MISHĀN 15 - Kathara Bible (BSI)

Kachigatwui Ainbing

¹ Prohona Mosesli hānga,

² Israelwui mibingli hānglu, nathumna apamki kaji ina khami ngalei chili azangda,

³ kala nathumna Proholi kachigat, seishang, lah yaoshangwui eina, lah mei eina riktāda kachigat, lah pha̱kaphayā, lah khangashit ungshungmi khavai lah lemmet kachigat, lah langchin sākahai phanit phanaowui kachigat Proholi nganamkaphā kachigatlapai,

⁴ kachigat khuikharā mi china Proholi tharāzāt kachigat khamanaka mathir khuilui akha akhum tharāwui khum akha, kala lengkhor matiwui khum akhali thao manatlaga chigatra;

⁵ kala zam lengkhor matiwui khumkha ra̱shakchigatwui vang, rikkatā kachigat, lah pha̱phayā khavaiwui vang, yaonao ava̱va̱ eina ngasoda nathumna ngarānra,

⁶ lah yaovā akhawui vang, nathumna tharāzat kachigatwui khamanaka khuilui akhum tharāwui khum khani mathirli thao lengkhor akhawui khum kathum manatlaga chigatra;

⁷ kala rāshak chigatwui vang nathumna drakhāra̱ lengkhor akhawui khum kathumwui akha Proholi ningyāngkhaung nganamkaphā chigatra.

⁸ Kala nathumna rikkatā kachigatwui vang mukkā lah khangashit kasā ungshung khavai pha̱kaphayā, lah Proholi ningyatchigatwui khangarān kasā chitharan:

⁹ mi china mukkali ngasoda tharāzat kachigatwui vang mathir khamanat khuilui akha akhum tharāwui khum kathum, thao lengkhor akhawui tangkhaili manatlaga chigatra,

¹⁰ kala nana ra̱shakchigatwui vang zam lengkhor akhawui tangkhai mei eina kachigat sāda hi Proholi ningyāngkhaung nganamkaphā chigatra.

¹¹ Hithāda mukkā, lah yaova kachiva̱, lah yaovānao, lah yaonao kachigat kachiva̱li sāra.

¹² Nana khangarān mashing athishurda, ava̱va̱wui chi mashing athishurda sāra.

¹³ Proholi ningyāng ungkhangasak nganamkaphā mei eina kachigat hi, Israelwui mibingna hithāda sāserra.

¹⁴ Kala nathumli ngasokazat kha̱minao zangakha, lah nathumli thot-thot ngasokazatbingna Proholi ningyāngkhaung nganamkaphā mei eina kachigat hi pha̱phayāngaiakha, nana kasā chithāda ana sāpapamra.

¹⁵ Yarui ashangva̱ eina kha̱miwui ningkhami ngaraichada katang mavaila thot-thot kachida leichingra; Prohowui mangāli kha̱mila nathumwui chithāpapamra.

¹⁶ Nathum eina nathumli ngasokazat kha̱miwui vang ain akha kala sharphahor akhara.

¹⁷ Prohona Mosesli hānga,

¹⁸ “Israelwui mibingli hānglu, ina thānzangki kaji ngalei chili kazang chitharan,

¹⁹ kala ngalei chiwui kashakazā nathumna kazā chitharan, nathumna Proholi chigatra.

²⁰ Nathumwui hātkhui kharewui zāt eina nathumna khamui ahang eina chigatra; hi lanpumwui eina kachigat sāda mira, hithāda nathumna chigatra.

²¹ Nawui hātkhuikhare zāt eina nathumna khamui sālaga nathumwui thot kachida Proholi kachigat mira.

²² “Kha nathumna nguihaida, kala Prohona Mosesli kakaso ningkhami saikora hi mamayonakha,

²³ Prohona Mosesli shichinlaga kaso kahai ningkhami mithangwui eina thuilaga nathumwui thot kachida masaakha,

²⁴ kala yarui ashangva̱na chi matheimada sākahai ngasasaakha, ashangva̱ saikorana mukkānao akha rikkatā kachigat sāda chigatra, Proholi ningyāngkhaung nganamkaphā tharāzat kachigat kala ra̱shakchigat eina ngasoda sharphahorwui athishurda sāra, kala mevā akha suiham chigatwui vang chigatra.

²⁵ Kala pāngmon china Israel ashangva̱wui vang pheomira, kala athumli pheomihaora; khikhalajila athumwui khangui chiwui vang athumna Prohowui mangāli rikkatā kachigat kala athumwui suiham chigat khuikharāna.

²⁶ Kala Israel yarui ashangva̱li kala athumli ngasokazat kha̱mibingli pheomira, khikhalajila yarui ashangva̱na khayon chili zangser kahaina.

²⁷ “Kalikhada mi akhana matheila morei sahaiakha, ana kumkha kākahai me alānao akha suiham chigatwui vang chigatra.

²⁸ Kala Pāngmon china, matheimada khayon sakahaipa chiwui vang Prohowui mangāli pheomira; kala ali pheomihaora.

²⁹ Matheimada kasā mi kachiva̱ Israelwui mibingranu, kala athumli ram zatkharum kha̱mibingranu, saikorawui vang ain akhamāng leira.

³⁰ Kha mi akhana sāphalungkida kasā saakha ramnaolapai lah ramkazatalapai, Proholi kachipatna, chieina mipa chili awui miyurwui eina katatchaohaora.

³¹ Khikhalajila Prohowui tuili ana ningkachaida makhuisangmana, kala awui ningkhami kaihaowa. Mipa chili katatchaohaora, kala khayon awuitungli leira.”

Sabbath Makhamayonali Ngalung eina Horkathat

³² Israelwui mibingna lamhāngli leilakha, athumna sabbaththang thing phāzatkasa mi akha tukkhuiya.

³³ Kala thing kaphā katheibing china ali Moses eina Aaron kala yarui ashangva̱wui mangāli khuirai.

³⁴ Athumna ali narhaiya, khikhalajila ali khisara kaji tharlak eina matheithuwa.

³⁵ Chieina Prohona Mosesli hānga, “Mipa chili shaothatphalungra, yarui ashangva̱na ali rāmrah ayarli khuishokta ngalung eina horthatra.”

³⁶ Chieina yarui ashangva̱na ali rāmrah ayarli khuishokta Prohona Mosesli kakaso athishurda ali ngalung eina horthathaowa.

Chontheira̱ Masa̱kathān

³⁷ Prohona Mosesli hānga,

³⁸ “Israelwui mibingli hānglu, mi kachiva̱ kachichāwui kachon mareili thot kachida chontheira̱ sāsang khavai; kala kachon mareiwui chontheira̱ chi khamaying machuwui kazaira̱ eina sāsangranu;

³⁹ kala hi yanglaga nathumna Prohowui ningkhami saikora phaningung khavaina, kala chi sākhavaina, nathum khalattawui ning kala mikli nathumna mathanglak eina shurthuikapai chili mashur khavai vangna.

⁴⁰ Chieina nathumna iwui kakaso saikora phaningungra, kala nathumwui Varewui mangāli tharra.

⁴¹ I Proho nathumwui Varena, nathumwui Vare ngasa khavai Egypt ngaleiwui eina khuikashoka: I Proho nathumwui Varena.”