MISHĀN 29 - Kathara Bible (BSI)

Kumdhar Phanitli Kachigat

¹ Kachāng kashinewui kharethang nathum kathara kazip khuira; chithang nathum ot masāpaimara. Nathumna talla̱ kakhong zimikshona,

² kala nathumwui Proholi ningyāngkhaung nganamkaphā rikkatā kachigat sāra; mukkānao akha, yaovā akha, kumkha kākahai achuk kapei yaovānao shini;

³ kala athumwui thao manāt kahai tharāzāt kachigatwui khamanaka mathir, mukkāwui vang khuilui akhawui akhum tharāwui kathum, yaovāwui vāng akhum tharāwui khani;

⁴ kala yaovānao shini chili ava̱va̱wui vang akhum tharāwui akha;

⁵ kala pheomi khavai suihamchigatwui vang mevā akha chigatra;

⁶ Hi changwokwui rikkatā kachigat eina chiwui tharāzāt kachigat, kala machatlakla rikkatā kachigat eina tharāzātchigat, ra̱shakchigat shiyan-chikanwui athishurda Proholi ningyāngkhaung nganamkaphā rikkatā kachigat saikorali lāngda chigatra.

Pheokhami Zimikshowui Kachigatbing

⁷ Kachāng kashinewui katharāthang nathumna katharā kazip khuira. Nathum khalatta khumra, nathum ot masāpaimara;

⁸ kha nathum Proholi rikkatā ningyāngkhaung nganamkaphā kachigat sāra: mukkānao akha, mevā akha, kala nathumna kumkha kākahai achuk kapei yaovānao shini chigatra;

⁹ kala athumwui thao khamanāt tharāzātwui khamanak mathir, mukkā akhawui vang khuilui akhawui khum tharāwui akhum kathum, yaovā akhawui vang khum tharāwui khani,

¹⁰ yaonao ava̱va̱wui vang khum tharāwui akhum akha;

¹¹ suihamchigatwui vang mevā akhala chigatra. Hi pheomi khavai kachigat, kala machatlakla rikkatā kachigat kala chiwui tharāzāt kachigat, kala ra̱shakchigat kachigatli lāngda chigatra.

¹² Kachāng kashinewui tharāda kaphangāthang nathumna kathara kazip khuira; nathum ot masāpaimara, kha nathumna Proho wui vang shinithang phanit mayonra;

¹³ kala nathumna mei eina riktāda Proholi ningyāngkhaung nganamkaphā rikkatā kachigat sāra; mukkānao tharāda kathum, yaovā khani, kumkha kākahai achuk kapei yaovānao tharāda mati chigatra;

¹⁴ kala athumwui thao khamanāt tharāzātchigatwui khamanak mathir, mukkā akhawui vang khuilui akhawui khum tharāwui akhum kathum, yaovā khaniniwui vāng khum tharāwui akhum khani,

¹⁵ kala yao ava̱va̱wui vang khum tharāwui akhum akha;

¹⁶ suihamchigatwui vang mevā akhala chigatra, hi machatlakla rikkatā kachigat, tharāzātchigat kala ra̱shakchigatli lāngda chigatra.

¹⁷ Kakhanethang mukkanao tharāda khani, yaovā khani, kumkha kākahai yaovānao achuk kapei tharāda mati,

¹⁸ kala tharāzātchigat eina ra̱shakchigat, mukkānao, yaovā, kala yaovānaobingwui vang mashing eina khangachā shiyan-chikanwui athishurda chigatra;

¹⁹ suihamchigatwui vang mevā akhala chigatra, hi machatlakla rikkatā kachigat, tharāzātchigat kala ra̱shakchigatli lāngda chigatra.

²⁰ Kakathumathang mukkā tharāda akha, yaovā khani, kumkha kākahai achuk kapei yaovānao tharāda mati,

²¹ tharāzātchigat eina ra̱shakchigat mukkā, yaovā, kala yaonaobingwui vang mashing eina khangachā shiyan-chikanwui athishurda chigatra;

²² suihamchigatwui vang mevā akhala chigatra, hi machatlakla rikkatā kachigat kala chiwui tharāzātchigat kala ra̱shakchigatli lāngda chigatra.

²³ Khamatethang mukkā tharā, yaovā khani, kumkha kākahai achuk kapei yaovānao tharāda mati,

²⁴ muisakchigat eina ra̱shakchigat, mukkā, yaovā, kala yaonaobingwui vang mashing eina khangachā sharphahorwui athishurdawui thāda chigatra;

²⁵ suihamchigatwui vang mevā akhala chigatra, hi machatlakla rikkatā kachigat, kala chiwui tharāzātchigat kala ra̱shakchigatli lāngda chigatra.

²⁶ Kaphangāthang mukkā chiko, yaovā khani, kumkha kākahai achuk kapei yaovānao tharāda mati,

²⁷ tharāzatchigat eina ra̱shakchigat, mukkā, yaovā, kala yaonaobingwui vang mashing eina khangachā shiyan-chikanwui athishurda chigatra;

²⁸ suihamchigatwui vang mevā akhala chigatra; hi machatlakla rikkatā kachigat, tharāzātchigat, kala ra̱shakchigatli lāngda chigatra.

²⁹ Katharukathang mukkā chishat, yaovā khani, kumkha kākahai achuk kapei yaovānao tharāda mati,

³⁰ tharāzātchigat eina ra̱shakchigat, mukkā, yaovā, kala yaonaobingwui vang mashing eina khangachā sharphahorwui athishurda chigatra;

³¹ suihamchigatwui vang mevā akhala chigatra; hi machatlakla rikkatā kachigat, tharāzātchigat kala ra̱shakchigatli lāngda chigatra.

³² Kashinethang mukkā shini, yaovā khani, kumkha kākahai achuk kapei yaovānao tharāda mati,

³³ tharāzātchigat eina ra̱shakchigat, mukkā, yaovā kala yaonaobingwui vang mashing eina khangachā shiyan-chikanwui athishurda chigatra;

³⁴ suihamchigatwui vang mevā akhala chigatra; hi machatlakla rikkatā kachigat, tharāzatchigat kala ra̱shakchigatli lāngda chigatra.

³⁵ Kachishatathang nathumna chingri kahai kazip khuira: nathum ot masāpaimara,

³⁶ kha nathumna mei eina riktāda Proholi ningyāngkhaung nganamkaphā rikkatā kachigat; mukkā akha, yaovā akha, kumkha kākahai achuk kapei yaovānao shini,

³⁷ kala tharāzātchigat eina ra̱shakchigat, mukkā, yaova, kala yaonaobingwui vang mashing eina khangachā shiyan-chikanwui athishurda chigatra;

³⁸ suihamchigatwui vang mevā akhala chigatra; hi machatlakla rikkatā kachigat, kala chiwui tharāzātchigat, kala ra̱shakchigatli lāngda chigatra.

³⁹ Nathumwui langchin sākahai phanitbingli hibing hi nathumna khalattawui khangashit kachigat, lemmet kachigat, rikkatā kachigat, tharāzātchigat, ra̱shakchigat, kala ningyatchigatli lāngda Proholi chigatra.

⁴⁰ Kala Prohona Mosesli kaso kahai kachiva̱ tāzak eina ana Israelwui mibingli hāngchitheiya.