NEHEMIAH 9 - Kathara Bible (BSI)

Mibingna Morei Hāngkaphat

¹ Kachāng chiwui maga̱da khamatethang, Israelwui mibingna kakhum eina pamda, bora ngavailaga kuili ngaleila neoda kazipa.

² Kala Israelnaobingna khangatei kha̱mibingwui eina ngateishokkhuilaga athumwui moreiwui vang, kala avāva̱ ngarāwui khayonkhamāng sākahai chiwui vang ningngateida hāngphata.

³ Kachichāwui pamli nganingda athumwui Vare Prohowui ain lairik chi ngashun eina tangda pai; kala chiwui thili pung kathumwui vang athumna Proho Vareli hāngphatta khoruma.

⁴ Levinaobingwui nganing khavaili Jeshua, Bani, Kadmi-el, Shebaniah, Bunni, Sherebiah, Bani, kala Chenanina nganinga; kala athumwui Proho Vareli panglāk eina vaoda seihā sai.

⁵ Chiwui thili Levinaobing, Jeshua, Kadmiel, Bani, Hashabneiah, Sherebiah, Hodiah, Shebaniah, kala Pethahiah, athumna hānga, “Katang makhavaiwui eina katang makhavai Proho nathumwui Vareli sochikatlu. Masotla, khayākakāla saikorawuitungli khaleia amingli sochikatranu.”

Hāngkaphat Seihā

⁶ Kala Ezrana hānga, “Proho chi nalāka, namānga; kazingla, kazingramwui kazingramla, kala chiwui alungli khalei ashangva̱la, okathui kala chili khalei saikorala, shamadrubing kala chiwui alungli khalei saikorala nana sākhuilaga phārimiya; kala kazingramli khalei ashangva̱na nali khoruma.

⁷ Na Prohona, Chaldeawui Ur eina Abramli hokhuida Abraham phokkhame Vare chi nalaka;

⁸ kala nawui miktāli awui ningkatong chi thei, kala Canaanwui, Hitwui, Amorwui, Perizwui, Jebuswui kala Girgashwui ngalei, awui ara̱-azāli mira da nana tuingashit sai; kala nawui ngashit kahai nana ungshung ngasaka, kaja na khamashung khangarongana.”

⁹ “Ishāvā ngarāna Egyptli ringkashi nana theimi, kala Red seali athumwui khangakao shāmi;

¹⁰ kala Pharaohli, awui raobingli, aramwui mi saikorali matakhak kahai otsak kala khamachut kachungkha sāchithei; kaja athumna ishāvā ngarāli sāshilak eina sai kaji nana thei; kala aja rāshungda nawui vang sākakhui naming khalei hina.

¹¹ Kala athumwui mangāli nana shamadru ngakaimihaida shamadrulungli ngalei kathengtungli athumna zatvai; kala shamadruva̱ tara̱lungli lungguinao horkasang thāda kakharomabingli kathukali horsanga.

¹² Muiyāwui pākra̱ eina nana athumli ngashun thānzata, kala ngayā hormi khavai meiwui pākra̱ eina athumna vāki kaji apamli thānzata.

¹³ Nana Sinai Kaphungli tāda kazingramwui eina chan ngazeka, kala mashun shiyan eina khamashunga ain, kala kaphā chikān eina ningkhami mi;

¹⁴ kala nawui kathara sabbath athumli theikhui ngasaka kala ainla, shiyanla nawui rao Mosesli hāngmi ngasaka.”

¹⁵ “Athum kathaiwui vang nana kazingramwui eina kashakazā mizai kala ra̱kachangwui vang lunghārwui eina tara̱ shokngasaka, kala nana athumli mirada ngashit kahai ngalei chi akhui khavai hāngmi.”

¹⁶ “Kha athum kala ishāvā ngarāna sākhangai sāda ngakaishilaga nawui ningkhami mamayonmana;

¹⁷ kahāngla manganāmana, kala nana athumli matakhak kahai ot sākachithei saikora chi athumna maphaningungmana; kha athumna ngakaishida Egyptli rao asalui khavai athum khalattawui kathāna phāsanga. Kha nava huimikhangaiya, lumashanmikhangai, malung mathuikazāra kala leikashi makhangacheina kapema Varena.

¹⁸ Athumna seiwui meoma̱ heikhuilaga, ‘Egyptwui eina thānshokkhame nathumwui Vare chi hina’ da hakkhamahā kachipat ot kachungkha sai,

¹⁹ nawui hakkhamahā lukhamashan chiwui alungli nana athumli lamhāngli leilakha mahorhailakmana; shongfa thānkazata muiyāwui pākra̱ chi ngashun athumwui eina mapākthuihaimana, athumwui vāki kaji shongli hormi khavai meiwui pākra̱la mapākthuimana.

²⁰ Athumli tamchithei khavai nawui kaphā Manglā chi mi, kala nawui mannala athumwui khamorwui eina makhuithuihaimana; kala athumwui ra̱kachangwui vang tara̱la mi.

