasai. Paulna anili ayang khavai vai,

³ kala athumwui pāngthemsak ngarumhaoda athum ngasopama kaja athum kachonshim kasā mina.

⁴ Ana sabbath kachida synagogueli ngayātlaga Jihudinaobing eina Greeknaobingli shitsang khavai hotnai.

⁵ Silas eina Timothy Macedoniawui eina rākazang chitharan Paulva Jihudinaobingli Jishu hi Khristalaka da shākhi milaga pao hākashokli ningsanglak eina sāsai.

⁶ Kala athumna ali ngasungda awuitungli zakkashishi phorlaga khamatui tharan, awui kachonwui chifa kathanrorlaga maringkaphā phongshoka kala athumli hānga. “Nathumwui ashee chi nathumwuitungli tāranu! Iwui khayon maleimana. Arui hi eina thuida ina Gentilebingli vaura.”

⁷ Chieina ana apam chi chihohailaga Titus Justus kaho Vareli shitkasanga mi akhawui shimli vai. Awui shimva synagoguewui ngalemchangli lei.

⁸ Synagoguewui akhavā Crispusna awui shimkhur saikorali ngasoda Proholi shitsanga, kala Corinthwui mi kachungkhana Paulwui pao chi shālaga shitsanga kala athumli ra̱hikmi.

⁹ Thang ngayakha Paulli Prohona rāmahāmida hānga, “Mangacheealu, tamchitheilu, kasaikha mapamhaialu;

¹⁰ kaja ina nali ngasomida lei, nali khipānakha ka̱lā mashingasakmara, kaja keinung hili iwui mi kachungkha lei.”

¹¹ Chiwui vang eina Paulna Varewui pao tamchitheida apam chili kum akha tangkhai pama.

¹² Kha Galliona Roman governor kasā chitharan Jihudinaobing khokkha sākhuilaga Paulli tukkhuilaga kārotli khuikāda

¹³ “Mipa hina ainli makhamayā pong eina Vareli khorum khavai suizata” da athumna phena.

¹⁴ Paulna matuiuki kaji eina Galliona Jihudinaobingli hānga, “He, Jihudinaobing, hiya kachikathā khayon lah yom sākahaiwui vang kaphena jisi kaja ina nathumwui tui chi nganāmipai;

¹⁵ kha hiya tuimatuiwui, amingkaphorwui kala nathumwui ainwui pongli ngayāt khangarok sāhaokada nathum khalatta ngazekhuilu. Hikathāwui vang bichar masāmirarmara.”

¹⁶ Chieina ana athumli kārotwui eina kashamshokhaowa.

¹⁷ Athumna synagoguewui akhavā Sosthenesli tukkhuilaga bicharpamwui mangāchangli shaowa, kha chithālala Galliona khikha matheimimana.

Antiochli Latkhaung

¹⁸ Paulna zimiksho kasāngkha Corinthli shitkasangbingli ngasoda pamsanga, kala chiwui thili athumli pākngarokhailaga Syriali marikhong eina vāhaowa, Priscilla eina Aquilala ngasovai kala Cenchreali sam achichapa kaja a tuingashit akha sāhaisai.

¹⁹ Chieina Ephesusli vai, kala anili chili haihailaga synagogueli zangda Jihudibingli ngayāt ngaroka.

²⁰ Athumna ali kasangda pamsang khavai poi, kha ana mamayāthuwa.

²¹ Kha ana zatuki kaji eina, “Varena mayāmiakha I rārāsānaoga” da athumli hānglaga mirikhong tongda Ephesuswui eina zatthuihaowa.

²² Ana Caesareali vākashung eina Churchwui mibingli shālam vāsākhui, laga Antiochli vāhaowa.

²³ Ana chili kapamsanglaga zatthuihaowa kala Galatia eina Phrygia ngaleili yaovāda shitkasanga saikorali athumwui shitkasang ngatarmei khavai kasatsangmi.

Apollosna Ephesus eina Corinthli Khavā

²⁴ Chitharan Alexandriali kapharā Apollos kaho Jihudi akha Ephesusli rai. Ava tui khayir kathema, kala Kathara Lairikwui tui theilak kahai mi akhana.

²⁵ Prohowui apongli tamchitheihaogada, manglāli khangaphumwui vang ana Jishuwui pongli matuida tāzak eina tamchithei. Chithālala a Johnwui ra̱kahikmāng thei.

²⁶ Ana synagogueli pinglak eina tamchitheiphoka. Chi Priscilla eina Aquilana shālaga ali hokhuida Varewui apongli mashungmeida tamchithei.

²⁷ Chieina Apollosna Achaiali vangaihaoda Ephesuswui shitkasangabingna Achaiali khalei shitkasangabingli ali samngarokhui khavai lairik kapisangmi. Ana chili vākashung chitharan lukhamashan mangā eina shitkasanga ngasā kahai athumli tarākha ngachonmi.

²⁸ Kaja Jishu hi Khristana da ana kathara lairikwui eina khuishoklaga yaruiwui ngaphat-ngayātli Jihudibingli maikashi mivai.