NEHEMIAH 8 - Kathara Bible (BSI)

Ezrana Ain Pākhami

¹ Kala mi saikora akha sāda Tara̱ Ngaveiwui yāngreili kazipa; kala athumna ain kathema Ezrali Prohona Israelli mikahai Moseswui ain lairik chi khuirālu da hānga.

² Kachāng kashinewui kharethang, pāngmon Ezrana yarui kazipli ain chi, sha̱naola mayarnaola, shākhuitheishap saikorawui mangāli khuirai.

³ Tara̱ Ngaveiwui yāngreivāk ngareivāda, ngathor eina thuilaga ngashun eina tangda, sha̱naola, mayarnaola theikhuishap saikorawui mangāli pāchithei; kala mi saikora ningsanglak eina ain lairik chi nganākhui.

⁴ Kazip chiwui vang nganing khavai, thing eina sāmi kahai tārongnao chiwuitungli ain kathema Ezrana kānganinga; kala awui ngalemli, Mattithiah, Shema, Anaiah, Uriah, Hilkiah, kala Ma-aseiah longna awui yāshong nganinga, kala Pedaiah, Misha-el, Malchijah, Hashum, Hash-baddanah, Zechariah, kala Meshullam athumna awui uishong nganinga.

⁵ Kala Ezrana mi saikorawui mikyanli lairik chi hārshoka, kaja ana mi saikorali juimeida nganinga; ana hārkashok tharan mi saikorana nganingkai.

⁶ Reikhamateiya Vare Proho chili Ezrana sochikata; kala saikorana, “Amen, Amen” da pāng khāngkāda ngahānkai, kala athumna ngaleili kui mashunzangda Proholi khoruma.

⁷ Kala mibingna kachichāwui pamli pamda, Jeshua, Bani, Sherebiah, Jamin, Akkub, Shabbethai, Hodiah, Ma-aseiah, Kelita, Azariah, Jozabad, Hanan, Pelaiah, kala Levinaobingna ain chi theikhui khavai mibingli ngachonmi.

⁸ Kala athumna Varewui ain chi lairik chiwui eina tharzā eina pāchitheida mi saikorana theishingkhui.

⁹ Rammunga sākasa Nehemiah, Ezr pāngmon kala ain kathema, kala mibingli tamkachitheia Levibingna mi saikorali hānga, “Aja hi nathumwui Vare Proho wui vang kathara zimikshona, masifalu kachapla machapngachālu.” Kaja mibingna ainwui tui chi kashā tharan athum saikorana chaphaowa.

¹⁰ Chiwui thili ana athumli hānga, “Kachichashi shimli ungda athao ungshailu kala kashima drakhāra̱ ungmanglu kala kazā khamang khangarān makasābingli yar sālu; kaja aja hi Proho wui vang tharkhamatheng zimikshona; wuk makhanangalu, kaja Prohowui khamathān hi nathumwui pangshapna.”

¹¹ Chieina Levinaobingna mi saikorali chingrihai ngasakta, “Kasaikha pamlu, kaja aja kathara zimikshona; wukmakhanangalu” da hānga.

¹² Chieina mi saikorana phāshak phazā khavai kala makhaleibinglila yar chihovāda lumlao khavai ungserhaowa, kaja athumli kahāng tui chi athumna theishingkhui.

Ram Phanit

¹³ Kakhane thang, mi saikorawui avāva̱ ngarā shimkhurwui wungva̱bing, pāngmonbing kala Levinaobingli ngasoda ain tuibing chi mathameida tamkhui khavai Ezra, ain kathemawui ngalemli akazipa.

¹⁴ Kala Prohona Mosesli ningmi kahai ain lairikli hithada kapi kahai samphanga, chiya, kashine kachāngwui phanit atamli Israelwui mibingna rāmnaoli apamki kajina,

¹⁵ kala athumwui keinung kachiva̱li kala Jerusalemli vaomalānda chishatra chiya, “Ainli kapi kahai thada kaphungli vālaga, rāmnao sākhavai ramthingwui olivephāng, ramwui olivephāng, myrtlephāng, khaneinā kala khangatatei thingphāng khuiunglu.”

¹⁶ Chieina mibingna areokhuilaga khalattawui rāmnao sākhui, kayānglila, Varewui shim kayānglila, Tara̱ Ngaveiwui yāngreili, Ephraim Ngaveiwui yāngreilila sākhui.

¹⁷ Kala raithā kahaiwui eina latkhaungbing athum saikorana rāmnao sākhuida chili pamsera; kaja Nunwui nao Jeshuawui thot eina thuilaga chithang rāshungda Israelnaobingna hithāda masālaksāmana. Kala atam chili athum mathānlakhaowa.

¹⁸ Kala kharethang eina thuilaga khanaowathang eina tangda, ana thang-thang Varewui ain lairikwui eina pāchitheichinga. Athumna phanit shinithang mayona; kala kachishatathang, shiyan athishurda ningzaori kahai kazip kazipa.