MISHĀN 23 - Kathara Bible (BSI)

¹ Kala Balaamna Balakli hānga, “Hili iwui vang hanphut shini sālu, kala mukkā shini, yaovā shinida ngarānmilu.”

² Balakna Balaamwui kahāng chi sai; kala Balaam eina Balakna hanphut kachiva̱li mukkā eina yaovā chigata.

³ Kala Balaamna Balakli hānga, “Nawui rikkatā kachigatwui ngalemli nganinglu, I thuihaoka, Prohona ili rāsamphanglapai; kala ili kachithei saikora chi ina nali hāngra.” Ana juikhamei apamli kai.

⁴ Kala Varena Balaamli samphanga, kala Balaamna hānga, “Ina hanphut shini ngarānhaira, kala hanphut ava̱va̱li mukkā akha, yaovā akhada chigathaira.”

⁵ Kala Prohona Balaamwui khamorli tui sangmida hānga, “Balakli latunglu, kala hi ali hānglu.”

⁶ Kala Balaamna ali latunga, kala yanglu, Balak eina Moabwui wungnaobing hanphut chiwui ngalemli nganingsai.

⁷ Balaamna matuiki kaji matuiphoka. “Moabwui awunga Balakna Aramwui eina ili khuirai, zingsho phungreiramwui eina: ‘Ralu, Jacobli rakhonshilu iwui vang! Kala rālu, Israelli rāmashātlu!’

⁸ Varena makhonkashi yurli ina, kathāda khonshira! Prohona makhamashāta a chili ina kathāda mashātra?

⁹ Kaja phungreitonwui eina ina ali thei, phungrābingwui eina ina ali yanga; yanglu, khalatta somkapama miyurna, yur khangateili mashānrummana!

¹⁰ Jacobwui chifa khipāna shānshap, lah Israelwui mishān khipāna machukshapkhala? Khangarong chiwui mithit ili thingasaklu, Iwui khanaowa awui thāngasaklu.”

¹¹ Kala Balakna Balaamli hānga, “Na khi kasākhala? Iwui yangkashebingli khonshi khavai ina nali hokakhuina kha yanglu, nana athumwuitungli khikha masāla somihaira.”

¹² Ana ngahānkai, “Prohona ikhamorli sangkhami chi maningla ina khi matuirakhala?”

Balaamna Kakhane Khamarān

¹³ Chieina Balakna ali hānga, “Athumli theikapai apam khangatei akhali ili ngasovāda, athum katonga matheilala nganaida khaleibing theira. Chiwui eina nana iwui vang athumli khonshilu.”

¹⁴ Kala ana ali Zophim tampāk kānlaga Pisgah kaho kajuipam akhali thānkai, kala hanphut shini sālaga hanphut ava̱va̱li mukkā akha, yaovā akhada chigata.

¹⁵ Balaamna Balakli hānga, “Ina lākhavāk Proholi vāsamphangda leilakha nawui rikkatā kachigat hiwui ngalemli nganingsālu.”

¹⁶ Kala Prohona Balaamli samphanga, kala akhamorli tui sangmida hānga, “Balakli hanungulu kala chithāda nana ali hānglu.”

¹⁷ Ana khaung eina, yanglu, Balak eina Moabwui wungnaobing rikkatā kachigatpam chili nganingsai. Kala Balakna ali hānga, “Prohona khi hāngkhala?”

¹⁸ Chieina Balaamna matuiki kaji matuiphoka, “Ngakarthuilu, Balak, kala nganālu, Ili nganālu, O Zipporwui nao:

¹⁹ Vare hi kakapika maningmana, lah ning ngacheiki kaje miwui nao maningmana. Ana hāngkahai ngalanrala? Lha ana matui kahai maungshung ngasakmala?

²⁰ Yanglu, somi khavai ili kasohaira; ana somi kahai ina makhalanpaimana.

²¹ Ana Jacobli kalākashi matheimana, lah ana Israelli pa̱khangapā matheimana. Proho athumwui Varena athumli ngasomida lei, kala awunga akhawui khavaokhon chi athumwuili lei.

²² Varena athumli Egyptwui eina khuishoka, athum ramseiwui angaji thāda phona.

²³ Kaja Jacobli suida makānāmana, Israelli meowor sāda makānāmana. Ara Jacob eina Israelli hithāda hāngra, ‘Varena khi sāmihaira!’

²⁴ Yanglu, miyur chi! kazingkha̱ ava̱ thāda ngakarthui kala kazingkha̱ thāda katingkai; sāshai matukkhuiranglakha eina tangda, kala chiwui ashee mamangranglakha eina tangda, ana mapamzangmana.”

²⁵ Kala Balakna Balaamli hānga, “Athumli khonkashila makhonshialu, kasola masomialu.”

²⁶ Balaamna Balakli ngahānkai, “Prohona kahahāng chi ina sāra da ina rida mahāngmala?”

Balaamna Kakathuma Khamarān

²⁷ Balakna hānga, “Rālu, ina apam khangateili thānvāluika; chile Vareli ningyāng ungngasakta athumli iwui vang khonshi ngasaklapai.”

²⁸ Chieina Balakna Balaamli tampāk yangtāpsangda khalei Peorwui kaphungtonli thānkai.

²⁹ Kala Balaamna Balakli hānga, “Hili hanphut shini sālu, kala mukkā shini, yaovā shini iwui vang khangarān sāmilu.”

³⁰ Kala Balaamna hāngkahai chi Balakna sai, kala hanphut ava̱va̱li mukkā akha, yaovā akha da chigata.