NEHEMIAH 5 - Kathara Bible (BSI)

Kachāmbingli Kashiren

¹ Khaleilaga mibingla, preiva̱ ngarāla Jehudinaobingli mamayāmada khonzārhaowa.

² Athumwui ngachaili kaikhana hānga, “Ithumwui naomayara ngarā kala naongalāva̱ ngarā zangda ithum chungnāhaira; ithum ringkhavai māngum milu.”

³ Kaikhana, “Kashakazā makhaleiwui vang māngum samphang khavai luila, yāmguila, shimla, hamserhaira;” da hānga.

⁴ Khangatei kaikhana hānga, “Awungali lui kala drakhā yāmguiwui shai mikhavai pheisā shuksanghaira.

⁵ Ithum ara chinaongarā ngasāserhaoda, inao naongarābingla athumwui naongarā kathāna; chithālala ithumna naomayara kala naongalāva̱ ngarāli miwui raonao tandi eina sāngasakta lei, kala ithumwui naongalāva̱ kaikhava raonao ngasāthuihaira; kha hili ngachon khavai ithumwuili pangshap maleithura, kaja khangatei mina ithumwui lui kala drakhā yāmgui khuihaira.”

⁶ Athumwui ringkhangā kala tuibing chi kashā tharan I malungvātlakhaowa.

⁷ I khalatta chukmajalaga, wungnaobing eina otva̱bingli ina khayon phenda hānga, “Nathum khalatta nachinā ngarāli atar khuizādalei.” Kala ina athumwuitungli makhamayawui kazip kahakva̱ akha sai,

⁸ kala athumli hānga, “Ithumna kashap eina tangda, yur khangateibingli yorsang kahai Jehudi achinā ngarā lokhuiluishithaira, kha nathumwui nachinā ngarā eina tangdali yorhaida ithumna lokhuiluishit khavai sādalei!” Athumna khituikha ngahānkā khavai maleithuda kasaikha pamhaowa.

⁹ Chieina ina hānga, “Nathumna sāda khalei ot hi maphāthura. Ithumli yangkashebingwui zeikakharui malei khavai, ithumwui Vareli ngacheeda maokthui ngayimala?

¹⁰ Chili lāngda I kala ichinā ngarāna kala iwui raobingnala pheisā kala māngum athumli chishutpamda lei. Ithum atar kakhui hi thāhaosa.

¹¹ Athumwui lui, drakhā yāmgui, olive yāmgui, kala shimla, aja zimik hanshokmiserhaolu; kala shāshāwui eina tārkakhui pheisā, kashakazā, drakhāra̱, kala thao nathumna khuikahai chila hanmiserhaolu.”

¹² Chieina athumna hānga, “Ithumna hanmiserhaora, kala athumwui eina khikha makhuiluimara. Nana kahāng thāda ithumna sāra.” Kala ina pāngmonbingli hokhuida athumna ngashit kahai thāda khangashit sāngasaka.

¹³ Ila iwui kashānli neikahai kachon chi kathantāda hānga, “Ngashit kahai hithāda makasā mi chili Varena ashi shimkhurwui eina kala awui kasāsā ot saikorawui eina kathantāranu. Kathantāhaida khamasai eina pamranu.” Mi kazip saikorana, “Amen” da hānglaga Proholi masot chigata. Kala athumna ngashit kahai thāda sai.

Nehemiahna Khalattawui vang Makaphaning

¹⁴ Chili lāngda, ili Judah ngaleili rammunga sangkaphok eina thuida, Ar-ta-xerxes awungawui khamaga̱ kum eina thuilaga thumrāda khani eina tangda, kum tharāda khani, I eina ichinā ngarā rammungawui zākhavai talop mazālakmana.

¹⁵ Iwui mangāli leikasā khare rammunga sākasābingna mibingli ot chotlak eina sāngasaksai, zātla, drakhāra̱la ngashaikhui; chili lāngda shekel hangmatitila khui. Athumwui raobingnala mibingwuitungli akhavā sai. Kha iva Vareli khangacheewui vang chithāda masāmana.

¹⁶ Ila phākho kasā chili zanga, lamla makhuimana; iwui raobing saikorala ot kasā chili zanga.

¹⁷ Chili lāngda ili phazākhangarum mi shākha hangphangāna, Jehudinaobing kala otva̱bing, chili lāngda ithumwui kuikhamareili khalei yurbingwui eina kharābing zanga.

¹⁸ Chitharan thangthangwui zākhavai khangarān chili mukkā akha, asā kakā yao tharukna; iwui vang harnaobingla taithatmi, kala zimiksho katharāthang drakhāra̱la mavātla ngarānmi; chithālala ina rammungawui talop chi mapomana, khikhalajila mibingwui otphun chi ritlaksai.

¹⁹ Mibingwui vang ina kapha ot kasā hiwui vang, ili kaphaningungmilu, O iwui Varivara.