NEHEMIAH 3 - Kathara Bible (BSI)

Jerusalemwui Phākho Sākakā

¹ Eliaship pāngmon kharei china thānda athum chinaongarā pāngmonbingna Yao Ngavei sakai. Chi athumna tharchigata kala khāmongla sāsanga; athumna Shākhawui Raikānphung, Hananelwui Raikānphung vāshungda tharchigata.

² Chiwui eina vameida Jerichowui mina sakai. Chiwui eina vameida Imriwui naomayara Zaccurna sakai.

³ Hassenaahwui naomayarabingna Khai Ngavei sakai, athumna khāngenla makharsangda khāmongla, veiruithingla, lonkhavaila sāsangsera.

⁴ Athumwui thili Hakkozwui naomayara Uriahna kapharā Meremothna chiphoi. Athumwui thili Meshezabelwui nao Berechiahna kapharā Meshullamwui naomayarabingna kachiphona. Athumwui thili Baanawui nao Zadokna chiphoi.

⁵ Athumwui thili Tekoinaobingna chiphoi, kha athumwui wungnaobingna Prohowui ot kasāli ning masangmana.

⁶ Paseahwui nao Joiada eina Besodeiahwui nao Meshullamna Kachama Ngavei sai; athumna khāngenla makharsangda khāmong lonkhavai, kala veiruithing sāsangsera.

⁷ Kala athumwui thili Gibeonwui Melatiah eina Meronothwui Jadon, kala Kong Makanda khalei rammungawui azingli khalei Gibeon eina Mizpahwui mibingna chiphoi.

⁸ Athumwui thili Harhaiahwui nao sinā kasema Uzzielna chiphoi. Chiwui thili thao kashunga Hananiah zanga; kala Khamashā Phākho vāshungda athumna sākhui.

⁹ Athumwui thili Hurwui nao Rephaiah, Jerusalem ngalei ngakaipak khamungana chiphokhui.

¹⁰ Athumwui thili Harumaphwui nao Jedaiahna awui shim yangkhangasungli chiphoi; kala awui thili Hashabneiahwui nao Hattushna chiphokhuiya.

¹¹ Harimwui nao Malchijah eina Pahath-moabwui nao Hasshubna akai akha kala Sha̱rkha̱wui Raikānphung chiphoi.

¹² Athumwui thili Halloheshwui nao Shallum, Jerusalem luiramwui ngakaipak khamunga eina anao ngalāva̱ ngarāna chiphokhui.

¹³ Hanub eina Zanoahwui mibingna Tampāk Ngavei chiphoi; athumna chi chiphoda khāmong, lonkhavai, veiruihaila sasangserda sakālui, kala ashina kachipho Thothap Ngavei vāshungda khuining thingkha kāshunga.

¹⁴ Rechabwui nao Malchijah, Beth-haccherem leiretli khamunga china Thothap Ngavei chiphomi; kala ana khāmong, lonkhavai, veiruithing sāsangsera.

¹⁵ Colhozehwui nao Shallum, Mizpah luiramli khamunga china Ura̱ Ngavei chiphoi; ana sakāluida ngaveimithai kala khāmongla sāsanglaga lonkhavaila, veiruihaila sāsangsera; kala ana awungawui yāmguili khalei Shelah Ra̱khongwui phākhola ana sāda, Davidwui Keinung eina tākhavai chonchak vāshunga.

¹⁶ Awui thili Azbukwui nao Nehemiah, Beth-zur luiram ngakaipak khamunga china Davidwui chikhur mai khangasung apam akha, khonkakhui ra̱khongpam kala kapingabingwui shim vāshungda ana chiphoi.

Phākho Kasā Levinaobing

¹⁷ Awui thi Levinaobingna chiphoi: Baniwui nao Rehum; awui thili Keilah luiram ngakaipak khamunga Hashabiahna awui leiretwui vang chiphoi.

¹⁸ Awui thili achinā ngarāna chiphoi: Keilahwui luiram ngakaipak khamunga, Henadawui nao Bavvai;

¹⁹ awui thili Jeshuawui nao Ezer, Mizpahli khamunga china apam akha khutlaipamli yangngasungda kakā Achikun chi chiphokhui.

²⁰ Awui thili, Zabbaiwui nao Baruchna, Achikun chiwui eina thuilaga Eliashib pāngmon khareiwui shim khāmong ashungda chiwui ngachaili khalei chi chiphokhui.

²¹ Awui thili, Hakkozwui nao, Uriahwui nao Meremothna akai akha Eliashwui khāmong eina thuilaga shim vākatang chiwui ngachaili khalei chi chiphokhui.

²² Awui thili Tampākwui pāngmonbingna chiphoi.

²³ Chiwui thili Benjamin eina Hasshubna ashiwui shimli kāroda khalei chi chiphokhui. Athumwui thili Ananiahwui nao, Ma-aseiahwui nao Azariahna awui shim ngalemli chiphoi.

²⁴ Awui thili Henadadwui nao Binuina Azariahwui shim eina thuilaga Achikun ashungda chiwui ngachaili khalei chi chiphoi.

²⁵ Uzaiwui nao Palalna, Achikunli kāroda khalei kala mayonkhavaiwui kayāngli awungawui atung shimwui eina sākashok chi chiphoi. Awui thili Paroshwui nao Pedaiah eina,

²⁶ Ophelli kapam raobing china zingshoshongwui Tara̱ Ngavei eina sākashokawui ngazun vāshungda sai.

Katei Sākakā Mibing

²⁷ Chiwui thili Tekoa mibingna, wui kahaka sakashok chiwui kāroda Ophekwui phākho vāshungda chiphoi.

²⁸ Sigui Ngaveiwui atungvāk, pāngmonbing kachichana kachichāwui shimli kāroda khalei phākhobing chiphokhuisera.

²⁹ Athumwui thili Immerwui nao Zadokna awui shimli kāroda khalei chi sai. Awui thili Shecaniahwui nao, Zingsho Ngavei khamayona Shemaiahna chiphoi.

³⁰ Awui thili Shelemiahwui nao Hananiah eina Zalaphwui katharuka nao Hanunna akai akha chiphokhui. Chiwui thili, Berechiahwui nao Meshullamna awui shimli kāroda khalei chi chiphoi.

³¹ Awui thili sinā kasāpa Malchijahna Muster Ngaveili kāroda khalei pāngmonbing kala leihkhalonbingwui shim vāshungda kala ato kā vāshungda sai.

³² Chithekwui ato kā eina Yao Ngavei ngachai chi sinā kasābing eina leihkhalonbingna chiphokhuiya.