NEHEMIAH 2 - Kathara Bible (BSI)

Nehemiah Jerusalemli Khaung

¹ Awunga Ar-ta-xerxesna mungda khamaga̱ kum Mayo kachāng, awungana phāshaklakha ina drakhāra̱ heisangmi. Rida awungawui mangali wukkakhanang maleilakrangsai.

² Kala awungana ili ngahāna, “Khisāda khanangzanhailikhala, kakhanang kakazāva matheimana? Hi ningkazāt maningla katei khikha maningmana.” Chieina I ngacheeshunhaowa.

³ Ina awungali hānga, “Awungali okpeimeiranu! Keinungla, ishāvā ngarāwui chikhurla sākathānmihai kala ngaveibingla mei sa̱tāmihailaga kathāda makhanangmarakhala?”

⁴ Chieina awungana ili hānga, “Nawui pokhangai khi leili?” Chieina ina kazingramwui Vareli seihā sai.

⁵ Kala awungali ina hānga, “Awungali ningyāng ungngasakta nawui mikyanli naraoli ngahanngaimiakha ishāvā ngarāwui chikhur ungsākālui khavai ili Judahli chihoungmilu.”

⁶ Chieina awungana ili hānga (Awungva̱ awui ngalemli pamsai), “Na karankha sāngda thuihaora, kala katharān latungrakhala?” Chieina awungana mayāmihaoda ina atam akha kakkhui.

⁷ Kala awungali ina hānga, “Awungana mayāmipaiakha Kong Makandawui ngalei lammungabingli, Judah maungshungranglakha eina tangda athumna ili kānngasak khavai pāngli chithi kapisangmilu;

⁸ kala khorum khavai shimwui kala raipanwuiwui vang ngavei khavai khāngen, keinungwui phākho ngavei khavai, iwui pamkhavai shim sākhui khavai, awungawui ngahongwui eina thing khuipai khavai, khamayona Asaphlila chithi akha kapisangmilu.” Chieina awungana iwui kapo mayāmi, kaja Varewui ngasokhami pāng chi iwuitungli leisai.

⁹ Chiwui thili Kong Makanda khalei lammungabingli ina vāda awungawui chithi chi mi. Kala awungana raimiwui akhavābing kala siguiraimibingli ili ngasoda chihovai.

¹⁰ Kha Horonwui Sanballat eina awui rao Ammonnaopa Tobiahna, Israelnaobingwui kaphā sāmi khavai rāhaira kaji shālaga maringphālakthuwa.

Jerusalem Phako Sākālui khavai Kakasat

¹¹ Chieina ina Jerusalemli ungshungda kathumthang ungpama.

¹² Chiwui thili ina ngayāshong ngakarthui, I kala iwui mibing kaikhala zanga; kala Jerusalemwui vang iwui ningli Varena khi sāngasak khavai sangmihailikhala kaji khipālikha mahāngmana. Ina tongkhavā gadhā chi maningla khangatei sāyur mangasomana.

¹³ Ina ngayāshong Tampāk Ngavei eina Ramfa Rakhong kala Thothap Ngaveili vai, kala Jerusalemwui shaokhaita kahai phākhobing kala sa̱tāmi kahahai ngavei chi yangvai.

¹⁴ Chiwui thili Ura̱ Ngavei eina Awungawui Ra̱khongla ayanga; kha ina katonga gadhā chi mavāpaithuwa.

¹⁵ Chieina ngayāshong tampākshong eina ngavei chi ayangkhui; kala Tampāk Ngavei eina ungzangda latunghaowa.

¹⁶ I kali khavākhala, khi akasākhala kajila otva̱bingna matheimana; kala Jehudinaobing, pāngmonbing, wungnaobing, otva̱bing, kala khangatatei ot sāki kajibing khipālikha mahangrangsai.

¹⁷ Chiwui thili ina athumli hānga, “Ithum kakhanangwui alungli khalei nathumna thei, Jerusalem sākhaihaida ngaveila meina chuitāhaira. Ralu, ithum Jerusalemwui phākho sakāluishitsa, chithākha ithum mai mashiluimara.”

¹⁸ Kala kaphā sākhavai Varewui pāngna ili ngasokhami chi athumli hānga, kala awungana ili kahāng saikora chila athumli hāngsera. Chieina athumna, “Ithum ngakarthuida sakāluisa” da hānga. Chiwui vang athumna yāng chishotta ot sāphoka.

¹⁹ Kha Horonwui Sanballat eina Ammonwui rao Tobiah kala Arabwui Geshemna chi shālaga athumna yangshāt eina zeida hānga, “Nathumna sāda khalei hi khikhala? Nathum awungali ngakaikashila?”

²⁰ Chieina ina athumli ngahānkai, “Kazingramli khalei Varena ithumli mataisang ngasakra, kala awui rao ithumna ngakarthuida sakāluira; kha hiwui pongli nathumwui yar, mashun kala Jerusalemli phaningungkharān khikha maleimana.”