OTSAK 13 - Kathara Bible (BSI)

Barnabas eina Saulli Kapangkhuida Kachiho

¹ Chitharan Antioch churchli marānbing kala kachishutabing leisai, athum chiya Barnabas, Kazika kaho Simeon, Cyrenewui Lucius, Governor Herodli nganaokākhangaruma Mana-en, kala Saul athumna.

² Athum kakhum eina Proholi seihā sāda leilakha Manglā Katharana hānga, “Ina sāngasakkhangai ot chiwui vang Barnabas eina Saulli phaishokmilu.”

³ Chieina athumna kakhum eina seihā kasā kupkahaiwui thili aniwuitungli pāng khāngkāda seihā sāmilaga chihohaowa.

Cyprusli Pao Hākashok

⁴ Manglā Katharana kachiho athishurda anina Seleuciali vai kala chiwui eina marikhong tongkhuida Cyprusli vāzanga.

⁵ Athumna Salamisli vākashung eina Jihudiwui Synagogueli Varewui tui tamchithei. Aniwui ot kasāli ngachon khavai John Marklila thānphunga.

⁶ Athumna tara̱na kuinam kahai ngalei kachungkha kānvāda Paphosli vākashung tharan, Jihudinao akha Bar-Jishu hoda, meowor kathema kala minama marān akha samphanga.

⁷ Mipa hi, Varetui nganā khavai Barnabas eina Saulli hokahaia thangmeilak kahaia governor Sergius Paulusli ngasopamsai.

⁸ Kha meowor kathema Elymas (Chi Greek tuiwui amingna)na athumli mamayāmana kala governorli shitkasang chili mazang khavai khangarān sai.

⁹ Kha Saul, Paulla kaho china Manglā Kathara pemtinghaoda Elymasli mik taringda yanglaga hānga,

¹⁰ “Chipeewui naotun, khamashung saikorawui yangkashe, nava kachipat eina makaphāwui marei-marā kathemana. Prohowui khamashung shongfa mashongachei ngasakchingrala?

¹¹ Prohowui makhamayā nawuitungli leihaira; namik ngapeohaida zimikwui kahor atam kasha̱khawui vang matheimara.” Chili ngalāngda leichui khangapui thada amik tangmangtinghaowa kala ali thara̱zatmi khavai mi phaung phāvai.

¹² Kashok chi governorna kathei eina Prohowui pongli tamkachithei chi shālaga matakhakhaowa.

Antioch eina Pisidiali Hākashok

¹³ Chiwui thili Paul eina ali khangasobingna Paphoswui eina marikhong tonglaga Pamphylia ngaleiwui keinung Pergali vai. John Markna athumli, apam chili chihohailaga Jerusalemli latunghaowa.

¹⁴ Athumna Pergawui eina Pesidiawui Antiochli vāshunga, kala Sabbaththang athumna synagogueli akai.

¹⁵ Moseswui ain lairik kala marānbingwui lairik pākup kahaiwui thili synagoguewui akhavābingna anili pao chihovai, “Ivānao khani, nanina mibing hili kasatsangkhangai leiakha kasatsangmilu.”

¹⁶ Chieina Paulna nganingkāda pāng yailaga matuiphoka: “Vareli khokharuma Israelnaobing eina nathum Vareli khangacheebing, nganāmilu!

¹⁷ Israel yurwui Varena ishāvā ngarāli kapangkhuida Egypt ngaleili okthuilakha kahaka miyur sāngasaka. Varena athumli awui pangshap eina Egyptwui eina thānshoka,

¹⁸ kala lamhāngli zingkum hangmati athumli ja̱miya.

¹⁹ Ana Canaan ngaleiwui yur shinili sākazamhailaga awui miyurli ngalei chiwui akhavā sāngasaka.

²⁰ Saikora hi kum shāmati hangphangā sha̱kha zanga. “Hiwui thili Varena marān Samuel marāranglakha eina tangda wungva̱-wungvābing kapangsangmi.

²¹ Chiwui thili mibingna awunga akha poi, chieina Varena Benjamin shangli kapharā Kishwui naomayara Saulli kum hangmati mungkhavai mi.

²² Saulli khuishok kahaiwui thili Varena Davidli awunga sākhavai kapangkhuida hithada hānga: ‘Iwui kaphaning eina ngaraikachā ina sāngasakkhangai sāki kaje Jessewui naomayara David hina’.

²³ Varena ngashitmi kahai athishurda Davidwui naotun Jishuli Israel yurwui Huikhame sāngasakhaira.

²⁴ Jishuna marāranglakha Johnna moreiwui eina ning ngateida ra̱kahikwui tui Israelnao saikorali tamchitheihairasai.

²⁵ Kala Johnna awui ot kupnanaili hānga, ‘Nathumna ili khipāna da phaningkhala? Nathumna honda khalei chi I maningmana. Kha iwui thili a rārāda lei, awui pheihop khara̱ eina tangda khalāmikida I matik machāmana.’

