MISHĀN 24 - Kathara Bible (BSI)

¹ Prohona Israelli ningyāngkhaung somikhangai chi theihaoda, Balaamna kharewui thāda Vareli ngasan khavai mavāluimana, kha lamhāngvāk mai ngareivai.

² Balaamna ngashantāda Israel shang-shang eina rāmrah sākapam chi Balaamna thei. Kala Varewui manglā ali rāzanga,

³ kala ana marān tui chi hānga, “Beorwui nao Balaamwui marān tuina, Mik mathingmi kahaiwui marān tuina,

⁴ Varewui tui khanganāpāwui marān tuina, Reikhamataiyana rāmahā khamina, konglui zanglala awui mik makafamana.

⁵ O Jacob, nawui kachonshim kayākha mathāli, O Israel, nawui rāmrahsom kayākha yangngaili!

⁶ Hamphek kahai tampāk thada, kongpheiwui yāmgui thada, Prohona lingsang kahai aloe arongbing thada, tara̱pamwui cedarthing thada lei.

⁷ Awui khongsaiwui eina tara̱ longra, kala awui atha tara̱pam saikorali leira. Awui awungana Agagli juimeira, kala awui wungramli masot mira.

⁸ Varena ali Egyptwui eina khuishoka; awui pangshap ramsei ngajina, ali yangkashe yurbingli ana shaihaora, kala athumwui ara̱kui akha̱-akhā sāmira, kala awui malā eina kapngara̱wutmihaora.

⁹ Ana kazingkha̱ thada ngayaipama, kala kazingkha̱ ava̱ thāda; khipāna ali mathotshaprakhala? Nali sokhamibing chili sokhami ngasāranu, kala nali khonkashe chili khonkashi ngasāranu.”

¹⁰ Kala Balakna Balaamli malungvātlakhaoda apāng kaphelaga Balaamli hānga, “Iwui yangkashebingli khonshi khavai nali kahona, kha yanglu, nana hithāda kathum shida somihaira.

¹¹ Chiwui vang eina ara naram ungulu; ‘Ina nali khayāshira’ da ina hānghaisai, kha khayākashi chi Prohona nawui khāmhaira.”

¹² Chieina Balaamna Balakli hānga, “Nana chihokharā paomebingli ina mahāngmala?

¹³ Balakna ili sinā lupā awui shim khatkha milala, Prohona kachithei chili lāngda ina mahāngmara, kaphāla lah kashila iwui ning eina mahāngmara; Prohona kahāng chi matuira majimala?”

Balaamna Khanaowa Khamarān

¹⁴ “Yanglu, ara iwui mibingli ungura; kha mibing hina naoda nawui mibingli khi sarakhala kaji ina hangchitheika, rālu.”

¹⁵ Chieina ana awui hāngki kaji chi hānga, “Beorwuinao Balaamwui marān tuina, mik mathingmi kahai awui marān tuina,

¹⁶ Varewui tui khanganāpawui marān tuina, juikhamatai awui ningthem katheipawui tuina. Reikhamataiana ramahā khamina, konglui zanglala mik makafamana:

¹⁷ Ina ali thei, kha arui maningmana; Ina ali yanga, kha manganaimana: Jacobwui eina sirā akha shokra, Israelwui eina khānthing akha kharshokra; china Moabwui khavei ngaphitkhaira, kala Shethwui naomayarabingli sākhayāngra.

¹⁸ Edom ramchohaora, awui yangkashe Seirla ramchohaora, Israelva kapinga ngasāra.

¹⁹ Jacobna munghaora, kala keinungli kataibing sāshimānhaora!”

²⁰ Chieina ana Amaleknaovāk ngareivāda, ana awui hāngki kaji hānga. “Amalek hi yurbingwui ngachaili kharena, kha anaolamshong a shimānhaora.”

²¹ Kala ana Kenwuivāk ngareivāda, ana awui hāngki kaji hānga, “Chotchāngda kakhāng chi nawui apamna, kala nawui athip lunghārli sakai;

²² chithālala Cain sākhayānghaora, Asshurna nali karankha sāngda tukthuira̱khala?”

²³ Kala ana hāngki kaji chi hānga, “Iyavo, Varena hi shokkhangasak tharan, khipāna ringrakhala?

²⁴ Kha Kittimwui eina jahas rāra, kala Asshur eina Eberli rekharekra, kala alila sāshimānhaora.”

²⁵ Chiwui thili Balaamna ngakarthuida awui pamli unghaowa; kala Balakla awuili unghaowa.