MISHĀN 5 - Kathara Bible (BSI)

Makathara Mi

¹ Prohona Mosesli hānga,

² “Israelwui mibingli kasolu kaja, phārrei kakazā, kala zaizai khangaya̱ mi kachiva̱, kala kathingun saza̱da sāmakhao kahai mi kachiva̱ rāmrahwui eina ayarli khuishokhaolu.

³ Nathumna mayarnaola kala sha̱naola khaninili rāmrahwui ayarli haira, chiya ina ngasomida khalei athumwui rāmrah masākhamāng khavaina.”

⁴ Chithāda sāda Israelwui mibingna athumli rāmrahwui ayarli kashamshokhaowa; Prohona Mosesli kakaso thāda Israelwui mibingna chithāda sai.

Sākhanguiwui Leiman Runkakā

⁵ Kala Prohona Mosesli hānga,

⁶ “Israelwui mibingli hānglu, mayarnao nilala sha̱nao nilala Proholi shitkasang kaihaida mibingwuitungli morei sahaiakha, mipā chi yonhaira,

⁷ ana morei sākahai chi ana hāngphatra; kala ana sāyon kahai chiwui aman peida mira, khum kaphangāla mataisangda ana sayon kahai mipa chili mira.

⁸ Kha kalikhada khayon chiwui vang runkāda samphangki kaji sāza̱ kahaipawui athei-asā maleisaakha, khayonwui vang runkakā chi Proholi pāngmonwui vang sāda mira, pheomi khavaiwui vang yaovā akha kala awui vang pheokhamiwuitungli akha ngarorki kajina.

⁹ Kala kachigat ot kachiva̱, Israel mibingwui khuikharā kathara ot pāngmonli khuikharābing chi awui ngasāra;

¹⁰ kala mi ava̱va̱wui kathara ot khuikharā chi awui ngasāra; kachikathā mina pāngmonli khamimi chi awui ngasāra.”

Ningmakatongva̱ Preiva̱

¹¹ Kala Prohona Mosesli hānga,

¹² Israelwui mibingli hānglu, kalikhada mi akhawui preiva̱na ngaruihaida ali ning makatong otsak sahairakha,

¹³ kalikha mi khangatei akhana sha̱nao chili mathangda ngasopihailaga gaharawui maiyanwui eina ngathumhaida, preiva̱ china akhalatta sākhamānghailala matheithurakha, kala awuitungli shākhi maleiakha, otsak atamchangli matukkhuithukada;

¹⁴ kala kalikha, khalatta sāmakhao kahai apreiva̱ chili gaharana ningli ningkhamaong rāpeida, lah kalikha apreiva̱ akhalattana masākhamānglala yuikashi gaharali raza̱da ningmaonghaiakha;

¹⁵ mipa china apreiva̱li pāngmonwuili khuivāra, kala preiva̱wui vang chigat khangayi, lang, mathir khuilui akhawui akhum katharāwui akha khuirāra, ana hiwuitungli thao maheirormara, kala frankincensela masangpaimara, kaja hiya ningkhamaongwui tharāzātchigatna, phaningkhaungwui tharāzāt kachigatna, khayonkhamāng phaningung khangasakna.

¹⁶ Kala pāngmon china preiva̱̱ chili rānganai ngasakta Prohowui mangāli khuirāra;

¹⁷ kala pāngmon china kathara tara̱ ngaleihamwui eina sokkhuira, kala tabernacle shimlungwui chifa kateokha mitkhuilaga tara̱ chili sangra.

¹⁸ Kala pāngmon china preiva̱ chili Prohowui mangāli kuisam khalāthamihailaga rānganing ngasakra, kala phaningkhaungwui tharāzāt kachigat, chiya ningkhamaongwui tharāzāt kachigat chi awui pāngli sangmira. Kala awui pāngli pāngmonna khonkashi khuikharāwui tara̱ kakhā chi singra.

¹⁹ Chiwui thili pāngmon china preiva̱ chili shākhi sāngasakta hāngra: “Nagahara leilaga nana mi khangateili mangasoakha, kala nana kalikhada masāmakhaoakha, khonkashi khuikharā kakhā tara̱ hiwui eina ningkhānhaolu.

²⁰ Kha nagaharawui azingli leilaga nana ngaruithuihaida nakhalatta sākhamāngakha, kala nagahara maningla khangatei mina nali ngasohaiakha,

²¹ (pāngmon china preiva̱ chili khonkashiwui shākhi sāngasakta hāngra) Prohona nakhaishāng shuitā ngasakta kala naphasā workhangasak tharan, Prohona nali mibingwui mangāli khonkashi kala shākhi sāngasakra;

²² khonkashi khuikharā tara̱ hina nawukli zangda naphasā worranu kala nakhaishāng shuitāhaoranu.” Chieina sha̱nao china, “Amen, Amen” da hāngra.

²³ “Chiwui thili pāngmon china khonkashibing hi lairik akhali kapilaga kakhā tara̱ chili pheosangra;

²⁴ kala khonkashi khuirā khangasaka kakhā tara̱ chi ana sha̱nao chili mangngasakra, kala tara̱ chi awukli kazang eina wuk makeishunhaora.

²⁵ Chieina pāngmon china ningkhamaongwui tharāzāt kachigat chi sha̱nao chiwui pāng eina khuida tharāzāt kachigat chi Prohowui mangāli khayitchigatra kala chi hanphutli khuirāra;

²⁶ kala pāngmon china tharāzāt kachigat chi panghomkha, phaningung khavai yar sāda khuilaga hanphuttungli riktāra, chiwui thili preiva̱ chili ana tara̱ chi mangngasakra,

²⁷ kala ana tara̱ chi ali mang ngasakhailaga, chiwui thili kalikhada akhalatta sākhamānghaisāda agaharali ningmakatonga otsak sahaisaakha, khonkashi khuirā khangasak tara̱ chi awukli zangda china wuk makeihaora, kala aphasā worshokra, kala akhaishāngla shuitāhaora, kala awui mibingwui alungli preiva̱ chi ningkakachaiya ngasāra.

²⁸ Kha apreiva̱ china akhalatta masākhamāngla tharda leisakha ali khikha mathāmara kala naola pharāra.

²⁹ “Hi agahara leilaga ngaruithuihaida sākhamāng kahai chitharan preiva̱li ningkhamaongwui bichar sākhavai ainna,

³⁰ lah mi akhali ningkhamaong leida, kala apreiva̱li ningmaonghaiakha; sha̱nao chili Prohowui mangāli nganing ngasakta pāngmonna ainbing hi sāki kajina.

³¹ Mayarali khayonkhamāng maleimara, kha sha̱naopava̱na awui khayonkhamāng phungki kajina.”