MISHĀN 7 - Kathara Bible (BSI)

Kathānabingwui Kachigat

¹ Mosesna tabernacle khaningkāda chiwui thongthāngbing saikora thao neolaga tharchigatta, kala hanphut chiwui khorkhongbing saikora thao neolaga tharchikatthang,

² Israel mibingwui kathānabing, athum avāva̱ ngarābingwui shimlakwui kathānabing, shangwui kathānabing, mi mashing shānkhui kahaibingwuitungli khayangabing;

³ athumna Proholi mikhangai kachigat khuirāda seigari tharuk, mukkā tharāda khani, seigari ava̱va̱na kathāna mi khaniniwui sāda, kala mukkā tharāda khani mi tharāda khaniwui sāda khuirai; kala athumna chi tabernaclewui mangāli rāchigata.

⁴ Chieina Prohona Mosesli hānga,

⁵ “Otbing chi khuida kazip khavai kachonshimwui otram khangatha̱li shichin khavai Levishili mi ava̱va̱wui otngarut athishurda mihaolu.”

⁶ Chieina Mosesna seigaribing kala mukkābing chi khuilaga Levishili mihaowa.

⁷ Seigari khani kala mukkā mati ana Gershonshi naomayarabingli, athumwui otngarut athishurda mihaowa;

⁸ kala seigari mati kala mukkā chishat, pāngmon Aaronwui nao Ithamarna khayanga Merariwui naomayarabingli, athumwui otngarut athishurda mihaowa.

⁹ Kha ana Kohathwui naomayarabingli khikha mamimana, kachiwui vang jilaga ashina kathara otbing singda yārtui eina khangava̱ ot sai,

¹⁰ kala kathānabingna hanphut chi thao neomithang dharkatwui vang kachigat miya; kala kathānabingwui kachigat chi hanphutwui mangāli khuirai.

¹¹ Chieina Prohona Mosesli hānga, “Athumna hanphut dharkatwui vang kachigatbing chi, thangthang kathāna ava̱va̱na chigatra.”

¹² Kharethang chigatrikapki kaje chi Judah shangwui Amminadabwui naomayara Nahshonna;

¹³ kala ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda zatra, tharāzātchigatwui vang thao khamanāt manaktak kahai mathirna khanini chi pemngasaka;

¹⁴ nganamkaphā otna pemting kahai shekel tharā kharit sinā khongphei akha;

¹⁵ rikkatā chigatwui vang mukkānao akha, yaovā akha kala kumkha kākahai yaovānao akha;

¹⁶ suiham chigatwui vāng mevā akha;

¹⁷ kala ningyatchigatwui vāng mukkā khani, yaovā phangā, mevā phangā, kala kumkha kākahai yaovānao phangā. Hi Amminadabwui naomayara Nashonwui kachigatna.

¹⁸ Kakhanethang Issacharwui kathāna, Zuarwui naomayara Nethanelna chigata:

¹⁹ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vāng thao khamanāta manaktak kahai mathirna chipem ngasaka;

²⁰ nganamkaphāna pemting kahai shekel tharā kharit sinā khongphei akha;

²¹ rikkatā kachigatwui vang mukkānao akha, yaovā akha, kala kumkha kākahai yaovānao akha;

²² suihamchigatwui vang mevā akha;

²³ kala ningyatchigatwui vang mukkā khani, yaovā phangā, kala kumkha kākahai yaovānao phangā chigata. Hi Zuarwui naomayara Nethanelwui kachigatna.

²⁴ Kakathumathang Zebulunbingwui kathāna, Helonwui naomayara Eliabna chigata:

²⁵ ana shekel shākha kala thumrā kharit lupāsāwui khongphei akha, shekel hangshini kharita lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

²⁶ nganamkaphāna pemting kahai shekel shākha kharita sinā khongphei akha;

²⁷ rikkatā kachigatwui vang mukkānao akha, yaovā akha kala kumkha kākahai yaovānao akha;

²⁸ suihamchigatwui vang mevā akha;

²⁹ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Helonwui naomayara Eliabwui kachigatna.

³⁰ Khamatethang Reubenbingwui kathāna, Shedeurwui naomayara Elizurna chigata:

³¹ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

³² nganamkaphāna pemting kahai shekel tharā kharit sinā khongphei akha;

³³ rikkatā chigatwui vang mukkānao akha, yaovā akha kala kumkha kākahai yaovānao akha;

³⁴ suihamchigatwui vang mevā akha;

³⁵ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Shedeurwui naomayara Elizurwui kachigatna.

³⁶ Kaphangāthang Simeonbingwui kathāna, Zurishaddaiwui naomayara Shelumi-elna chigata:

³⁷ ana shekel shākha kala thumrā kharita lupāsāwui khongphei akha, shekel hangshini kharita lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

³⁸ nganamkaphā otna pemting kahai shekel tharā kharit sinā khongphei akha;

³⁹ rikkatāchigatwui vāng mukkānao akha, yaovā akha, kala kumkha kākahai yaovānao akha;

⁴⁰ suiham chigatwui vang mevā akha;

⁴¹ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Zurishaddaiwui naomayara Shelumi-elwui kachigatna.

⁴² Katharukathang Gadwui kathāna, Deuelwui naomayara Eliasaphna chigata:

⁴³ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

⁴⁴ nganamkaphā otna pemting kahai shekel tharā kharit sinā khongphei akha;

⁴⁵ rikkatā kachigatwui vang mukkānao akha, yaovā akha kala kumkha kākahai yaovānao akha;

⁴⁶ suiham chigatwui vang mevā akha;

⁴⁷ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Deuelwui naomayara Eliasaphwui kachigatna.

