MISHĀN 31 - Kathara Bible (BSI)

Midianli Kathara Rai Kasā

¹ Prohona Mosesli hānga,

² “Midiannaowuitungli Israelwui mibingna athut khuingasaklu; chiwui thili nali nawo nayiwuili khuiunghaora.”

³ Kala Mosesna mibingli hānga, “Mibingli raisāri shaksā ngasaklu; chieina athumna Prohowui vang Midiannaoli athut hāngsangmira.

⁴ Nana shang-shangwui eina mi thingthing raili chihora.”

⁵ Chithāda Israel shang tharāda khaniwui eina raiwui vang mi thing tharāda khani shoka.

⁶ Kala athum mi thing tharāda khani chi pāngmon Eleazarwui nao Phinehasli ngasoda raili chihovai; awui pāngli katharapamwui khorkhongbing kala khongkhavai talla̱la sangmi.

⁷ Mosesli kaso kahai athishurda athumna Midiannaoli rai sāda mayarnao katonga shaothathaowa.

⁸ Midiannaowui awungabing kala khangateibingli ngasoda shaothathaowa; awungabing chiya, Evi, Rekem, Zur, Hur, kala Reba athum phangāna; Beorwui nao Balaamlila raighai eina sāthathaowa.

⁹ Kala Israelwui mibingna Midiannaowui sha̱nao naoshinaobing tukunga; kala athumwui sha̱kei, yaoshang, kala ot katonga ngaponkhuilaga khuiunga.

¹⁰ Athumna kapam keinung kala kha̱ saikora athumna mei thottamihaowa,

¹¹ kala ngaponkakhui otbing, mila, sha̱keila khuiunga.

¹² Athumna ngaponkakhui otbing kala tukkakhui mibing saikora Moses, pāngmon Eleazar kala Israel ashangva̱wui mangāli athumna khuiungmi, hi Jerichowui Jordan ngalemli khalei Moab tampākpheilina.

Raimi Hankhaung

¹³ Moses, pāngmon Eleazar kala yarui ashangva̱wui kathāna saikora athumli samphang khavai rāmrah ayarli shokngaroka.

¹⁴ Kala Mosesna raiwui eina hankhaunga raimi otva̱bing thingkhali kala shākhali kathāna akhavābingli malungvāthaowa.

¹⁵ Mosesna athumli hānga, “Nathumna sha̱nao saikora hi ring khangasakla?

¹⁶ Peorwui maramli Proholi ngakaishilak eina sākhavai Israelnaobingli Balaamna hāngkachitheiwui vang, yanglu Prohowui ashangva̱wui lungli kazātkashi kharāna.

¹⁷ Chiwui vang eina mayarnao naoshinao, kala mayarnaoli ngasopi kahai sha̱nao saikorala sāthathaolu.

¹⁸ Kha mayarnaoli mangasokapi sha̱nao saikora nathum khalattawui vang khuilu.

¹⁹ Rāmrahwui ayarli shinithang rāmrah vāsāpamlu; nathum kachikathāna mi sāthat kahai, kala kathingun saza̱ kahai leiakha nathum kala tukkhaungbing kakathumathang kala kashinethang tharngasakra.

²⁰ Nathumna kashankachon kachiva̱, sāhuiwui ot saikora, mesamwui ot, kala thing eina sākakhuiwui ot kachiva̱ samathāra.”

²¹ Kala Pāngmon Eleazarna raili khavā mibingli hānga: “Prohona Mosesli kaso kahai ningkhamiwui ain chi hina:

²² Meina makachui ot, sinā, lupāsā, pithrai, mari, tin, kala mishi,

²³ meili khāngkashapa kachiva̱ meilungli sangda khuishokphalungra, kala chi tharhaora. Chithālala makathara chi tara̱ eina tharngasakluipai; kala meili masangkapai kachiva̱ tara̱li sangda khuishokra.

²⁴ Nathumna kashinethang kashankachon ngasa̱ra, kala nathum tharra; chiwui thili nathumna rāmrahli zangra.”

