NAHUM 3 - Kathara Bible (BSI)

¹ Ashee ningkachānga, kakapik kala ngaponkakhuina pemting kahai khangapon khangasām makhavai keinung! kalākashi ngasāranu.

² Lijei khangaphit akhon kala garikāng akhon, sigui khayong kala siguigari kathao!

³ Sigui katongbingna muivai, phikphik kahai raighai eina hānshi kahai kazei, sorkhangasai angun, katang makhavai kathi angun athumna kathingunli ngahuiya!

⁴ Kala saikora hi khayorva̱̱wui otsakwui vāngna, tengkakui kala thikapai ningchāng khangasak otsakwui vangna, khayor otsak eina yurli, kala awui ningchang khangasak otsak chieina mibingli yorzai.

⁵ Yanglu, ina nali mamayāmana, da saikorawui Prohona hānga, kala nawui kashan namaili lankāmira; kala ina nawui mahonghat kahai chi yurbingli, kala nawui khayākhamalā chi wungrambingli yangngasakra.

⁶ Ina nali khamakhao horrorra, kala nali ningkachaida sāra, mina yangnganao khavai sāngasakra.

⁷ Nali kathei mi saikorana phasā ngayumda hāngra; Nineveh shimānkachanghaira, khipāna awui vang chaprakhala? Ali ringphā khangasaka chi kali phākhuira?

⁸ Tara̱na kuinam kahai Nile ngalemli khalei, awui raishaophungna shamadru, tara̱na raipan ngasāda khalei Thebeshli na phāmeila?

⁹ Ethiopia hi awui yāng ngasāsai, Egyptla ngasāsai kala katang mavaisāmana; Pur eina Libyanaobing awui khangachonana.

¹⁰ Chithālala ali khuithuihaida, raikathāli vai; awui naomayarali chānrei pamngaretli ngapokazamthatserhaowa. Kaja awui khayākakā mibingwui vang kalā yanga; kala awui khangambing saikorali mari khānghui eina khalaphaowa.

¹¹ Na mariphaora, ning pāhaora, nana nawui yangkashewuili ngayin khavai phāra.

¹² Nawui raipan katonga athei minphok kahai khaorārong thai— khanukkashaiawui khamorli tāzanga.

¹³ Yanglu, nawui raimibing sha̱naomānga, nawui ngaveibing yangkashebingwui vang shongaomihaira; raipan marila meina yummihaira.

¹⁴ Raishotwui vang tara̱ phungsanglu, nawui raipan makang ngasaklu; leipā khuida naikazamlu, chek semkhavai akhong ngarānlu!

¹⁵ Chili nali meina chuithatra, raighaina katatpat tāhaora, khaoh thāda nali shaihaora, khaoh thāda mayāsang ngasaklu, khaohsom thāda mataisang ngasaklu.

¹⁶ Nawui leihkhalonbing kazingramwui sirāli chungmeida mataisang ngasakra. Khaohna awui angachāng hārda yongthuihaowa.

¹⁷ Nawui wungnaobing khaohsom kathāna, nawui lairik kakapebing muiyā thāda ngashing kazata, kasik atamli raipanli pa̱kapama khaoh thāda zimik kashok eina paithuihaowa; athum kali vāhaokhala kaji khipānakha matheilui.

¹⁸ Nawui yaokahombing pivāhaira, O Assyriawui awunga; nawui khangambing piphuphaira. Nawui mibing kaphungli yaoyāng eina, ngakuikhui khavai khipākha malei.

¹⁹ Nawui sākaza̱ chi suikatā maleimana, nawui khamā chi marlakhaira, nawui pao kashā saikorana nali pāng kapherorra. Kaja nawui katang makhavai makaphā otsak chi khipāli maza̱rangkhala?