⁴⁸ Kashinethang Ephraimwui kathāna, Ammihudwui naomayara Elishamana chigata:

⁴⁹ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

⁵⁰ nganamkaphāna pemting kahai shekel tharā kharit sinā khongsai akha;

⁵¹ rikkatā kachigatwui vang mukkānao akha, yaovā akha, kala kumkha kākahai yaovānao akha;

⁵² suihamchigatwui vang mevā akha;

⁵³ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Ammihudwui naomayara Elishamawui kachigatna.

⁵⁴ Kachishatathang Manassehwui kathāna, Pedahzurwui naomayara Gamalielna chigata:

⁵⁵ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

⁵⁶ nganamkaphā otna pemting kahai shekel tharā kharit sinā khongphei akha;

⁵⁷ rikkatā kachigatwui vang mukkānao akha, yaovā akha, kala kumkha kākahai yaovānao akha;

⁵⁸ suihamchigatwui vang mevā akha;

⁵⁹ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Pedahzurwui naomayara Gamalielwui kachigatna.

⁶⁰ Kachikothang Benjaminshiwui kathāna, Gideoniwui naomayara Abidanna chigata:

⁶¹ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzāt kachigatwui vang thao khamanāta manaktak kahai mathirna chipem ngasaka;

⁶² nganamkaphā otna pemting kahai shekel tharā kharit sinā khongphei akha;

⁶³ rikkatā kachigatwui vang mukkānao akha, yaovā akha, kala kumkha kākahai yaovānao akha;

⁶⁴ suihamchigatwui vang mevā akha;

⁶⁵ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Gideoniwui naomayara Abidanwui kachigatna.

⁶⁶ Katharāthang Danwui kathāna, Ammishaddaiwui naomayara Ahiezerna chigata:

⁶⁷ ana shekel shākha kala thumrā kharita lupāsāwui khongphei akha, shekel tharā kharita lupāsāwui khongsai akha, khanini chi kathara shimwui shekelchākwui athishurda tharāzāt kachigatwui vang thao khamanāta manaktak kahai mathirna chipem ngasaka;

⁶⁸ nganamkaphāna pemting kahai shekel tharā kharit sinā khongphei akha;

⁶⁹ rikkatā kachigatwui vang mukkānao akha, yaovā akha kala kumkha kākahai yaovānao akha;

⁷⁰ suihamchigatwui vang mevā akha;

⁷¹ kala ningyatchigatwui vāng sei khani, yaovā phangā; mevā phangā, kala kumkha kākahai yaovānao phangā chigata. Hi Ammishaddaiwui naomayara Ahierzerna kachigatna.

⁷² Tharāda kharethang Asherwui kathāna, Okhranwui naomayara Pagielna chigata:

⁷³ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

⁷⁴ nganamkaphāna pemting kahai shekel tharā kharit sinā khongphei akha,

⁷⁵ rikkatā kachigatwui vāng mukkānao akha, yaovā akha, kala kumkha kākahai yaovānao akha;

⁷⁶ suihamchigatwui vang mevā akha;

⁷⁷ kala ningyatchigatwui vang sei khani, yaovā phangā, mevā phangā, kala kumkha kākahai yaovānao phangā chigata. Hi Okhranwui naomayara Pagielwui kachigatna.

⁷⁸ Tharada kakhanethang Naphtaliwui kathāna, Enanwui naomayara Ahirana chigata:

⁷⁹ ana shekel shākha kala thumrā kharit lupāsāwui khongphei akha, shekel hangshini kharit lupāsāwui khongsai akha, khanini chi kathara shimwui shekelchākwui athishurda tharāzātchigatwui vang thao khamanāta manaktak kahai mathirna chipem ngasaka;

⁸⁰ nganamkaphāna pemting kahai shekel tharā kharit sinā khongphei akha;

⁸¹ rikkatā kachigatwui vāng mukkānao akha, yaovā akha, kala kumkha kākahai yaovānao akha;

⁸² suihamchigatwui vang mevā akha;

⁸³ kala ningyatchigatwui vang sei khani, yaovā phangā, mevā phangā kala kumkha kākahai yaovānao phangā chigata. Hi Enanwui naomayara Ahirawui kachigatna.

⁸⁴ Hanphut chi dharkat sāda chi thao neomithanghon, Israelwui kathānabingna kachigatbing chi hina: lupāsāwui khongphei tharāda khani, lupāsāwui khongsai tharāda khani, sinā khongphei tharāda khani;

⁸⁵ lupāsāwui khongphei ava̱va̱ shekel shākha kala thumrā, kala lupā khongsaina hangshini, kathara shimwui shekelchākwui athishurda lupāsāwui akhongbing saikora shekel thingkhani shāmati rita;

⁸⁶ nganamkaphā thao pemting kahai eina sinā khongphei tharāda khani saikora chi kathara shimwui shekelchākwui athishurda shekel shākha kala maga̱ rita,

⁸⁷ tharāzātchigat eina ngasoda rikkatā kachigat sākhavai sāyur saikora mukkā tharāda khani, yaovā tharāda khani, kumkha kākahai yaovānao tharāda khani; kala suihamchigatwui vang mevā tharāda khanina;

⁸⁸ kala ningyatchigatwui vang sha̱kei katonga mukkā maga̱da mati, yaovā hangtharuk, mevā hangtharuk, kala zingkum akha kākahai yaovānao hangtharuk. Hibing hi thao neomihailaga dharkat sāthang hanphutli kachigatna.

⁸⁹ Kala Mosesna Proholi ngazekkida kazip khavai kachonshimli kazang chitharan, Cherub khaniwui ngachaili khalei ningkhami okowuitungli haikahai lukhamashan pamkhongwui eina ali khangazekkhon ana shai; chithada ali ngazeka.