MISHĀN 17 - Kathara Bible (BSI)

Aaronwui Khāmshui

¹ Prohona Mosesli hānga,

² “Israelwui mibingli hānglu, avāva̱ ngarāwui shimlākwui kathāna mi ava̱va̱wui eina khāmshui ava̱va̱, athum avāva̱ ngarāwui shimlāk athishurda khāmshui tharāda khani khuilu. Mi kachiva̱wui aming kachichāwui khāmshuitungli kapisanglu,

³ kala Aaronwui aming Leviwui khāmshuitungli kapisanglu. Kaja shang ava̱va̱wui kathānawui khāmshui ava̱va̱ leira.

⁴ Chiwui thili nana khāmshuibing chi khuida ina nali samphang khavai kazip khavai kachonshimwui ningkhami oko mangāli haira.

⁵ Kala ina kapangkakhui mipāwui khāmshui chi ashon shonra; chithāda sāda Israel mibingna nawuitungli ngurngur matuiching kaji hi ina shimān ngasakhaora.”

⁶ Mosesna Israelwui mibingli kahāng eina athumwui avāva̱ ngarāwui shimlāk athishurda kathāna kachiva̱na khāmshui ava̱va̱ khuirāda katonga tharāda khanina; kala athumwui khāmshui chiwui ngachaili Aaronwui khāmshuila zanga.

⁷ Kala Mosesna khāmshui saikora chi ningkhami oko haikhavai kachonshimli Prohowui mangāli haimi.

⁸ Kala akhama kathā Mosesna ningkhami oko haikhavai kachonshimli zanga; kala yanglu, Levi shimkhurpa Aaronwui khāmshui kharhairasai, awonla wonda almond khamin matheisai.

⁹ Chieina Mosesna khāmshui saikora chi Israelwui mibingli Prohowui mangāli khuishokchithei; kala athumna yangda kachichāwui khāmshui khui.

¹⁰ Prohona Mosesli hānga, “Aaronwui khāmshui chi ili makhamayābingwui machutkhui khavai sāda ningkhami oko ngalemli zanghailuishitlu, kaja ili mamayāmada athumna kakazep chi nana tangngasakhaolu; athum thipaishina.”

¹¹ Chithāda Mosesna Prohowui kakaso tākam eina sai.

¹² Kala Israelwui mibingna Mosesli hānga, “Yanglu, ithum thira, sākhavai maleithura, ithum saikora sākhavai maleithura.

¹³ Prohowui tabernacleli vākhanganai kachiva̱ thira. Ithum thiserhaorala?”