MISHĀN 33 - Kathara Bible (BSI)

Egyptwui eina Moab Shongzā

¹ Moses eina Aaronna Israelwui mibingli Egyptwui eina thānlaga ashang eina kashok tharan, athumna maron-maron eina vākazang apambing chi hina.

² Prohona kakaso athishurda Mosesna athumwui zatkaphok apam eina thuilaga maron-maron apambing chi kapihai; kala athumna zatkaphok atamwui athishurda apambing chi hina.

³ Athumna Rameseswui eina kachāng kharewui tharāda kaphangāthang Israelwui mibingna makānkhami phanitwui thili akhama kathā Egyptnaobingwui miktāli maiyālak eina zatphoka.

⁴ Chitharan Egyptnaobing athumwui ngachaili Prohona shaothat kahai athumwui naochizaibing chifasai; kala athumwui varebinglila Prohona bichar sai.

⁵ Chieina Israelnaobingna Rameseswui eina zatphoklaga Succothli rāmrah vasāpama.

⁶ Kala athumna Succothwui eina zatphokta lamhāng amareili khalei Ethamli rāmrah vasāpama.

⁷ Kala athumna Ethamwui eina zatphokta Baal-zephonwui zingshovāk Pi-hahirothli ngareiungda Migtolwui mangāli rāmrah vasāpama.

⁸ Kala athumna Hahirothwui eina zatphokta lamhānglungli khalei shamadru kānda Etham lamhāngli kathumthangwui shongzā zata, kala athumna Marahli rāmrah vasāpama.

⁹ Kala athumna Marahwui eina zatphokta Elimli vai; Elimli ura̱ tharāda khani khawok kala khaneirong hangshini phora, kala chili athumna rāmrah vasāpama.

¹⁰ Kala athumna Elimwui eina zatphokta Red Sea pheili rāmrah vasāpama;

¹¹ Kala athumna Red Seawui eina zatphokta Sin lamhāngli rāmrah vasāpama.

¹² Kala athumna Sin lamhāngwui eina zatphokta Dophkahli rāmrah vasāpama.

¹³ Kala athumna Dophkahwui eina zatphokta Alushli rāmrah vasāpama.

¹⁴ Kala athumna Alushwui eina zatphokta mibingna tara̱ mangkhavai masamkaphang Rephidimli rāmrah vasāpama.

¹⁵ Kala athumna Rephidimwui eina zatphokta Sinai lamhāngli rāmrah vasāpama.

¹⁶ Kala Sinā lamhāngwui eina zatphokta Kibroth-hattaavahli rāmrah vasāpama.

¹⁷ Kala athumna Kibroth-hattaavahwui eina zatphokta Hazerothli rāmrah vasāpama.

¹⁸ Kala Hazerothwui eina zatphokta Rithmahli rāmrah vasāpama.

¹⁹ Kala athumna Rithmahwui eina zatphokta Rimmon-perezli rāmrah vasāpama.

²⁰ Kala Rimmon-perezwui eina zatphokta Libnahli rāmrah vasāpama.

²¹ Kala athumna Libnahwui eina zatphokta Rissahli rāmrah vasāpama.

²² Kala Rissahwui eina zatphokta Kehelathahli rāmrah vasāpama.

²³ Kala athumna Kehelathahwui eina zatphokta Shepher Kaphungli rāmrah vasāpama.

²⁴ Kala athumna Shepher Kaphungwui eina zatphokta Haradahli rāmrah vasāpama.

²⁵ Kala Haradahwui eina zatphokta Makhelothli rāmrah vasāpama.

²⁶ Kala athumna Makhelothwui eina zatphokta Tahathli rāmrah vasāpama.

²⁷ Kala Tahathwui eina zatphokta Terahli rāmrah vasāpama.

²⁸ Kala athumna Terahwui eina zatphokta Mithkahli rāmrah vasāpama.

²⁹ Kala Mithkahwui eina zatphokta Hashmonahli rāmrah vasāpama.

