OTSAK 16 - Kathara Bible (BSI)

Timothyna Paul eina Silasli Ngasokhavā

¹ Paulna Derbe eina Lystrali vai. Chili Timothy kaho sākhangatha̱ akha leisai; ashāva̱ hi Jihudisālala Vareshi akhana kala avāva̱ Greeknaona.

² Lystra eina Iconiumli khalei shitkasangbingna Timothyli solaka.

³ Paulna Timothyli khuiphungkhangai eina ali ahui rimshokmi. Khiwui vangkhala kaja apam chili khalei Jihudi saikorana avāva̱ hi Greeknaona da thei.

⁴ Anina keinung keinungli vālaga Jerusalemli khalei paokazatbing eina ararnaobingna tuitak tākahai chi mayon khavai tamchithei.

⁵ Chieina churchbing chi shitkasangwui lungli pangsanga kala mishānla thangkachida mataisanga.

Troasli Paulli Rāmahākhami

⁶ Paul eina ali ngasokazatbingli Manglā Katharana Asia ngaleili pao hākashok hi khāmkahaiwui vang Phrygia eina Galatia ngalei peida yaovai.

⁷ Athumna Mysia kāroda vākashung tharan, Bithyniali vāzang khavai hotnai, kha Jishuwui Manglāna khāmhaowa.

⁸ Chieina athumna Mysia makānlaga Troasli tai.

⁹ Chithang ngayā Paulli mahākhami akha rāchithei: Macedoniawui mi akhana nganinglaga ali, “Macedoniali rāda ithumli ngachonmilu” da poi.

¹⁰ Ana chi theikahaiwui thili, ithumna Macedoniali vākhavai khangarān sāhaowa, khikhalajila apam chili khalei mibingli paokaphā hāshok khavai ithumli Varena hohaira da thei.

Philippili Lydia Ning Khangatei

¹¹ Chiwui vang ithumna Troaswui eina marikhong tonglaga angatar eina Samathrasli vai kala akhama kathā Neapolisli vāzanga.

¹² Chiwui eina ithumna Macedonia ngaleiwui hakmeikap kaje keinung Philippili vai; apam hi Romenaowui ramsom akhana. Ithumna chili zimiksho sha̱rākhathang pamsangda

¹³ Sabbaththang ngavei kānshoklaga seihā sākhavai apam samphanglapai da kongpheili vai. Ithumna chili pamzangda chili kazipkasā sha̱naobing chili tamchithei.

¹⁴ Ithumwui tui khanganā athumwui ngachaili kachon khamenga khayorva̱, Thyatirawui eina kharā Lydia kahova̱ zanga. A Vareli khokharumva̱ sha̱nao akhana, chieina Paulna kahāng chi ningsanglak eina nganā khavai Prohona awui wuklung shomi.

¹⁵ Ala, ashi shimkhurwui mibingla, ra̱hik kahaiwui thili, ana ithumli, “Nathumna I hi Proholi shitkasanga mina da phaningakha ishi shimli kharāpammilu” da hoi. Kala awui kahāng chili ithumla mayāhaowa.

Philippi Phātopli Sangkahai

¹⁶ Thangkha ithumna seihā sākhavai apamli vākida zatlakha sha̱ ngasoda, shokki kaji hāngkhamiva̱ rao sha̱nao akha samphanga. Ana shokki kaji hāngkhami eina awui akhavāli lupā tarākha pheiungmiya.

¹⁷ Ana Paul eina ithumwui thi shurda panglāk eina, “Huikhamiwui tuipong nathumli vaomalānkhame mibing hi Juikhamataiya Varewui raobingna” da vaopama.

¹⁸ Tui hi ana thangkachida hāngchingda, chieina Paulna ningrākhaida ngareiunglaga sha̱ chili hānga, “Jishu Khristawui ming singda ina nali sha̱nao chiwui eina shokhaolu da kakasona!” Chichangli sha̱ chi awui eina shokhaowa.

