MISHĀN 4 - Kathara Bible (BSI)

Kohathshang Levishiwui Otngarut

¹ Prohona Aaron eina Mosesli hānga,

² Levishi naomayarabingwui eina Kohath naomayarabing, athumwui shimkhur kala avāva̱ ngarāwui shimlak athishurda mishān khuilu,

³ zingkum thumrā eina thuilaga kum hangphangā rarkahai, kazip khavai kachonshimlungli ot sākhavai otram khangatha̱li zangkashapa saikora.

⁴ Tharmathengmeikap kaje ot kazip khavai kachonshimwui alungli Kohathwui naomayarabingna sāki kaji hina.

⁵ Rāmrah honguki kaji tharan Aaron kala naomayarabingna alungli zangda chonrānwui mairār chi khuitāra, kala tuingashitwui oko chili fakhamra;

⁶ chiwui thili athumna chiwui atungli mehui eina fakhamda khamayinga kachon eina fakhamra; kala thingphānbing chi phonkhuira.

⁷ Kala ngaso khami khamui tabletungli khamayinga kachon fakhamlaga chiwuitungli khongphei-khongpang, nganamkaphā yurwui khongpheibing, koklui kala ra̱shakchigat khavai khorām haira; kala chili lāngda chiwui atungli haivaiching kaji khamui chi haira.

⁸ Chiwui thili athumna otbingwitungli hungshi kahai kachon farorlaga mehui eina fakakham kala thingphānbing chili phonra.

⁹ Kala athumna thaohmeiwui thaomeishong, thaomeibing, chiwui akhongbing, kala chiwui thao sangkhavai akhong saikora chi khamayinga kachon eina fakhamra.

¹⁰ Kala khorkhong saikora fakham khavai mehui akhali sangda phungkhavai akom chili sangra.

¹¹ Kala athumna sināwui hanphut chi khamayinga kachon eina fakhamlaga mehui eina fakhamda thingphānbing chi phonra.

¹² katharapamli otram khangatha̱li kasing khorkhong saikora khuilaga kachon khamayinga akhali otbing chi sangda mehui eina fakhamlu, kala phungkhavai akom chili sanghaira.

¹³ Kala athumna hanphutwui hotla chi khuilaga hungkhamaying kachon eina fakhamhaora;

¹⁴ kala athumna hanphut chiwuitungli shikachin thongthāng saikora chiya: meiyaikhongbing, marik-kapei, kala kapeibing, kala khongsai, hanphutwui akhongbing saikora haira; kala mehui eina fakhamhaida thingphānbing chi phonra.

¹⁵ Kala Aaron eina naomayarabingna katharapam eina chiwui thongthāngbing chi shaksākuphaida athum zatuki kaji tharan Kohathwui naomayarabingna chi ngava̱ra, kha athumna kathara otbing chili masāza̱paimara, kaja athum thipaishina. Kohathwui naomayarabingna khuiphungki kaji kazip khavai kachonshimwui otbing chi hina.

¹⁶ Kala pāngmon, Aaronwui naomayara Eleazarna thaomeiwui thao, nganamkaphā thao, chigatching kaji tharāzāt kachigat, neomi khavai thao, tabernacle eina chiwui alungli khalei ot saikora, kala katharapam eina chiwui khorkhongbing saikora yangra.

¹⁷ Prohona Moses eina Aaronli hānga,

¹⁸ “Kohath shangwui shimkurbing Leviwui eina mashimān ngasaklu,

¹⁹ kha athumli hithāda sālu, kaja athumna katharapamli kazang chitharan vānganaida mathila ringra: Aaron kala naomayarabingna alungli zangda athum kachiva̱wui otsin eina otphunli kapangsangmilu,

²⁰ kha athumna alungli zangda kathara otbing chili mik khayipkha eina tangda mayangpaimana, chithākha thira.”

²¹ Prohona Mosesli hānga,

²² Gershonwui naomayarabingla mashing shānkhuilu, athumwui shimkhur kala avāva̱ ngarāwui shimlak athishurda;

²³ zingkum thumrā eina thuilaga chiwui atung kum hangphangā rarkahaiwui alungli khaleibing, kazip khavai kachonshimlungli otram khangatha̱li zangkashap saikora mishān shānkhuilu.

²⁴ Hi Gershon shimkhurwui otngarut, kala otram khangatha̱ kala athumwui otphunbingna:

²⁵ athumna tabernaclewui chonrānbing, kala kazip khavai kachonshim eina chiwui chonrān, matungmeikapta fakham khavai mehui kala kazip khavai kachonshim khāmongwui chonrān phungra,

²⁶ kala yāngkhupwui kangruitā khavaibing, tabernacle eina hanphutli kuimareida khalei yāngkhupwui zangkhavai ngaveiwui chonrān, chiwui khara̱bing kala chiwui otli shikachin saikora phungra; kala athumna chiwui sarān-varān ot saikora athumna sāra.

