MISHĀN 36 - Kathara Bible (BSI)

Fakathui Sha̱naowui Shimluikat

¹ Josephwui eina katung Manassehwui naomayara, Machirwui nao Gileadwui naobing, ashi shimkhurwui kathānabingna Moses kala Israelnaobing shangwui akhavābingwui mangāli rāhānga;

² athumna hānga, “Prohona ameili Israel mibingwui shimlui kalā yangda ngayarmi khavai kaso kahaina; kala ithumwui agato Zelophehadwui shimlui anaongalāva̱ ngarāli yarkhavai Prohona ameili kakasona.

³ Kha athumna Israel shang khangateili favāhaiakha, ithumwui awo-ayiwui shimlui phungvāhaora, kala fakhavā shangwui shimlui ngasāhaora. Chieina ishi shangwui shimlui yarwui eina khuithuihaora.

⁴ Kala Israel mibingwui jubilee kharā eina, athumwui shimlui chi fakhavā shangwui ngasāhaora; kala shimlui chi ishi shangwui eina khuithuihaora.”

⁵ Chieina Prohowui tui athishurda Mosesna Israelwui mibingli kasoda hānga, “Josephwui naomayarabingwui shangbingna kahāng chi mashunga.

⁶ Zelophehadwui naongalāva̱ ngarāwui pongli Prohona kakaso hina. Athumna ashi shangwui mibingwui ngachaili ngakumkhangaili ngakumranu.

⁷ Israel mibingwui alungli shangwui shimlui shang akhana akhawuili maphungvāmara; kaja Israelnaobing kachiva̱na kachichāshi avāva̱ ngarāwui shangwui shimlui khuiphalungra.

⁸ Kala Israel mibingwui alungli sha̱naona shimlui kakā leiakha, avāva̱ shangwui shimkhurwui mayarnao akhali ngakumra, chithakha Israel mibingwui mi kachiva̱na kachichāshi shangwui shimlui khuimaronki kajina.

⁹ Chieina shang akhawui eina khangatei akhali shimlui maphungthuimara; kaja Israel mibingna shang kachiva̱ kachichāshi shangwui shimlui khuira.”

¹⁰ Mosesli Prohona kaso kahai thāda Zelophehadwui naongalāva̱bingna chithāda sai;

¹¹ kaja Zelophehadwui naongalāva̱bing Mahlah, Tirzah, Hoglah, Milcah kala Noah athumna avāgato ngarāwui naomayarabingli ngakuma.

¹² Athumna Josephwui eina katunga Manasseh shimkhurwui naongarāli ngakuma, kala athum shimkhurwui shimlui chi shangwui shimkhurli leipapama.

¹³ Hi Jerichowui Jordan ngalemli khalei Moab tampākli Prohona Mosesli khamor eina Israel mibingli kakaso ningkhami kala shiyan-chikana.