Ngaponkakhui Khangayar

²⁵ Prohona Mosesli hānga,

²⁶ “Ngaponkakhui mila sha̱keila saikora pāngmon Eleazar eina Israel ashangva̱ avāva̱ ngarā shimkhurwui akhavābing nathumna shānkhuilu.

²⁷ Ngaponkakhuibing chi khum khani sāda ngayarlaga khumkha rai khavābingli kala khumkha yarui ashangva̱li da ngayarmilu.

²⁸ Kala rai khavābingwui yarwui eina Proho wui vang, milapai, seilapai, gadhālapai, kala yaolapai shāphangāngāwuili ava̱va̱ shai sāda khuira;

²⁹ athumwui tangkhai chiwui eina khuilaga Proholi chigat khavai pāngmon Eleazarli milu.

³⁰ Kala Israelli khami tangkhaiwui eina milapai, seilapai, gadhālapai, kala yaolapai, sha̱keibing hangphangāngāli ava̱va̱ khuira, kala Prohowui tabernacle yangda khalei Levinaobingli mihaolu.”

³¹ Kala Moses eina pāngmon Eleazarna Prohowui kakaso tākam eina sai.

³² Raili khavābingna ngaponkakhui raimibingwui vang khuishoklaga katai chi hina: yao shātharuk kala thing hangshinida phangā,

³³ sei thing hangshinida khani,

³⁴ gadhā thing hangtharukta akha,

³⁵ kala mayarnaoli mangasopirang kaje sha̱nao thing thumrāda khanina.

³⁶ Kala raili khavābingna tangkhai samkaphang chi, yao shākathum kala thing thumrāda shini shāphangāna,

³⁷ kala Proholi shai mikhavai yao shātharuk kala hangshinida phangāna.

³⁸ Sei thing thumrāda tharukna, chili Proholi shai mikhavai sei hangshinida khanina.

³⁹ Gadha thingthumrā shāphangā, chili Proholi shai mikhavai gadhā hangtharukta akhana.

⁴⁰ Sha̱nao thingtharāda tharukna, chili Proholi shai mikhavai sha̱nao thumrāda khanina.

⁴¹ Chieina Proholi khami kachigat shaibing chi, Prohona kakaso athishurda Mosesna pāngmon Eleazarli mihaowa.

⁴² Mosesna Israelwui mibingli tangkhai, raili khavā mibingli tangkhai da mi—

⁴³ yarui ashangva̱na tangkhai samkaphang chi, yao shākathum kala thing thumrāda shinina,

⁴⁴ sei thingthumrāda tharuk,

⁴⁵ kala gadhā thingthumrā shāphangāna,

⁴⁶ kala sha̱nao thingtharāda tharukna.

⁴⁷ Israel katongawui yar tangkhai chiwui eina mila, sha̱keila hangphangāngāli ava̱va̱ Mosesna khui, kala chi Prohona kaso kahai athishurda tabernacle khayanga Levibingli mihaowa.

⁴⁸ Chiwui thili raimi thingthingwui otva̱bing, kala thingthingwui kala shāshāwui raithānabing Moseswui ngalemli rākazipa,

⁴⁹ kala Mosesli hānga, “Narao ithumna thānda raili khavābing shānlaga ithumwui eina mi akhala mashimānmana.

⁵⁰ Kala ithum mi kachiva̱na samkaphang Proholi chigatki kaji otbing sinā, hār, chā, shoi khutop, kala unra̱ khuirāhaira, ithum khalattawui vang Prohowui mangāli pheomi khavai khuikharāna.”

⁵¹ Kala Moses eina pāngmon Eleazarna khuikharā sinā kala khangatatei otbing chi khuiya.

⁵² Kala raimi thingthing, kala shāshāwui raithānabingna Proholi rākachigat sinā katonga chi shekel thingtharāda tharuk shāshini kala hangphangāna.

⁵³ (Raili khavā kachiva̱ athum khalattawui vangla khuiya).

⁵⁴ Chieina Moses eina pāngmon Eleazarna raimi thingthingwui kala shāshāwui raithānabingwui eina samkaphang sinā chi khuilaga Israelwui mibingna phaningung khavai kazip khavai kachonshimli Prohowui mangāli kaziphai.