OTSAK 10 - Kathara Bible (BSI)

Peter eina Cornelius

¹ Caesareali Italy Shipai kaho raimi shākhawui akhavā Cornelius hoda,

² awui shimkhurwui mi saikora zangda Vareli khangacheea, mibingli sailamlak eina mikashoka, kala seiha sāching kaje mi akha leisai.

³ Chithangwui pung kachiko sha̱kha katā atamli, Varewui kazingrao akhana awuili kharā chi tarārik eina mahāmida thei kala “Cornelius” da hoi.

⁴ Ana kazingrao chili ngacheerarang yanglaga, “Khikhala Amei” da hānga. Kazingrao china ngahānkai, “Nawui seihā kasā kala khangachon khamiwui otsak saikora chi Varewui mangāli phaningungkapai sāda kāshunghaira.

⁵ Ara Joppali mi chihovāda Simon kohopa Peter chili ahokhui ngasaklu;

⁶ ā shamadrupheili kapama, sāhui khamathena Simonwui shimli shimzun sāda lei.”

⁷ Kazingrao chi thuikahai eina Corneliusna awui rao khani kala shitkasang khangazipa shipai akha da athumli hokhui.

⁸ Shokkahai saikora chi ana athumli hāngchitheilaga Joppali chihovai.

⁹ Akhama kathā athumna shongfa zatmamānda Joppali rāshungnanai, ngashunlung atamli, Peterna seihā sākhavai dolāntungli kai.

¹⁰ Ali thaihaoda khikhikha shaingaihaowa; kashakazā ngarān mahungda leilakha ali pingairisihaowa;

¹¹ chitharan kazingram shohailaga kachon kahaka kathā akhawui chonmarei matili singlaga okathuili chihokatā ali mahāmi.

¹² Chiwui alungli sāyur saikorala, phara̱-pharāyur saikorala kala vānaoyur saikorala zangsera.

¹³ Kala akhon akhana ali hānga, “Peter, thuishaothatshailu.”

¹⁴ Kha Peterna hānga, “Ngga, Proho, I makathar lah khamakhao ot akhala mashailakranga”

¹⁵ Kha akhon china hāngluishita, “Varena tharngasak kahai hili nana khamakhaoana majipaimara.”

¹⁶ Hithada kathum shihailaga ot chi kazingram khuikāluihaowa.

¹⁷ Mahākhami chi khikhala da Peterna chukmajalakha, Corneliusna chihokhavā mibing china Simonwui shim ngathingrāmamānlaga ashiwui ngaveili nganingsai.

¹⁸ Kala athumna ahokhuilaga “Peter kaho Simon chi hili maleikhala?” da ngahāna.

¹⁹ Mahākhami chi Peterna phaningkachungda leilakha, Manglāna ali hānga, “Simon nali mi kathumna phāda leili.

²⁰ Chieina ngakarthuida tālaga ning kachihui maleila athumli ngasothalu, kaja ina athumli chihokharāna.”

²¹ Chieina Peterna zanghānga, “Nathumna phāda khalei mi chi ina, khiwui vang kharākhala?”

²² Athumna hānga, “Shipai shākhawui akhavā Corneliusna chihokharāna. Ava Vareli khokharuma kala Jihudi yur katongana kasoa kaphā mi akhana. Nali awui shimli hounglaga nana hāngmikhangai chi nganākhui khavai Varewui kazingraona nali ahokhuilu da ali hānga.”

²³ Chieina Peterna athumli hozangda chithang ngayā awuili simzun sāngasaka. Akhama kathā athumli ngasovai kala Joppawui einala avānao kaikhala ngasovai.

²⁴ Khanaothang kathā Caesareali vāshunga kala Corneliusna awui athei-asābing eina khamashit ngasotnaobingli hokhuilaga ali ngaraipamsai.

²⁵ Peterna shimlungli kazang eina Corneliusna ali samngarokkhuida awui pheizingli khayākashi eina ngakhumshamzanga.

²⁶ Kha Peterna ali khāngmathotta hānga, “Ngakarthuilu, ila mikumo akhana.”

²⁷ Ana Corneliusli ngazekmamānda shimlung kazang eina mi tarākha kazipkasā ana zangthei.

