MISHĀN 34 - Kathara Bible (BSI)

Ngalei Chiwui Thari

¹ Prohona Mosesli hānga,

² Israelwui mibingli kasolu kala athumli hānglu, “Nathumna Canaan ngaleili kazang tharan (nathumna shimluikat sākhavai ngalei tongda samphangki kaji Canaan ngalei china),

³ nathumwui azingvāk Zin lamhāng eina thuilaga Edom ngakhumtara; kala nathumwui azingshong Salt Sea vākatangli thari sākhuira;

⁴ kala Akrabbimwui ajuikakā azingshong tāda Zin makanvālaga Kadesh-barneawui azingshong vākatangli thari sākhuilu; chiwui thili Hazar-addar kantāda Azmon vāza̱ra;

⁵ kala Azmonwui eina thari chi Egypt kongrāvāk ngareiunglaga shamadruli ungtangra.

⁶ “Zingtun thariwui vanga, Great Sea eina chiwui shamadrupheibing hi nathumwui zingtun tharina; hi nathumwui zingtun thari sāra.

⁷ “Hi nathumwui atungshongwui tharina: Great Sea eina thuilaga Hor Kaphung vāshungda nathumwui thari sāvālu;

⁸ nathumna Hor Kaphung eina thuilaga Hamath vāzang khavaili thari sāvālu, kala thari chi Zedadli shangchatra.

⁹ Chiwui thili thari chi Ziphronvāk vāshungda Hazar-enanli shangtangra; hi nathumwui atungshongwui tharina.

¹⁰ “Nathumna zingshoshongwui thari Hazar-enan eina thuilaga Shaphamli thari sātāra;

¹¹ kala thari chi Shaphamwui eina Ainwui zingshoshong khalei Riblahli tāra; kala thari chieina tālaga zingshovāk kaphung aren vāda Chinnerethwui shamadruli tāza̱ra.

¹² Chiwui eina thuilaga Jordan tashungra, kala Salt Seali tātangra. Hi nathumwui ngaleili kuikhamarei tharibingna.”

¹³ Mosesna Israelnaobingli kasoda hānga, “Hi Prohona kakaso athishurda shang chiko eina shang tangkhaina kalā yanglaga shimlui sāki kaji ngaleina.

¹⁴ Reuben shangwui naomayarabing eina Gad shangwui naomayarabing, kala Manasseh shangwui naongarā tangkhai shangwui alungli avāva̱ ngarāwui shimkhur athishurda shimlui samphanghaira.

¹⁵ Shang khani kala shang tangkhai chi zingshovāk Jordan ngalemli khalei Jericholi athumwui shimlui samphang kahaina.”

Ngalei Khangayarli Kathānabingwui Phun

¹⁶ Prohona Mosesli hānga,

¹⁷ “Hi nathumwui shimlui sākhavai ngalei ngayarmiki kaje mibingna: pāngmon Eleazar eina Nunwui nao Joshua anina.

¹⁸ Nana shimluiwui vang ngalei chi ngayar khavai shang kachiva̱wui eina kathāna ava̱va̱ khuira.”

¹⁹ Hi athum mibingwui amingbingna: Judah shangwui eina Jephunnehwui naomayara Caleb.

²⁰ Simeon shangwui eina Ammihudwui naomayara Shemuel.

²¹ Benjamin shangwui eina Chislonwui naomayara Elidad.

²² Dan shangwui eina Jogliwui naomayara kathāna Bukki.

²³ Josephwui naopharāt Manasseh shangwui eina Ephodwui naomayara kathāna Hanniel.

²⁴ Kala Ephraim shangwui eina Shiphtanwui naomayara kathāna Kemuel.

²⁵ Zebulun shangwui eina Parnachwui naomayara kathāna Eli-zaphan.

²⁶ Issachar shangwui eina Azzanwui naomayara kathāna Paltiel.

²⁷ Kala Asher shangwui eina Shelomiwui naomayara kathāna Ahihud.

²⁸ Naphtali shangwui eina Ammihudwui naomayara kathāna Pedahel.

²⁹ Canaan ngalei chi Israelnaobingwui vang shimlui ngayarmi khavai Prohona kaso kahai mibing chi hina.