MISHĀN 28 - Kathara Bible (BSI)

Thang-thangwui Kachigatbing

¹ Prohona Mosesli hānga,

² Israelwui mibingli kasoda ili kachigat, mei eina rikkatā kachigat iwui kashakazā kala ningyāngkhaunga nganamkaphā atam atamli rāchigat khavai hānglu.

³ Kala nana athumli hānglu kaja hi Proholi khami mei eina rikkatā kachigatna: achuk kapei kumkha kākahai yaovānao khani thangkachida machatlakla chigatra.

⁴ Yaonao akhana ngathorshong chigatra, kala akhapā china ngazinshong chigatra;

⁵ kala tharāzātchigatwui vangla khamanaka mathir khuilui akhawui akhum kathara, kala shungkakhui thao lengkhor matiwui akha chi manātra.

⁶ Hi ningyāngkhaung nganamkaphā Proholi mei eina riktāda kachigat Sinai Kaphungli tharchisin kahai machatlakla rikkatā chigatna.

⁷ Ra̱shak kachigat chi yao ava̱va̱li lengkhor akhum matiwui akha mira; katharapamli ra̱shakchigat zamshei chi Proholi heisangmira.

⁸ Yao akhapa chi ngazinshong chigatra; ngathorshongwui tharāzāt kachigat kala ra̱shakchigat kachigat thāda, nana chi mei eina Proholi ningyāngkhaung nganamkaphā chi chigatra.

Sabbath Thangwui Kachigat

⁹ Sabbath zimiksholi kumkha kākahai achuk kapei yaovānao khani, kala tharāzātchigatwui vang mathir khuilui akhawui akhum katharāwui khum khani thao eina khamanāt, kala chiwui ra̱shakchigat khuirāra,

¹⁰ hi machatlakla rikkatā kachigat eina ra̱shakchigatli lāngda sabbath kachidawui rikkatā kachigat saki kajina.

Kachāngwui Kharethang Kachigat

¹¹ Nathumwui kachāng haokaphok kachida nathumna Proholi rikkatā kachigat mira: mukkā khani, yaovā akha, kumkha kākahai achuk kapei yaovānao shini;

¹² kala mukkā ava̱va̱wui vang thao khamanāta tharāzātchigatwui mathir khuilui akhawui akhum tharāwui kathum; kala yaovā akhawui vang thao khamanāta tharāzātchigatwui mathir khuilui akhawui akhum tharāwui khani;

¹³ kala yaonao akhawui vang thao khamanāta tharāzātchigatwui mathir khum tharāwui akha da mei eina riktāda kachigat chi Proholi ningyāngkhaung nganamkaphā sāda mira.

¹⁴ Athumwui ra̱shakchigat chi mukkā akhawui vang lengkhor akhawui tangkhaira, yaovā akhawui vang lengkhor akhawui khum kathumwui akhara; kala yaonao akhawui vang lengkhor akhawui khum matiwui akhara. Hi kum peidawui kachāngchāngli mei eina rikkatā kachigatna.

¹⁵ Kala suihamchigatwui vang Proholi mevā akha chigatra, hi machatlakla rikkatā chigat eina ra̱shakchigatli lāngda chigatki kajina.

Khawok Makazang Khamui

¹⁶ Kachāng kharewui tharāda khamatethang hi Prohowui makānkhami phanitna.

¹⁷ Kala kachāng hiwui tharāda kaphangāthang hi phanitna; shinithang khawok makazang khamui shaira.

¹⁸ Kharethang kathara kazip khuira: nathum ot masāpaimara,

¹⁹ kha mei eina rikkatā chigatlu, rikkatā kachigat Proholi sālu: mukkānao khani, yaovā akha kala kumkha kākahai yaovānao shini chigatra; chibing achuk peiphalungra;

²⁰ kala athumwui tharāzāt kachigatla khamanaka mathir thao khamanāt chi mukkā akhawui vang khuilui akhawui akhum tharāwui kathumra, kala yaovā akhawui vang khum tharāwui khani chigatra,

²¹ kala nathumna yaovānao shini chi ava̱va̱wui vang akhum katharā chigatra;

²² kala nawui vang pheomi khavai suihamchigatwui vang mevā akhala chigatra.

²³ Hi nana ngathor kachida machatlakla rikkatāchigatli lāngda chigatki kajina.

²⁴ Chi tākam eina shinithang thangkachida nathumna kashakazā mei eina kachigat chi Prohowui ningyāngkhaung nganamkaphā otna, hi machatlakla rikkatāchigatli kala chiwui ra̱shak kachigatli lāngda chigatra.

²⁵ Kala kashinethang nathum kathara kazip khuira; chithang nathum ot masāpaimara.

Dharreo Phanitli Kachigat

²⁶ Dharreo atamli nathumna haptā akha phanit sālaga Proholi matheikhare tharāzatwui mā chigat kahai eina nathum khathara kazip khuira; chithang nathum ot masāmara,

²⁷ Kha Proholi ningyāngkhaung nganamkaphā rikkatā chigatra: mukkānao khani, yaovā akha, kumkha kākahai yaonao shini;

²⁸ kala chiwui thao khamanata tharāzatwui khamanaka mathir, mukkā ava̱va̱wui vang khuilui akhawui akhum tharāwui khum kathum, yaovā akhawui vang akhum tharāwui akhum khani,

²⁹ yaonao shini chi ava̱va̱wui vang akhum katharā chigatra;

³⁰ mevā akha nathumwui morei pheomi khavaiwui vang chigatra.

³¹ Machatlakla rikkatā kachigat kala tharāzātchigatli lāngda hibing nana athumwui ra̱shakchigatla chigatmira. Theilu, kaja chibing chi achuk kapei sā phalungra.