MISHĀN 2 - Kathara Bible (BSI)

Shang-shangwui Kathānabing

¹ Prohona Moses eina Aaronli hithada hānga,

² Israelwui mibingna kachichāshi shimkhurwui theikhui khavai ichichāshiwui philān leilaga rāmrah sāpamra; athumna kazip khavai kachonshim chili mai ngareingasungda kuimareida rāmrah sāra.

³ Zingshoshong rāmrah sāda pamki kajibing chi Judahwui philān athishurda kachichāwui ashangva̱ eina pamra, Judah shangwui kathāna chi Amminadabwui nao Nahshonna sāda,

⁴ awui ashangva̱ mashing thing hangshinida mati shātharukna.

⁵ Awui thichangli ngasāmki kaji chiya Issacharwui shangna, Issachar shangwui kathāna chi Zuarwui naomayara Nethanelna sāda,

⁶ awui ashangva̱ mashing thing hangphangāda mati shamatina.

⁷ Chiwui thili Zebulunwui shang, Zebulun shangwui kathāna chi Helonwui naomayara Eliabna sāda,

⁸ awui ashangva̱ mashing thing hangphangāda shini shamatina.

⁹ Judahwui rāmrah athumwui tangbing chiwui katonga mishān lakh akha thing hangchishatta tharuk shāmatina. Athumna rimeikapta zatphokra.

¹⁰ Azingshong rāmrah sāda pamki kajibing chi Reubenwui philān athishurda kachichāwui ashangva̱ eina pamra, Reuben yurwui kathāna chi Shedeurwui nao Elizurna sāda,

¹¹ awui ashangva̱ mashing thing hangmatida tharuk shāphangāna.

¹² Kala awui thili Simeonwui shang, Simeon yurwui kathāna chi Zurishaddaiwui naomayara Shelumi-elna sāda,

¹³ awui ashangva̱ mashing thing hangphangāda chiko shākathumna.

¹⁴ Chiwui thili Gadwui shang, Gad mibingwui kathāna chi Reuelwui naomayara Eliasaphna sāda,

¹⁵ awui ashangva̱ mashing thing hangmatida phangā shātharuk kala hangphangāna.

¹⁶ Reubenwui rāmrah eina athumwui shang katonga mishān lakh akha thing hangphangā shāmati hangphangāna. Athumna kakhaneli zatra.

¹⁷ “Chieina kazip khavai kachonshim kaphungabing china zatta Levishiwui rāmrahna shang khangateiwui alungli zangra; athumna rāmrah vākasā chithāda athumna chi tākam eina zatra, athum ava̱va̱na kachichāwui philān athishurda ngasozatra.

¹⁸ “Zingtunshong rāmrah sāda pamki kajibing chi Ephraimwui philān athishurda kachichāwui ashangva̱ eina pamra, Ephraim shangwui kathāna chi Ammihudwui nao Elishamana sāda,

¹⁹ awui ashangva̱ mashing thing hangmati shāphangāna.

²⁰ Kala awui thili Manassehwui shang, Manasseh shangwui kathāna chi Pedahzurwui naomayara Gamalielna sāda,

²¹ awui ashangva̱ mashing thing thumrāda khani shākhanina.

²² Chiwui thili Benjaminwui shang, Benjamin shangwui kathāna chi Gideoniwui naomayara Abidanna sāda,

²³ awui ashangva̱ mashing thing thumrāda phangā shāmatina.

²⁴ Ephraim shangwui rāmrah katonga, kānglup athishurda mishān lakh akha thingchishat shākhana. Athumna kakathumali zatra.

²⁵ “Atungshong rāmrah sāda pamki kajibing chi Danwui philān athishurda kachichāwui ashangva̱ eina pamra, Dan shangwui kathāna chi Ammishaddaiwui nao Ahi-ezerna sāda,

²⁶ awui ashangva̱ mashing thing hangtharukta khani shāshinina.

²⁷ Kala awui thili Asherwui shang, Asher shangwui kathāna chi Okhranwui naomayara Pagielna sāda,

²⁸ awui ashangva̱ mashing thing hangmatida akha shāphangāna.

²⁹ Kala awui thili Naphtaliwui shang, Naphtali shangwui kathāna chi Enanwui naomayara Ahirana sāda,

³⁰ awui ashangva̱ mashing thing hangphangāda kathum shāmatina.

³¹ Dan shang saikora rāmrahwui mashing lakh akha thing hangphangāda shini shātharukna. Athumwui philān athishurda athumna naoda zatra.”

³² Hi Israelwui mibing athumwui avāva̱ ngarāwui shimkhur athishurda chankahai; shang-shang eina shānlaga rāmrahli khalei mi saikora shātharuk kala thing kathum shāphangā kala hangphangāna.

³³ Kha Prohona Mosesli kakaso athishurda Israelwui mibingli Levinaobing mashānnarmana.

³⁴ Chithāda Prohona Mosesli kakaso tākam eina Israelwui mibingna sai. Avāva̱ ngarāwui shimkhur athishurda shang kachiva̱ philānli ngasoda rāmrah sāpama kala zata.