MISHĀN 30 - Kathara Bible (BSI)

Tuingashit Kasāwui Ainza

¹ Mosesna Israel shangbingwui akhavābingli hānga, hi Prohona kakasona.

² Mi akhana Prohowui mangāli akhalatta khangashit kasā nilala, shākhi kasā nilala, makai ngasakla akhamorwui eina shokkahai tui chi a mayonphalungra.

³ Lha avāva̱wui shimli khalei sha̱nao akhana nganuilakha Prohowui mangāli tuingashit sākahai chi,

⁴ avāva̱na shālaga khikha mahāngakha, awui tuingashit chi leiching ngasakra, kala ana mayonshapra da shākhi hangtā kahai chili nganing ngasakra.

⁵ Kha avāva̱na chi shāthang ana mamayaakha, awui khangashit kala shākhi hangtā kahai chi manganingpaimara; kala avāva̱na makhamayāwui vang sha̱nao chili Prohona pheomira.

⁶ Kalikha ana awui khangashitwui azingli leilaga lah machukmaja̱la akhamor eina matuitā kahai china khalapta leilakha fathuihaida,

⁷ agaharana chi shāthang khikha mahāngakha, ana ngashit kahai chi leipapamra, kala ana hāngkahai tuingashit lungli khalapchingfaya.

⁸ Kha agaharana chi shāthang makhamayā chitheiakha, awui khangashit lah akhamor eina machukmaja̱la matuitā kahai chi khikha makhaning ngasāhaora kala Prohona ali pheomira.

⁹ Kha ra̱meinao akhana, chi maningakha pāngkahai sha̱nao akhana khangashit kasā chi awuili leichingra.

¹⁰ Sha̱nao china agaharawui shimli rākahaiwui thili khangashit saakha,

¹¹ kala agaharana chi shālaga khikha mahāngla kala ali makhāmayā maleiakha, awui khangashit kala akhalattana shākhi hangtā kahai saikora leira.

¹² Kha agaharana chi shāthang shimitmihaiakha awui khangashit kala akhamor eina shākhi hangtā kahaibing chi khikha makhaning ngasāhaora. Chi agaharana shimitmi kahaina, chieina Prohona ali pheomira.

¹³ Tuingashit chi, maningakha shākhi hangtā kahai china akhalattali chotchāngkapai lei jiakha agaharana mashungmipai, lah agaharana shimithaipai.

¹⁴ Kha agaharana shāthang khikha mahāngakha apreiva̱wui tuingashit hangtā kahai chi ana mashungmi kahaina, awui tuingashitbing awuili leishona; kaja ana chi shāthang khikha mahāngmana.

¹⁵ Kha ana chi shālaga shimitmihaiakha, chiwui khayonkhamāng chi ana phungra.

¹⁶ Hi gahara eina preiva̱, avāva̱ eina mafakathui naongalāva̱, avāva̱wui shimli leilakhawui aniwui ngachaili shiyan sākhavai Prohona Mosesli kakasona.