¹⁹ Rao sha̱nao chiwui akhavāna lupā pheikhuikapaiwui kachihān chi shimānhaira kaji kathei tharan Paul eina Silasli tukkhuilaga leihngapha̱li shimenshokta akhavābingwui mangāli khuivai.

²⁰ Athumna anili Romewui akhavābingli khuivāda hānga, “Mibing hi Jihudinaona, kala anina ithumwui keinungli khonzār ngasakta lei.

²¹ Anina ithumwui ainli makhamayā khangachāyan tamchithei; ithum Romewui ruichumnaona, chieina chikathā khangachāyan chi ithumna makhuisangpaimana lah mamayonpaimana.”

²² Kala yaruinala anili kaphen chili hāngsanga. Chieina bicharwobingna aniwui kashankachon serkhakmihailaga lijei eina ngaphit khavai hukhum mi.

²³ Marlak eina shaomi kahaiwui thili athumna anili phātopli sanghailaga phātop khamayonali ningkachang eina mayon khavai kasoi.

²⁴ Kakaso chiwui athishurda anili alunga phātop shimli khuizangda zurthing sanghai.

²⁵ Paul eina Silasna ngayāsailung atamli Vareli seihāla, masotlaala sai kala phātopli kazangbingna aniwui chi nganāpama.

²⁶ Kashuirak eina neina̱ khanukta phātop shim chiwui shimphung eina tangda nganukhaowa. Chili ngalāngda khamong saikora shohaowa kala mari khānghui saikora chi mi saikorawui eina ngalatāserhaowa.

²⁷ Phātop khamayona china thuikhamathuk eina phātop shimwui khāmong shoser kahai chi theilaga phātopli sangkahaibing yāmserhairara da phaninga. Chieina awui raighai sutshoklaga ngaronthat khavai sai.

²⁸ Kha Paulna panglāk eina vaoda hānga “Nakhalatta ka̱lāshi khavai masaalu! Ithum hili leiserli.”

²⁹ Phātop khamayona china thaomei pokhuilaga ngasamzangda kathirriri Paul eina Silaswui mangāli khuktizanga.

³⁰ Chiwui thili ana anili thānshoklaga hānga, “Amei khani, ina kahui samphang khavai khi sarakhala?”

³¹ Anina ngahānkai, “Proho Jishuli shitsanglu, chieina nala kala nashi shimkhurla kahui samphangra.”

³² Anina ali kala awui shimli khalei saikorali Prohowui tui hāngchithei.

³³ Chithang ngayā ana anili hoshokta aniwui khamā saikora sāmathāmi. Chithang ngayā ali kala awui shimkhurwui mi saikorali ra̱hikmihaowa.

³⁴ Chiwui thili ashi shimli thanungda kashakazā ngarānmi. Ashi shimkhur saikora khamathānna pemtinghaowa, khikhalajila athumna Vareli shitsanghaowa.

³⁵ Akhama ngathor kathā bicharwobingna, “Mibing chili chihohaolu” kaji hukhum chi hāngmi khavai police chihovai.

³⁶ Chieina phātop khamayona china Paulli hānga, “Bicharwobingna nanili chihohaolu kaji pao shirātrāhaira. Chieina ara nani shokpaira. Chingri eina zatulu.”

³⁷ Kha Paulna athumli hānga, “Bichar masālakla Romewui ruichumnao ithumli athumna yaruiwui mangāli shaowa kala phātop sanghai. Laga ara athumna ithumli ngathumsāda chishotralā? Masāpailakmara! athum khalattana rākhuishokranu.”

³⁸ Policebingna bicharwobing chili pao hi ahānga; kala ani Romewui ruichumnaona kaji kashā eina athum ngacheehaowa.

³⁹ Chieina athumna anili ning angatei kala phātopwui eina rākhuishoklaga keinung chiwui eina kathuimihaolu da anili poi.

⁴⁰ Paul eina Silasna phātopwui eina shokta Lydiawui shimli vai. Chili shitkasangbingli samphangda athumli katomkasangwui tui matuihailaga zathuihaowa.