OTSAK 15 - Kathara Bible (BSI)

Jerusalemli Hanga̱ Kapam

¹ Judeawui eina mi kaikha rālaga shitkasangbingli, “Moseswui ain athishurda ahui marimshokakha kahui masamphangmara” da tamchitheiphoka.

² Hiwui pongli Paul eina Barnabasna athumli panglāk eina ngaphata. Chiwui vang eina Jerusalemli khalei paokazatbing eina ararbingli ngachamkhui khavai Paul eina mi kaikha zangda ngasova khavai kapangkhui.

³ Churchna athumli chihovai kala athumna Phoenicia kala Samaria vākānda Gentilena Vareli kathada shitsanghaokhala kaji hāngchithei kala pao hina shitkasangbing saikorali mathān ngasaka.

⁴ Athumna Jerusalemli rākazang tharan church, paokazatbing, kala ararbing saikorana ringphālak eina vāngarokkhuiya, kala Varena athumli shichinlaga sākahai saikora athumna hāngchithei.

⁵ Kha Phariseewui mijang kasā shitkasanga kaikhana nganingkāda, “Gentilebingli ahui rimshokphalungra kala Moseswui ain mayon khavai hāngphalungra” da hānga.

⁶ Paokazatbing eina ararnaobingna tuipong hi machukrum khavai kazipa.

⁷ Sha̱rākha ngayāt ngarok kahaiwui thili Peterna nganingkāda hānga, “Ivānaobing, atam kasāngkha thuihaira, nathumwui ngachaiwui eina Gentilebingli paokaphā hāshok khavai ili Varena kapangkhui, kaja ikhamorwui eina athumna Varetui shālaga shitsanga kaji nathumna thei.

⁸ Kala mi kachiva̱wui wuklung katheia Varena ithumli khami thada athumlila Manglā Kathara khami hina Varewui khamayā chitheimihaira.

⁹ Ana ithum eina athumli ngatei khangasak maleimana, kaja shitkasangwui mangā eina ana athumwui morei pheomi.

¹⁰ Chithākha ithumwui avāva̱ ngarābingnala, ithumnala maphungkhararra otrom hi khisāda shitkasangabingwui khumkhorli chiphunhailaga Vareli chāng tamyangngaihaokhala?

¹¹ Ithumna shitsanga kaja Proho Jishuwui lukhamashan mangā eina athumli huikakhui thada ithumlila huikhuihaira.”

¹² Barnabas eina Paulna Gentilebingwui alungli Varena anili shichinlaga machut kala matakhak kahai ot sākahai hāngkachithei chi athumna shālaga vari eina pamhaowa.

¹³ Anina hāngkup kahaiwui thili Jamesna hānga, “Ivānaobing khanganāmilu!

¹⁴ Varena rida kathada Gentilebingli athumwui ngachaiwui eina awui miyur sākhavai kapangkhuilaga nganaomikhala kaji Simeonna hāngchitheihaira.

¹⁵ Marānbingwui tui eina hi ngaraichai kaja hithada kapihaida lei:

¹⁶ ‘Hiwui thili I latrāluira, kala Davidwui ja̱tā kahai shim chi sākāluira, ngayang kahai chi chiphokhuiluira, kala ngazipluishit ngasakra.

¹⁷ Chieina mi kateina kala iwui ming eina hokhui kahai Gentile saikorana Proholi phāra,

¹⁸ da achālakhawui eina saikora hi chitheimi kahai Proho china hānga.’

¹⁹ Chiwui vang eina, Vareli zangkahai Gentilebing hili khanang khangasak mamashungmana kaji, hi iwui kaphaningna.

²⁰ Kha athumna meoma̱li pha̱kaphayā makathara kashakazā mazākhavai, khamathang khamarangli mazang khavai kala ngakhakkathi sā mashai khavai lah ashee mazā khavai athumli chithi kapiphalungra.

²¹ Kaja atam kasāngkhawui vang sabbath kachida synagogueli Moseswui ain pāchinga, kala awui tuibing chi keinung kachida hāshoka.”

Shitkasanga Gentilebingli Khami Chithi

²² Chiwui thili paokazatbing eina ararnaobing kala church hupva zangda mi saikorana Paul eina Barnabasli Antiochli ngasovā khavai athumwui ngachaiwui eina mi kaikha kapangkhuisa da mayāngaroka. Shitkasangabingna khayāshilak kahai Barsabbasla kaho Judas eina Silasli kapangkhui,

²³ kala chithi chi hithada kapilaga anili sangmida chihovai: “Paokazatbing ararnaobing kala navānaobingna Antioch, Syria kala Ciliciali khalei shitkasanga Gentilebingli shālam mili.

²⁴ Ithumwui khamayā makhuila ithumwui mi kaikhana nathumwuili rālaga athumwui kahāng china nathumli khanang ngasakhaowa kaji ithumna shāhaira.

²⁵ Chieina ithum kazipngarumlaga ningkha sāda paokaphunga kapangkhuilaga kachiho phārada mayā ngarok kahaina. Ani ithumwui leikashiya Barnabas eina Paulli ngasorāra.

²⁶ Ani hiya Proho Jishu Khristawui vang mirin chigatchao kahai thathuiya.

²⁷ Chiwui vang eina ithumna Judas eina Silasli chihorāli. Anina ithumna kapi kahai hi mashunga da mashā eina rāhāngrāsāra.

²⁸ Nathumna sāphalungki kaji hili lāngda nathumli khiotkha eina makhananglui khangasakna phāmeira kaji hi Manglā Katharanala, ithumnala mayā ngarok kahaina.

²⁹ Chieina nathumna meoma̱li pha̱kahai sā mashaialu, ashee mazālu, ngakhākkathi sā mashailu, kala shām kasāli mazangalu. Hikathā hili mazang khavai ning ngasharakha nathum ringphāmeira. Mahaimeiranu.”

³⁰ Chieina athumna paokaphunga khani chili chihovāda Antiochli vākashung eina shitkasangabingli hokhuiserlaga chithi chi athumwui pāngli mi.

³¹ Athumna chithi chi pālaga, kasatsangkhamiwui chānpao chiwui vang khamathānna pemtinghaowa.

³² Judas eina Silas, anila marān sāthuda anina kasatsangmida avānaobing chili pangngsaka.

³³ Apam chili atam kasha̱kha ngasopamlaga athumna aniwuitungli chingri kahaiwui sokhami milaga anili chihokharābingwuili shiunhaowa.

³⁴ Kha Silasna chili pamfarada phaningda chieina pamhaowa.

³⁵ Kha Paul eina Barnabasna mi khangatei kachungkhali ngasoda Prohowui tui tamchithei kala hāshoka.

Paulna eina Barnabas Khangapāk

³⁶ Khaleilaga Paulna Barnabasli hānga “Keinung kachiva̱li yaovālaga, ivānaobing chi kathada leilikhala ayangsa.”

³⁷ Barnabasna John Markli hophungngaiya.

³⁸ Kha Paulna ali mahokaphungna phāmeira jihaowa, khikhalajila ana anili Pamphyliali nothāhailaga otla masāngarumluilakthuwa.

³⁹ Chili ani ngaphatreihaoda pākngarokhaowa: Barnabasna Markli thānkhuiphungda marikhong tongphungda Cyprusli vāhaowa.

⁴⁰ Kha Paulna Silasli kapangkhuida shitkasangabingna anili Prohowui lukhamashan pāngli horsangmilaga thuihaowa.

⁴¹ Ana Syria eina Cilicia ngaleili vālaga churchbingli pangsang ngasaka.