²⁸ Ana athumli hānga, “Jihudi akhana Gentile akhawui shimli khavā lah khangaso hi masākapai otna kaji nathumna thei. Kha mi khipālikha matharmana lah khamakhaoana da makhuipaimana kaji hi ili Varena chitheimihaira.

²⁹ Chiwui vang eina ili rākaho tharan ningkhamaong maleila ina kharāna. Ara ili khiwui vang rākahokhala kaji hāngmilu.”

³⁰ Chieina Corneliusna hānga, “Matithang shānghaira, arui atam himaikha ina iwui shimli pung kachikowui seiha salakha; yanglu, kahāna kachon khangavai mi akha kashuirak iwui mangāli ranganingda

³¹ hānga, ‘Cornelius, Varena nawui seihā kasā shāhaira kala nana khangachon khamiwui ot sākahai chi ana phaningungmira.

³² Kachikathāli Joppali chihovāda Peterla kaho Simonli aholu. Shamadrupheili kapama, sāhui khamathena Simonwuili ā shimzun sāda lei.’ ji.

³³ Chiwui vang eina ina nawui pamli mi hengsāda chihovai, kala nana lumashanmida rāmi kahai hi phālakhaira; Prohona nali hāngmi ngasak khavai kaso kahai chi nganākhui khavai ithum saikora hili kakazipna.”

³⁴ Chieina Peterna hāngphokuwa, “Ara ina thei kaja Vare hiya mimai mayangmana,

³⁵ kha yur kachivawui eina ali khangachee mi kala khamashunga ot kasābingli ana mayāsera.

³⁶ Saikorawui Proho Jishu Khristawui mangā eina chingri kahaiwui paokaphā hāngchitheida Varena Israelnaobingli chānpao chihokharā nathumna thei.

³⁷ Johnna ra̱kahikwui chānpao hāshok kahaiwui thili Galileewui eina haophoklaga Judea ngalei katongali khamataia otshot shokkahai chi nathumna thei.

³⁸ Nathumna Nazarethwui Jishuwui pongli kala kathada Varena awuitungli Manglā Kathara kala pangshap heirormikhala kaji thei. Ana apam saikorali vāda kaphā ot sai kala kameo kazangbing saikorali raimi, kaja ali Varena ngasomi.

³⁹ Ana Israelwui ngaleili kala Jerusalemli sākahai ot saikorawui shākhi chi ithumna. Athumna ali krushtungli shaoshānda sāthathaowa.

⁴⁰ Kha Varena kakathumathang kathiwui eina ringngasakta phongshar eina chitheimi,

⁴¹ chi mi saikorali theikhangsak maningmana, kha ana kathiwui eina ringshok kahaiwui thili ali ngasoda phāshak-phazā khangaruma, Varena kapangkhui kahaia shākhi kasābing ithumli theikhangasakna.

⁴² Kala kharingabing eina kathebingli bichar sāmi khavai Varena ali kapangkhui kahaina kaji mibingli shākhi sākhavai kala hāshok khavai ithumli ana kaso kahaina.

⁴³ Marān saikoranala awui pongli shākhi sai kaja ali shitkasanga mi kachiva̱na awui ming chiwui mangā eina morei pheokhami samphangra.”

Gentilebingna Manglā Kathar Samkaphang

⁴⁴ Peterna tui hi hāngmahunglakha, pao hi kashā saikorawuitungli Manglā Kathara tāshunga.

⁴⁵ Peterli ngasokharā ahui rimkashokbingwui eina shitkasang Jihudibing chi matakhakhaowa, kaja Varena Gentilebinglila Manglā Katharawui lemmet tāshungmi.

⁴⁶ Kaja athumna tuiyur khangatei eina khamatui kala Vareli sokachikat chi athumna shai. Chiwui thili Peterna hānga:

⁴⁷ “Ithumna Manglā Kathara samphang kahai thada mibing hila samphanghaira. Athumli tara̱li ra̱hikmikida khipāna khāmshaprakhala?”

⁴⁸ Chieina ana Jishuwui ming singda ra̱hik khavai athumli kasoi. Chiwui thili athumna ali zimiksho kasha̱khawui vang ngasopamfasa da poi.