²⁷ Gershonwui naomayarabingna otram khangatha̱ saikora Aaron eina anaomayarabingwui kakaso athishurda athumna sāki kaji otbing chi sāra; athumna sāki kaji otngarutbing chi nana mira.

²⁸ Hi Gershonshi shimkhurwui naomayarabingna kazip khavai kachonshimli sāki kaji athumwui otngarutbingna, athumwuitungli pāngmon Aaronwui naomayara Ithamarna yangra.

²⁹ Kha Merariwui naomayarabingwui vanga, nana athumwui shimkhurbing kala avāva̱ ngarāwui shimlak athishurda shānkhuilu;

³⁰ zingkum thumrā eina thuilaga kum hangphangā rarkahai, athum kachiva̱ kazip khavai kachonshimwui otram khangatha̱li zangshapabing nana ava̱va̱ eina shānkhuilu.

³¹ Kala athumna kazip khavai kachonshimli otram khangatha̱li tongda sāki kaji chiya: taberbaclewui akombing kaja chiwui khamakhar pakra̱bing eina apheibing,

³² kala yāngkhup kuimareida khalei pakra̱bing eina apheibing, kala thingshun eina chiwui khara̱bing kala chili shikachin ot saikora athumna phungra; kala nana athumna phungki kaji otmingbing chitheira.

³³ Hi pāngmon Aaronwui naomayara Ithamarwui azingli Merarishi shangna kazip khavai kachonshimli sāki kaji otngarutbingna.

Levishiwui Mishān

³⁴ Moses, Aaron kala yarui ashangva̱wui kathānabingna Kohathnaobingwui shang, naomayarabing, kala avāva̱ ngarāwui shimlak athishurda,

³⁵ zingkum thumrā eina thuilaga kum hangphangāwui alungli khaleibing kazip khavai kachonshimwui otram khangatha̱li zangshapabing ava̱va̱ eina shānkhuiya.

³⁶ Kala athumwui shang kala shimkhurwui mi thingkhani shāshini kala hangphangā shānkhui.

³⁷ Prohona Mosesli kaso kahai athishurda Moses eina Aaronna shānlaga Kohathnaobing shangwui eina kazip khavai kachonshimli otram khangatha̱li zangkashapabing hiyākhana.

³⁸ Gershonwui naomayarabingwui mashing, athumwui shangbing, kala avāva̱ ngarāwui shimlak athishurda,

³⁹ zingkum thumrāwui eina thuida hangphangā rarkahaiwui alungli khaleibing, kazip khavai kachonshimli otram khangatha̱li zangkashap mi kachiva̱ ava̱va̱ eina shānkhuilaga,

⁴⁰ ashi shang kala avāva̱ ngarāwui shimlak athishurda mi thingkhani shātharuk kala thumrāna.

⁴¹ Prohona kaso kahai athishurda Moses eina Aaronna shānlaga Gershonwui naomayarabing shangwui eina kazip khavai kachonshimwui otram khangatha̱li zangkashapabing hiyākhana.

⁴² Merariwui naomayarabingwui mashing, athumwui shimkhurbing kala athum avāva̱ ngarāwui shimlak athishurda,

⁴³ zingkum thumrā eina haophoklaga hangphangā kākahaiwui alungli khaleibing kazip khavai kachonshimli otram khangatha̱li zangkashapa mi kachiva̱ ava̱va̱ eina shānkhuilaga,

⁴⁴ ashi shangwui mashing thing kathum shākhanina.

⁴⁵ Prohona Mosesli kaso kahai athishurda Moses eina Aaronna shānlaga Merari shangwui naomayarabing hiyākhana.

⁴⁶ Moses eina Aaron kala Israelwui kathānabingna Levibingwui shimkhur kala athumwui avāva̱ ngarāwui shimlak athishurda,

⁴⁷ zingkum thumrāwui eina haophoklaga kum hangphangāwui alungli khaleibing, yarui otsakli zangshapa kala kazip khavai kachonshimli otram ngatha̱kashapa mi kachiva̱ ava̱va̱ eina shānkhuilaga,

⁴⁸ ashi shangwui mashing thing chishat shāphangā kala hangchishatna.

⁴⁹ Prohona Mosesli kaso kahai athishurda ashi mi ava̱va̱li kachichāwui otngarut, otram lah ot phungkazat athumli kapangsanga; hithāda Prohona Mosesli kakaso athishurda ana athumli shānkhuihaowa.