NAHUM 1 - Kathara Bible (BSI)

¹ Ninevehwui apongli khamarān tuina. Elkoshwui Nahumna mahākhami lairikna.

Ninevehli Proho wui Malungkhavāt

² Proho hiya mikpaishikatha kala athut kakhuiana, Proho hiya athut kakhuia kala lungvātkashena; Proho hiya ali khangasungbingli athut khui, kala awui malungkhavāt yangkashebingli leichinga.

³ Proho hiya malung mathuithakmana, kala pangshap khaleiana, kala Prohova khayonli mathāhailakmana. Awui shongfa sur kakhaning eina siphan zingrotwui alungli lei, kala muiyā hi apheiwui chifana.

⁴ Ana shamadruli khararda thengngasaka, ana kong saikora thengngasaka; Bashan eina Carmel ngahuihaowa; Lebanonwui awonla pa̱tai.

⁵ Phungreibing awui mangāli nganuka, phungrābing menga; okathui kala chiwui alungli khalei saikora awui mangāli khikha masāvaimana.

⁶ Awui malungkhavāt chili khipā nganingshapra? Awui malungkakangwui kasā chili khipa khāngshapra? Awui malungkathui mei thāda chuishoka, lunghārla ana kaitham ngasakhaishapa.

⁷ Proho hiya kaphāna, pa̱khangapā atamli ngākkhamena; ali rākhangayinbingli ana thei.

⁸ Kha awui yangkashebingli tara̱ phongshilongda shimānchang shimān ngasakra kala awui yangkashebingli khangamilila kharomvāra.

⁹ Nana Prohowuitungli khi khangarān sākhala? Ana thitchang ngasakhaora; awui yangkashebingli khanishida athut makhuimara.

¹⁰ Ngaphāngkatarai ka̱shāt thāda, thengkahaiya lanji thāda athum shimānhaora.

¹¹ Prohowuitungli makaphā sākhavai, khangarāna kala malung pinglak eina kahānga, mi akha nawui eina mashokmala?

¹² Prohona hithāda hānga, “Athum pangda kachungkhalala, athumli katathaora kala kānthuihaora. Ina nali sipsā ngasakhailala, ina nali masipsā ngasakluimara.

¹³ Kala ara awui kashai chi ina nawui eina sāshatmihaora, kala nali khalap kahai chi ngalāhaora.”

¹⁴ Prohona nawui pongli ningkhami mihaira: “Nawui ming atam kachida maleiluimara; sākakhui meoma̱ kala heikakhui meoma̱la nawui khorumshimwui eina ina khuishokhaora. Ina nawui chikhur semra, kaja na hi ningkakachaiana.”

¹⁵ Yanglu, phungreibingli paokaphā khuikharā, chingri kahai hākashokawui phei chi! Nawui zātkhān mayonlu, O Judah, nawui tuingashit ungshung ngasaklu, kaja makaphā makhayā chi nali marāluilakmara, ali katatchaohaira.