NEHEMIAH 11 - Kathara Bible (BSI)

Jerusalemli Kapambing

¹ Chitharan mibingwui kathānabing china Jerusalemli somsai; kala yaruina tharārāwuili ava̱va̱ khuilaga kathara keinung Jerusalemli pamkhavai kalā yanga, khangatei tharāwui khum chiko chiya keinung khangateili pama.

² Kala Jerusalemli pamngairereo pamki kajibingli yaruina somi.

³ Jerusalemli kapama wungva̱bing chi hina; kha Judahwui keinungliva kachichā keinungwui shimpam, luipamli pamsera: chiya, Israelnaobing, pāngmonbing, Levinaobing, khorum khavai shimli otram khangatha̱bing kala Solomonwui raobingwui naotunbing.

⁴ Jerusalemli Judahwui kachikathā naomayarabing kaikha, kala Benjaminwui kachikathā naomayarabing kaikha pama. Judahwui naomayarabing eina: Perezwui eina pharā khamaron Mahalalelwui nao, Shephatiahwui nao, Amariahwui nao, Zechariahwui nao, Uzzielwui naomayara Athaiah;

⁵ Shilonpawui eina pharā khamaron Zechariahwui nao, Joiarebwui nao, Adaiahwui nao, Hazaiahwuinao, Kol-hozehwui nao, Baruchwui naomayara Ma-aseiah.

⁶ Jerusalemli kapam Perezwui naomayara raili khamarāka shāmati hangtharukta chishatna.

⁷ Hibing hi Benjaminwui naomayarabingna: Jeshaiahwui eina pharā khamaron Ithi-elwui nao, Ma-aseiahwui nao, Kolaiahwui nao, Pedaiahwui nao, Joedwui nao, Meshullamwui naomayara Salluna.

⁸ Awui thili Gabbai, Sallai, ashi shāchishat maga̱da chishatna.

⁹ Zichriwui nao Joelna yangkhame sai; kala keinung chiwui yangkhame kakhaneva̱ Hassenuahwui nao Judahna.

¹⁰ Pāngmonbingwui eina: Jachinwui eina Joiaribwui nao Jedaiah,

¹¹ Ahitubwui eina pharā khamaron Meraioth, Jadokwui nao, Meshullamwui nao, Hilkiahwui naomayara Seraiahna Varewui shimli khayangabingwui khamungana;

¹² kala shim chiwui otram khangatha̱ athumwui achinā ngarā shāchishat maga̱da khanina. Kala Malchijahwui eina pharā khamaron Pashhurwui nao, Zechariahwui nao, Amziwui nao, Pelaliahwui nao, Jerohamwui naomayara Adaiahna,

¹³ kala achinā ngarā shimkhurwui akui shākhani hangmatida khanina; kala Immerwui eina pharā khamaron Meshillemothwui nao, Ahazaiwui nao, Azarelwui naomayara Amashsai,

¹⁴ kala athumwui achinā ngarā rai kapingbing shākha maga̱da chishatna; athumwuitungli yangkhame chi Haggedolimwui nao Zabdielna.

¹⁵ Levipashi: Bunniwui eina pharā khamaron Hashabiahwui nao, Azrikam, Hasshubwui naomayara Shemaiahna;

¹⁶ kala Varewui shim ayarshong ot kasāwuitungli khalei Shabbethai eina Jozabad Leviwui khareiya khanina;

¹⁷ Asaphwui eina pharā khamaron Zabdiwui nao, Micahwui naomayara Mattaniahna ningkashi khami seihāwui haophokkhami kathāna sai; kala Bakbukiahna achinā ngarāwui alungli kakhanena; kala Jeduthunna pharā khamaron nao Galal, Shammuawui nao Abdana.

¹⁸ Kathara keinungli khalei Levibing saikora shākhani hangchishatta matina.

¹⁹ Ngavei khamayonbing: Akkub, Talmon kala ngavei khamayona athumwui achināngarā shākha hangshinida khanina.

²⁰ Khangatei Israelnaobing, pāngmonbing, Levinaobingna kachichā shimlui khalei Judah keinungbingli pama.

²¹ Kha khorum khavai shimwui otram khangatha̱bingna Ophelli pama, kala Ziha eina Gishpana athumwuitungli yangkhame sai.

²² Jerusalemli khalei Levibingli yangkhame chi Asaphwui eina pharā khamaron Micawui nao, Mattaniahwui nao, Hashabiahwui nao, kala Baniwui naomayara Uzzina; Varewui shimli laa kasābing chi athumna.

²³ Kaja athumwui pongli awungawui eina kakaso lei, thangthangwui mikhangayi chi laa kasābingwui vang mi.

²⁴ Judahwui naomayara Zerahwui eina naobingwui eina kharā Meshezabelwui nao Pethahiahna mibingwui mathun sāda awungawuili pama.

Jerusalem Ayarli Somkapambing

²⁵ Kha kha̱li athumwui lui vāzāda pamda khalei, Judahwui mibing kaikhana Kiriath-arba eina chiwui kha̱bingli pama, Dihon eina chiwui kha̱nganaili, Jekabzeel eina chiwui kha̱nganaili,

²⁶ Jeshua, Moladah, Beth-peletli,

²⁷ Hazar-shual, Beer-shebali, kala chiwui kha̱ nganaibing,

²⁸ Ziklagli, Meconahli kala chiwui kha̱nganaili,

²⁹ En-rimmon, Zorahli, Jarmuthli,

³⁰ Zanoah, Adullam kala chiwui kha̱nganai, Lachish kala chiwui luipambingli, Azekah kala chiwui kha̱nganaili pama. Chiwui vang Beer-sheba eina thuilaga Hinnomwui tampāk peida rāmrah sāpama.

³¹ Benjaminwui mibingna Geba eina thuilaga Michmash, Aija, Bethel kala chiwui khanganai,

³² Anathoth, Nob, Ananiah,

³³ Hazor, Ramah, Gittaim,

³⁴ Hadid, Zeboim, Neballat,

³⁵ Lod kala Onoli them kathemwui tampākli soma.

³⁶ Kala Judahli khalei Levibing kaikha Benjaminshili azanghaowa.