²⁶ “Ivānaongarā, Abraham shimkhurwui naobing kala nathumwui ngachaili Vareli khangacheebing, huikhami chānpao hi ithumli shirātrāmihaira.

²⁷ Kaja Jerusalemli kapam mibing eina kathānabingna a Huikhamena kaji matheithuwa, lah sabbath kachida pāda khalei marānbingwui tuila bhap matāthuwa. Kha Jishuli khayon khami china marānbingwui tui chi ungshung ngasaka.

²⁸ Athumna awuitungli thikhavai shongrān masamphanglala shaothat ngasak khavai Pilateli poi.

²⁹ Kathara Lairikli hāngkahai saikora athumna ungshung ngasak kahaiwui thili krushwui eina khuitāda chikhurli chizana.

³⁰ Kha Varena ali kathiwui eina ringshok ngasaka,

³¹ kala Galileewui eina Jerusalemli ngasokakābing kachungkhali zimiksho kasāngkhawui vang awui azak chithei. Ara athumna mibingli awui shākhi mi.

³² Chiwui vang eina Varena ishāvā ngarāli ngashitmi kahai paokaphā chi nathumli khuirāmi khavai hili ithum leili,

³³ kala Jishuli ringshok ngasakta athumwui ara̱-azā ithumwui thotli ungshung ngasakhaira. Laa lairik kakhanelila hithada kapihai. ‘Na inaomayarana; aja̱ ina nali pharākhuihaira.’

³⁴ “Varena ali kathiwui eina ringshok ngasaklaga kashui maleiluimara kajiwui pongli hithada hānghaida lei; ‘Davidwui kathara makhangapata sokhami chi ina nathumli mira.’

³⁵ Chieina khangatei laa lairik akhalila ana hithada hanghai, ‘Nana nawui katharapa chili kashui mathei ngasakmara.’

³⁶ Davidna awui thotli Varewui kharin chi ungshung ngasakhailaga thihaowa, kala awui avāva̱ ngarābingli ngasoda chizana kala aphasā shuitāhaowa.

³⁷ Kha Varena ringshok ngasak kahaia a chiya kashui kaho matheimana.

³⁸ Chiwui vang eina ivānaobing, nathumli hi theikhui ngasakkhangaina kaja mi hipāwui mangā eina morei pheokhamiwui tui nathumli hākashokna.

³⁹ Moseswui ainna nathumli ningkhān masā ngasakkharar chi hipāwui mangā eina shitkasanga kachiva̱li ningkhān ngasakhaira.

⁴⁰ Marānbingna hāngkahai chi nathumli mashok khavai ningngasharlu;

⁴¹ ‘Yanglu, he mana̱shikazarbing! Nathum matakhakhaida shimānhaora, kaja ina aja nathumwui thotli kasā otsak hi, khangatei akhana hāngchitheilala nathumna mashitsangphāphāki kaji otsakna!’”

⁴² Paul eina Barnabasna synagoguewui eina zathaoki kaji eina khanaowa sabbaththangla chiwui pongli chungmeida rātamchitheilui khavai mibingna poi.

⁴³ Synagoguewui kazip ngathān kahaiwui thili Jihudi kachungkha kala Jihudi dharma khuisang kahaia Gentilebing kachungkhala aniwui thi shurrai. Anina athumli Varewui lukhamashanlungli leiching khavai katomda tamchithei.

⁴⁴ Khanaowui Sabbaththang keinung chiwui mi kachungkhana Varewui tui nganākida rākazipa.

⁴⁵ Yarui kachungkha kakazip chi Jihudibingna theilaga mikpaishihaowa kala athumna Paulna kahānghāng chili yetta ali kazeila zeiya.

⁴⁶ Kha Paul eina Barnabasna pingmeida hānga, “Rimeikapta Varewui tui hi nathumli hāngchitheiphalungki kajina. Kha nathumna katang makhavai mirin masamphangngaimada khalan kahaiwui vang, nathumli haiphungda ithum Gentilebingli vāhaora.

⁴⁷ Kaja Prohona ithumli kasoda hānga: ‘Ina nathumli Gentilebingwui kahor sāngasak kahaina, chieina okathui saikora hi huikhuipaira’ ”

⁴⁸ Gentilebingna hi kashā tharan athum mathānlakhaoda Varewui tuili sochikata, kala katang makhavai kharing samphang khavai tharchisin kahai athum kachungkhana shitsanga.

⁴⁹ Varewui tui chi ngalei saikorali ngayaovai.

⁵⁰ Kha keinungwui kathānabing eina khangatara khamaho sha̱naobingli Jihudinaobingna thara̱sanglaga Paul eina Barnabasli rekhareka kala aramwui eina kashamhaowa.

⁵¹ Chieina athumli makhamayā chitheida anina aniwui pheili chifa kakā chi kathangtāhailaga Iconiumli vāhaowa.

⁵² Kala sākhangatha̱bing chi khamathān kala Manglā Katharana pemtinghaowa.