³⁰ Kala athumna Hashmonahwui eina zatphokta Moserothli rāmrah vasāpama.

³¹ Kala Moserothwui eina zatphokta Bene-jaakanli rāmrah vasāpama.

³² Kala athumna Bene-jaakanwui eina zatphokta Hor-haggidgadli rāmrah vasāpama.

³³ Kala Hor-haggidgadwui eina zatphokta Jotbathahli rāmrah vasāpama.

³⁴ Kala athumna Jotbathahwui eina zatphokta Abronahli rāmrah vasāpama.

³⁵ Kala Abronahwui eina zatphokta Ezion-geberli rāmrah vasāpama.

³⁶ Kala athumna Ezion-geberwui eina zatphokta Zin lamhāngli (chiya Kadesh) rāmrah vasāpama.

³⁷ Kala Kadeshwui eina zatphokta Edom tharili khalei Hor Kaphungli rāmrah vasāpama.

³⁸ Kala Pāngmon Aaronna Hor Kaphungli kālaga Prohowui kakaso athishurda chili thihaowa. Hi Israelwui mibingna Egypt ngaleiwui eina kashok kum hangmatiwui thili, kachāng kaphangāwui kharethangna.

³⁹ Kala Aaronna Hor Kaphungli kathi atam chitharan a kum shākha maga̱da kathum kāhairasai.

⁴⁰ Kala Canaannaobing, Aradwui awunga, Canaan ngaleiwui Negeb apamli somkasāpa china Israelwui mibing rārāli da pao shai.

⁴¹ Kala Israelwui mibingna Hor Kaphungwui eina zatphoklaga Zalmonahli rāmrah vasāpama.

⁴² Kala athumna Zalmonahwui eina zatphokta Punonli rāmrah vasāpama.

⁴³ Kala Punonwui eina Obothli rāmrah vasāpama.

⁴⁴ Kala athumna Obothwui eina zatphokta Moabwui tharili khalei Iye-abarimli rāmrah vasāpama.

⁴⁵ Kala Iyimwui eina zatphokta Dibon-gadli rāmrah vasāpama.

⁴⁶ Kala athumna Dibon-gadwui eina zatphokta Almon-diblathaimli rāmrah vasāpama.

⁴⁷ Kala Almon-diblathaimwui eina zatphokta Nebowui mangāli khalei Abrim phungreili rāmrah vasāpama.

⁴⁸ Kala athumna Abarim phungreiwui eina zatphokta Jerichowui Jordan ngalemli khalei Moab tampākli rāmrah vasāpama.

⁴⁹ Athumna Jordanli rāmrah sākapam chi Beth-jeshimoth eina thuilaga Moab tampākli khalei Abelshittim shangshunga.

Jordan Mamakānranglakha Tamkachithei

⁵⁰ Kala Prohona Mosesli Moab tampākli khalei Jordan ngalemwui Jericholi hānga,

⁵¹ “Israelwui mibingli hānglu, nathumna Canaan ngaleili zangkida Jordan kakān chitharan,

⁵² nathumli rida ngalei chili pānkasā mibing saikora nathumna kashamshokserlu, kala athumwui lungshom, kala athumwui heikakhui meoma̱ kala athumwui khorum khavai kajuipam saikora sakazamserlu;

⁵³ kala nathumna chili shimlui khuida pamra, kaja ngalei chi ina nathumli shimlui sākhavai mihaira.

⁵⁴ Nathumna shangwui athishurda kalā yanglaga ngalei chi khuira; shang kateona teoda kala shang kahakana hakta samphangra; kalā yanglaga kashok chi mi chipawui sāra, navā ngarāwui shimkhur athishurda shangbing china ngalei chi khuira.

⁵⁵ Kha nathumna ngalei chili rida pānkasa mibingli makashamshok ngakān-akha, katai athum china nathumwui vang mikli khayam kazang kala arili kashāt kazang thahaora, kala nathumwui kapampamli athumna sheikhutchingra.

⁵⁶ Kala ina athumli sāmira da phaningkasā thāda ina nathumlila sāra.”