MISHĀN 35 - Kathara Bible (BSI)

Levishili Chisin kahai Keinungbing

¹ Jerichowui Jordan ngalemli khalei Moab tampākli Prohona Mosesli hānga,

² “Israel mibingli kasolu, kaja athumwui shimlui yarwui eina Levishi somkhavai keinung yarlu; kala nathumna athumwui seihomphung sākhavai keinungbingli kuikhamareibing chi milu.

³ Keinungbing chi athumwui sāda chili pānra, kala athumwui seihomphungbing chili athumwui sei, yao kala sha̱kei saikora keira.

⁴ Levishili miki kaji seihomphungbing chi keinung phākhowui eina khuining thingkha ayar kuimareida Levishili mira.

⁵ Kala keinung ayar kuimareida tamkhava chi zingshoshong khuining thingkhani, azingshong khuining thingkhani, kala atungshong khuining thingkhani, kala atungshong khuining thingkhani hailaga keinungna alungthungli leingasakra; chi athumwui keinungbingwui seihomphungbing sāra.

⁶ Levinaobingli keinung tharuk miki kaji chili mi shaokathatbingli yāmvā ngasakta ngayin khavai sāngasakra. Kala chili lāngmeida keinung hangmatida khani mira,

⁷ Levinaobingli miki kaji keinungbing kala chiwui seihomphungbing zangserda hangmatida chishatra.

⁸ Kala nathumna keinungbing yarki kaji chi Israelnaobing shang kahakwui eina hakta kala kateowui eina teoda khuishokmira, shimlui kahak kateo samkaphang kachiva̱, chiwui athishurda athumwui keinung sākhavai Levinaobingli mira.”

Ngayin khavai Keinungbing

⁹ Kala Prohona Mosesli hānga,

¹⁰ “Israel mibingli hānglu, nathumna Jordan kānlaga Canaan ngaleli kazang chitharan,

¹¹ nathumna nathum ngayin khavai keinungwui vang apam kapangshoklu, kaja matheimada mi shaokathatabingna chili yāmngayinpaira.

¹² Keinungbing chili athut khuiki kajibingwui eina yāmngayin khavai pamna, kaja yarui ashangva̱ mangāli bicharwui vang makānganingranglakha eina tangda mi shaokathata chi mathiaranu.

¹³ Kala nathumna miki kaji keinungbing chi nathumwui ngayin khavaiwui keinung tharukra.

¹⁴ Ngayin khavai keinung sāda Jordan makānkāda keinung kathum kala Canaan ngaleili kathum da nathumna mira.

¹⁵ Keinung tharuk hi Israelnaobing, kha̱mibing, kala ngasokazatabingna ngayin khavai keinung sāra; kala matheila mi sakathata china chili yāmngayinra.”

¹⁶ “Kha mi akhana zeighai ngahā eina mi shaothathaiakha, a mi khayumana; alila shaothatra.

¹⁷ Kala mi akhana apāngli khalei mi thikapai ngalung eina mili ngashumhaida mi chi thihaiakha, a mi khayumana; alila shaothatra.

¹⁸ Lha mi akhana awui pāngli khalei mi thikapai thingwui khutlai eina mili ngaphitsangda a thihaiakha, a mi khayumana; alila shaothatra.

¹⁹ Asheewui athut hāngsangki kajipana ali samkaphang tharan alila shaothatra.”

²⁰ “Kala mi akhana rimlaga yangkashiwui vang mi akhali pharthathaiakha,

²¹ lah yangshāt eina apāng eina ali ngashumda thihaiakha, alila shaothatra; a mi khayumana; athut hāngsangki kajipana ali samkaphang tharan shaothatra.”

²² “Kha kachikathā yangkashi maningla matheimada kashuirak eina pharthathaiakha, lah marimla yapthathaiakha,

²³ lah yangkashila maning, ningrin leida sāthatkhangaila maningla, matheimada thikapai ngalung eina herda thihaiakha;

²⁴ mi sakathata eina asheewui athut khuiki kajipawui ngachaili yarui ashangva̱na shiyan-chikan chiwui athishurda bichar sāra;

²⁵ kala yarui ashangva̱na mi sākathata chili asheewui athut hāngsangki kajipawui eina kankhuilaga ngayin khavai keinungli chipamra, kala thao neomi kahai pāngmon chi mathiranglakha eina tangda ana chili pānra.

²⁶ Kha kalikha ana ngayin khavai keinungwui ayarli kānkashok theida,

²⁷ asheewui athut hāngsangki kajipana ashaothathaiakha, shaokathatwui khayon maleimana.”

²⁸ Kaja pāngmon kharei mathiranglakha eina tangda mipa chi ngayin khavai keinung chili pamphalungki kajina. Kha pāngmon kharei thikahaiwui thili mi sakathata chi awui shimlui khalei ramli latungki kajina.

²⁹ “Kala hibing hi mithot kachida nathumwui somkhavai pam saikorali ainza kala shiyan-chikan sāki kajina.”

³⁰ “Kalikha mi akhana mi sāthatakha, shākhibingna khami tui eina alila sāthatki kajina, kha shākhi akhamānghaiakha masāthatpaimara.

³¹ Chili lāngda khanguiya, mi shaokathata mirinwui ngatangman nathumna makhuipaimara, kha ali sāthatphalungra.

³² Kala ngayin khavai keinungli yāmsang kahai mi chili, pāngmon kharei mathirangakha shimli ungpam khavai ngatangman makhuipaimara.

³³ Nathumna pamda khalei ngalei chili hikathāwui eina mamakhao ngasakpaimara; kaja ashee katā eina ngalei makhao khangasakna, kala chi khikhanala phungthuikapai maleimana; kaja ashee tākhangasak eina ngalei makhao ngasak kahai chi, ashee tāngasak kahaipawui ashee maningla mapheopaimana.

³⁴ Nathumna pamda khalei hiwui alungli ila pamdalei, ngalei chi masākhamāngalu; kaja Proho I Israel mibingwui alungli pamda lei.”