²¹ Kum hangmati nana athumli nganaomi, kala athumna khikhanida mavatmana; athumwui kashankachonla makākmana, pheila khawor mavaimana.”

²² “Kala nana athumli wungrambingla, mibingla mi, ramla achikun-achikai vāshungda samphang ngasaka; chieina athumna Heshbonwui awunga Sihonwui ngalei eina Bashanwui awunga Ogwui ngalei samphanga.

²³ Athumwui ara̱-azā kazingramwui sirāyākha nana mayāsangmi, kala avāva̱ ngarāli zangda zangkhuilu kaji ngalei chili thānvāmi.

²⁴ Chieina ara̱-azāna apam chili vāda akhui kala athumwui mangāli leikasā Canaannaobingli nana yuingasaka, kala athum sākhangai chi sākhavai athumwui pāngli awungabingla, mibingla horsangmi.

²⁵ Kala athumna raipan ngaveiphin kahai keinungbing kala ngalei katuma lam yuikhui, kala athumna shimli leikasā khamathā ot kachungkha, khonkhui kahai ra̱khong, drakhā yāmgui, olive yāmgui, kala atheirong ayur kachungkha samphanga; chieina kathokachir samphangda thaoaowa, kala nawui khamathā otsak chili athum ningyāngkhaung samphanga.”

²⁶ “Chithālala athumna kahāng manganāmada nali ngakaishilaga nawui ain nothahaowa kala nali hanung khavai hāngkhamathin nawui marānbinglila shaothata, kala kachipat ot kachungkha sai.”

²⁷ Chiwui vang athumli nana khanang khangasaka athumwui yangkashebingwui pāngli horsangmi; athumwui kakhanang atamli athumna nali ngakaoda nana athumli kazingram eina shāmi; kala nawui hakkhamahā lukhamashan athishurda athumwui yangkashebingwui eina huimi khavai huikhami chihorami.

²⁸ Kha chiwui thili athumna ngasāmkhui kahai thili nawui mangāli makaphā saluishithaowa, kala nana yangkashebingwui pāngli horsangmilui; chiwui vang yangkashebingna athumli munga; kha athumna hanungda nali khangakao tharan kazingram eina nana shāmi; kala nawui lukhamashan athishurda kachungkha shida nana athumli ngatangmi.

²⁹ Kala nawui ainli hanung khavai nana athumli hāngmathinmi. Chithālala athumna sākhangai sāda ngakaishitingting nawui ningkhami mamayonmana; kha mi akhana mayonda ringkhavai nawui sharphahorbing chili morei sai, kala ngakaishilak eina manganāsangmana.

³⁰ Kum kasāngkha nana athumli yangmi, kala nawui Manglānala marānbingli hāngmathin ngasaka, kha athumna manganāsangmana. Chiwui vang ngalei chiwui mibingwui pāngli nana horsangmi.

³¹ Chithālala nawui reikhamatai lukhamashan alung chili nana athumli mashimān ngasakmana horkahaila mahorhailakmana; kaja nava lukhamashan leikashi Varena.

³² Chiwui vang ara, “Ithumwui Vare, sāshap pangshapa, kala khangachee-khangachā Vare, tuingashit eina leikashi makhangachei mayonkhame, Assyria awungawui thot eina thuida aja rāshungda ithumli, awungabing, wungnaobing, pāngmonbing, ishāvā ngarā, kala nawui mi saikorawuitungli kachotkachāng katā saikora hi teolak eina makhuimiaranu.

³³ Kha ithumwuitungli kharā saikora hi mashun eina sāmi, kaja nana ningtonglak eina kasāna kha ithumpāna maphālakla kasāna;

³⁴ ithumwui awungabing, wungnaobing, pāngmonbing, kala ishāvā ngarāna nawui ain mamayonthuwa, nawui ningkhami hāngkhamathinla makhuisangthuwa.

³⁵ Nana khami ngalei katum, athumwui wungramli pamda leilakha eina tangda athumna nali otram mangatha̱mimana kala makaphā otsakwui eina mai mangareiungthuwa.”

³⁶ Yanglu, aja ithum raonao sāda lei; athei-arai, kala khamathā, ringphā khavai ishāvā ngarāli nana mikahai lam chili, yanglu, ithumna mirao sāda lei.

³⁷ Ithumna morei kasāwui vang, lam chiwui athei-arai kachungkha samkaphang chi, nana ithumwuitungli mungkhangasaka awungabingwuili thuingasakhaowa; ithumwui phasā kala sha̱keiwuitunglila athumwui sakhangaingai sākhavai pangshap lei, ithum chotnākachanghaira.

Ain Mayon khavai Tuingashit

³⁸ Saikora hiwui vang eina ithumna tuingashit saklak eina sāda lairikli kapihai, kala ithumwui wungnaobing, Levinaobing, kala pāngmonbingna chiwuitungli mahor nama.